A federación de Servizos da CIG de Vigo vén de denunciar que a empresa Linorsa despediu ás traballadoras contratadas que secundaron a folga da limpeza nos colexios públicos e a unha delegada do comité de empresa. As afectadas solicitaron a palabra no pleno do vindeiro luns día 5 de setembro para protestar pola actitude da compañía e reclamarlle unha solución ao Goberno local.

Arredor dun cento de traballadoras/es da limpeza dos colexios e comedores escolares de Vigo realizaron na mañá de hoxe un peche na Concellería de Educación para forzar unha reunión coa responsábel municipal que levan tempo solicitando. As operarias denuncian que os cambios introducidos no prego de condicións para a nova adxudicación do servizo incumpren o convenio colectivo. Dende a CIG-Servizos, sindicato maioritario no comité de empresa, critican que a xuntanza non servise para corrixir unha situación que pode derivar nun grave conflito no mes de setembro.