A CIG-Ensino e as demais organizacións sindicais con representación na Mesa Sectorial acordaron non presentarse na xuntanza convocada pola Consellaría de Educación para a tarde do 27 de xullo, na que o departamento autonómico pretendía impor unha redución dos cadros de persoal nos centros de Infantil e Primaria. Dende a CIG-Ensino censúrase que a Consellaría presente este recorte de postos de traballo nos períodos nos que o profesorado non está nos centros para evitar así a contestación ás regresións que está a aplicar ao ensino público.

A CIG-Ensino da Coruña amosou o seu rexeitamento á sanción imposta pola Consellaría de Educación ao director do IES “Agra de Raíces” de Cee, por non aceptar o recorte de profesorado decretado pola Xunta e amosar a súa oposición ao deterioro da calidade do ensino público.

A CIG-Ensino denuncia que despois das reunións informais, “que non Xuntas de Persoal”, tal e como marca a lexislación vixente, mantidas nas xefaturas territoriais de A Coruña, Lugo e Ourense, a administración non vai cubrir a maioría das peticións de profesorado dos centros educativos trasladadas pola central sindical. “O caso máis sangrante”, afirman,  é o de Pontevedra, onde nin sequera se fixo a reunión, quedando esta para setembro, cando xa están feitos os nomeamentos do profesorado.

A CIG-Ensino denuncia que a Consellaría de Educación agardou intencionadamente ao mes de xullo, para, aproveitando as vacacións do profesorado, comunicar aos centros uns recortes drásticos dos cadros de persoal. Non se trata dunha actuación casual, senón dunha decisión premeditada que ten por intención evitar a contestación a este recorte de profesorado que vai afectar ao desenvolvemento das actividades dos centros.