Sada

CIG-Servizos denuncia o despedimento dun traballador en Ascan Misturas que estaba a impulsar a negociación do novo convenio

begonha.carballo — Thu, 16 Dec 2010 15:08:55 +0100

Hai uns catro meses o traballador despedido, que desenvolvía a súa actividade no porto de Sada, comezara a promover asembleas entre os seus compañeiros/as de cara a conseguir unha plataforma para a negociación do novo convenio. Para a súa sorpresa, poucos días despois de que a CIG denunciase o convenio (proceso indispensábel para proceder á negociación) o traballador recibiu a carta de despedimento, na que a empresa recoñece a improcedencia do mesmo e asume o pago da indemnización de 45 días por ano traballado.

A CIG-Servizos xa anunciou que pelexará pola readmisión do empregado co obxectivo de conseguir unha negociación o máis positiva posíbel.

Dende a CIG-Servizos tamén criticaron as cativas condicións do actual convenio e como exemplo pon o salario dun traballador/a con categoría peón que percibe ao mes só uns 650 euros brutos.

Ademais, a central sindical quere pór en coñecemento da opinión pública as pésimas condicións laborais nas que se atopan os traballadores/as do porto de Sada, que teñen que realizar tarefas que non lle son propias; así como a falta de adecuación da garita onde mudan a roupa, xa que carece luz, cisterna para o baño, e mesmo a lixivia para a limpeza se almacena neste lugar.

A CIG adiantou que solicitará unha xuntanza con Portos de Galiza para trasladar aos responsábeis do ente a situación dos traballadores/as e solicitar a mediación da administración para acadar a readmisión do obreiro despedido.

Nova concentración contra a privatización dos servizos no albergue xuvenil de Gandarío

begonha.carballo — Thu, 14 Oct 2010 14:23:45 +0200

Coa concentración, convocada polo Comité de Empresa e apoiada pola CIG, quérese denunciar a “anómala e inxusta situación” que se produce neste albergue de Sada, logo de que a Consellaría acordase contratar un servizo de catering para atender os/as usuarios/as durante este mes. Non obstante, o centro conta cun cadro de persoal fixo todo o ano, reforzado no verán con traballadores e traballadoras contratados por acumulación de tarefas para atender aos grupos de excursionistas. Esta contratación, sinalan dende a Federación de Administración da CIG, esténdese aproximadamente dende o mes de marzo até o outono.

Por iso, dende a CIG reclamouse á Xunta que prorrogue os contratos dos traballadores e traballadoras temporais durante o tempo necesario para realizar os servizos que precisa o albergue, en vez de recorrer á contratación dunha empresa privada.

Para a CIG-Administración Autonómica a actual situación que se vive no albergue supón:

- Un posíbel empréstito laboral, ao permitir a utilización de instalacións públicas por servizos privados para facer beneficios para unha empresa.

-A mala xestión dos recursos públicos pola duplicidade do gasto, xa que ao mesmo tempo que hai traballadores/as públicos/as contratados/as, ou con posibilidade de renovación do contrato, se recorre a unha empresa para que achegue igual servizo.

-Unha utilización fraudulenta da contratación temporal por acumulación de tarefas ao continuar existindo carga de traballo.

- Unha frustración das lexítimas aspiracións dos integrantes da bolsa de traballo da Xunta, que pagaron unhas taxas para estar nas listas de contratación da administración galega e que teñen uns méritos e capacidade para realizar estes traballos e poder optar as ofertas de emprego público que se realicen na administración autonómica.

-Unha diminución da cualidade que supón a privatización dos servizos públicos, que xa se ten observado noutras Consellarías.

-O incumprimento do V Convenio Colectivo no tocan á previsión de postos de traballo.

Xuntanza co Xefe Territorial de Traballo e Benestar

Ao remate da concentración, unha representación da CIG-Administración, entre os que se atopaban o membro da Executiva Federal, Rafael Aguirrebengoa, a Secretaria Comarcal da Federación en A Coruña, Erea Estévez, ou a responsábel comarcal do sector, María Xosé Blanco, fixo entrega ao Xefe Territorial da Consellaría de Traballo e Benestar das sinaturas recollidas nas últimas semanas contra a privatización dos servizos no albergue.

Durante o encontro, o responsábel político tamén informou a CIG a respecto da situación do centro asistencial e educación especial Santiago Apóstol e do Terra de Ferrol. Sobre o primeiro, o Xefe Territorial explicou que vai pasar a ser competencia da Consellaría de Educación, con todo o seu persoal, aínda que a Xunta ten intención de privatizar o servizo asistencial (que seguirá dependendo da Consellaría de Traballo e Benestar).

Concentración contra a privatización temporal dos servizos do albergue de Gandarío en Sada

begonha.carballo — Tue, 05 Oct 2010 10:41:17 +0200

Delegados e delegadas da central mantiveron unha concentración o luns 4 de outubro en A Coruña para denunciar estes feitos, na defensa duns servizos públicos de cualidade e polos dereitos das persoas contratadas temporais.

Dende a Federación de Administración explican que no albergue hai un cadro de persoal fixo para todo o ano, reforzado no verán con traballadores e traballadoras contratados por acumulación de tarefas para atender aos grupos de excursionistas. Esta contratación, sinalan, esténdese aproximadamente dende o mes de marzo até o outono.

Este ano o albergue de Gandarío ten ocupación tamén durante o mes de outubro, dándose a coincidencia que o seu cadro de persoal se atopa de vacacións e aos/ás traballadores/as temporais a Xunta xa lles rescindiu o contrato ou lles deu tamén vacacións, mentres decide acudir aos servizos da empresa privada Eurest Colectividade, S.L.

Para a CIG-Administración Autonómica estes feitos crean unha “inxusta e anómala” situación que se traduce en:

- Posíbel empréstito laboral, ao permitir a utilización de instalacións públicas por servizos privados para facer beneficios para unha empresa.

-Mala xestión dos recursos públicos pola duplicidade do gasto, xa que ao mesmo tempo que hai traballadores/as públicos/as contratados/as, ou con posibilidade de renovación do contrato, se recorre a unha empresa para que achegue igual servizo.

-Utilización fraudulenta da contratación temporal por acumulación de tarefas ao continuar existindo carga de traballo.

- Frustración das lexítimas aspiracións dos integrantes da bolsa de traballo da Xunta, que pagaron unhas taxas para estar nas listas de contratación da administración galega e que teñen uns méritos e capacidade para realizar estes traballos e poder optar as ofertas de emprego público que se realicen na administración autonómica.

-Pola diminución da cualidade que supón a privatización dos servizos públicos, que xa se ten observado noutras Consellarías.

Correos pecha indefinidamente o servizo de atención ao público polas tardes nas oficinas de Sada e Betanzos

begonha.carballo — Fri, 17 Sep 2010 17:15:27 +0200

A dirección da zona de Correos en Galiza comunicou á representación do persoal de xeito oficial, que este peche se fará efectivo a partir do vindeiro día 1 de outubro, xustamente, a continuación da suspensión dese servizo de tardes durante o período vacacional, que xa este ano se veu atrasado ata finais do mes de setembro cando outros anos tan só se suspendía até mediados dese mes.

“Non entendemos dende a CIG Correos cales poden ser os motivos que levan á Dirección de Correos a tomar esta decisión, pois estas oficinas en concreto non presentan datos estatísticos diferentes ao resto das oficinas que abren de tarde”, sinala Miguel Ramudo, delegado da CIG en Correos.

Por iso, dende a central sindical existe o temor a que esta decisión sexa o punto de partida dunha serie de cambios encamiñados a facer desaparecer as quendas de tarde da maior parte das oficinas da provincia. “Dende logo na CIG Correos non compartimos a idea de que esta empresa Correos recorra á redución de persoal e a deixar de prestar servizos á cidadanía para mellorar os maltreitos resultados económicos”, subliña Ramudo.

Pola contra, a CIG entende que o servizo de Correos debe estar estendido todo o que sexa necesario e cos horarios máis amplos posíbeis, para facilitarlle á cidadanía o acceso aos mesmos nas mellores condicións e circunstancias. “Non se pode obrigar aos veciños/as dos concellos de Sada, Betanzos, Abegondo, Bergondo, Oza, Cesuras, Teixeiro... a desprazarse, en principio até Perillo, para facer uso dos servizos que oferta Correos polas tardes”, critica o delegado da central.

No que atinxe ao persoal de Correos que até o momento estaba ocupando estes postos que van desaparecer, dende a CIG-Correos sospeitase que a intención da empresa é amortizar estas prazas directamente recolocando os afectados e afectadas noutros postos. “A redución de persoal tamén se fai desta maneira e ao final estamos falando de que se reducen os postos de traballo e ao mesmo tempo se deixa de prestar un servizo básico precisamente nas horas nas que os cidadáns/ás teñen máis posibilidades de achegarse ás oficinas”, denuncia Miguel Ramudo.

Dende a CIG esíxese de Correos que revoque esta comunicación e, en caso contrario, non se desbota a posibilidade de convocar accións de presión; “unhas medidas que se poden tomar conxuntamente cos responsábeis políticos e as asociacións veciñais dos concellos afectados cos que xa empezamos a poñernos en contacto”.

A asemblea de traballadores/as de Urbaser acorda suspender o paro indefinido no servizo de limpeza viaria de Sada

begonha.carballo — Tue, 24 Aug 2010 14:28:17 +0200

Por mor do decreto, que a CIG vai recorrer xudicialmente, dos 11 traballadores/as susceptíbeis de secundar a folga, tan só poderían exercer este dereito catro, xa que se estabelecen uns servizos mínimos de sete operarios. Ante esta situación, explicaba o responsábel de limpeza viaria da CIG-Servizos, Xosé Lois Martín Freire, acordouse suspender a convocatoria de paro, xa que nestas circunstancias a medida de presión queda desvirtuada, mentres que os únicos que sufrirían as consecuencias da folga serían os propios traballadores/as (suspensión de salario e das cotizacións á Seguridade Social).

Neste senso, Martín Freire, amosouse moi crítico coa decisión da alcaldía a respecto dos servizos mínimos, porque se está “impedindo o dereito dos traballadores/as a utilizar a súa única arma de presión. Con estas condicións á empresa pode botar en folga tres anos e os únicos que van perder son so traballadores/as e os cidadáns/ás de Sada”.

A este respecto, o sindicalista subliñou que a limpeza viaria non constitúe un servizo esencial que xustifique semellantes servizos mínimos, ao non implicar un problema de saúde pública. En todo caso, apuntou, o primordial e necesario sería a adecuación da praza de abastos, “o resto é recollida de papeleiras e varrido de rúas”, pois a recollida de lixo corre a cargo do Consorcio das Mariñas.

Incumprimentos por parte da empresa

A CIG-Servizos de A Coruña tamén denunciou que Urbaser incumpre o prego de condicións da concesión do servizo de limpeza viaria. A saber, o prego puntuaba dun xeito importante que os salarios dos traballadores/as destinados a este servizo estean axustados á media do entorno; non obstante, un peón percibe anualmente uns 12.000 euros brutos, mentres que, por exemplo, o salario dun peón do Consorcio de Cespa ronda os 17.000 ou 18.000 euros.

De feito, o orzamento municipal destinado a esta contrata duplicouse dende o pasado ano, precisamente para permitir que a empresa adxudicataria puidese facer fronte a un incremento dos salarios. “Por avatares políticos temos o mesmo convenio dende 2007 e os salarios permaneceron sen actualizar á espera de negociar unhas condicións acordes á media unha vez asignada a nova contrata”, explicou Xosé Lois Martín.

Así, o pasado mes de xaneiro iniciáronse as negociacións para o novo convenio cunha proposta por parte da empresa do 0.85% do IPC do ano anterior máis un 0.99% nun plus de vestiario. A cambio pretendía limitar dereitos do persoal como a antigüidade e rebaixar as condicións de IT. “Así foi imposíbel chegar a un acordo”, sentenza.

Disposición para a negociación

O inmobilismo de Urbaser chega até tal punto que mesmo rexeitou a proposta achegada polo Concello durante a reunión do luns (un convenio a dous anos cuns incrementos salariais algo inferiores ás demandas da parte social, pero que os traballadores/as estaban dispostos a aceptar); para reafirmar que só admitirá a conxelación salarial para 2010 e unha suba do 0.85% do IPC deste ano para 2011. Unha oferta que dende a CIG-Servizos consideran “inaceptábel”.

“Fronte a esta situación, adiantou Martín Freire, levaremos adiante unha conflitividade distinta e unha nova serie de reclamacións que tiñamos intención de renegociar no novo convenio”. Así e todo quixo subliñar que a parte social está disposta a sentar a negociar “en calquera momento”.

Os/as traballadores/as da limpeza viaria de Sada comezarán unha folga indefinida se non hai acordo na xuntanza desta tarde

begonha.carballo — Mon, 23 Aug 2010 10:55:21 +0200

Dende a CIG-Servizos de A Coruña explican que a decisión de convocar folga chegou de xeito forzado logo de que a empresa concesionaria do servizo, Urbaser, se negase a negociar o novo convenio colectivo. As principais reivindicacións do persoal pasan por unha suba media dun 2% no salario base e un 1% no plus de vestiario e unha xornada de 37 horas e media. Demandas que, denuncian, a empresa entende “excesivas”, a pesar de que o orzamento da concesión do servizo se duplicou dende xullo do pasado ano.

Neste senso, Xosé Lois Martín Freire, responsábel de limpeza viaria da Federación de Servizos, subliña que “os/as traballadores/as teñen unhas reivindicacións moi sensatas para os tempos que corren”, especialmente tendo en conta que dos máis de 495.000 euros abonados polo Concello a Urbaser, a empresa só destina 225.000 ao custe total do persoal.

Así mesmo, dende a CIG-Servizos quérese denunciar os abusivos servizos mínimos estabelecidos para a folga, pois do cadro de persoal de 12 traballadores/as, 9 terán que acudir ao seu posto con normalidade.

De non acadarse unha solución satisfactoria entre as partes durante a xuntanza convocada polo alcalde do Concello para a tarde deste luns, a folga iniciarase con carácter indefinido a partir das 00:00 horas do martes 24 de agosto.