A CIG-Construción suspendeu este mediodía a protesta que mantiña paralizadas dende onte as obras do novo hospital de Vigo despois de que se acordase a creación dunha comisión de seguimento que velará polo cumprimento das condicións de traballo. A decisión adoptouse no transcurso da xuntanza mantida a petición da central nacionalista coa Inspección de Traballo e as empresas que executan os traballos e foille trasladada aos traballadores/as nunha asemblea celebrada a pé de obra.

A CIG-Ensino de Pontevedra alerta das consecuencias que se poden derivar da redistribución do alumnado escolarizado nos centros públicos da cidade e demanda que se cumpran todas as garantías para que en ningún caso isto supoña a supresión de prazas de profesorado ou a saturación de ningún colexio.

A federación da Construción da CIG convoca catro xornadas de folga nas obras de ampliación do aeroporto vigués de Peinador para denunciar as condicións laborais ás que están somietidos os operarios. Segundo os cálculos da central, deixan de ingresar anualmente entre 6.000 e 7.000 euros porque se lles paga por debaixo do que estipula o convenio, teñen xornadas de 10-12 horas diarias e traballan domingos e festivos.

A CIG-Construción continuará este xoves coa súa campaña de denuncia da situación laboral que padecen moitos traballadores/as do sector que desenvolven o seu labor en obras contratadas polas Administracións públicas. O novo acto reivindicativo comezará arredor das 11.00 horas no contorno da rotonda con Genaro de la Fuente, á altura de Vía Norte, onde se están a levar a cabo traballos de acondicionamento das beirarrúas contratados polo Concello de Vigo.

Delegados da CIG-Construción e parados do sector paralizaron durante toda a mañá as obras de ampliación do aeroporto de Lavacolla para denunciar o incumprimento do convenio, as xornadas abusivas, a obriga de traballar sábados, domingos e festivos e a explotación á que son sometidos os traballadores estranxeiros, nomeadamente  os portugueses, contratados con salarios e condicións laborais peores que os seus compañeiros. Esta acción insírese na campaña que a CIG-Construción vén desenvolvendo desde hai un ano para exixir o cumprimento da xornada, o pagamento dos salarios según convenio e para denunciar que ao incumprir estas condicións as empresas están incorrendo en fraude fiscal e fraude á Seguridade Social.

O Comité do Consorcio Galego de Servizos de Igualdade e Benestar manifestou o seu malestar polas informacións aparecidas na prensa a respecto das condicións laborais do persoal que traballa para dito ente. Dende o Comité lembran que os traballadores/as accederon aos seus postos mediante un proceso de selección e aseguraron que “resulta inaudito que por un cambio de goberno, o persoal dunha entidade dedicada á xestión pública de servizos sociais, estea constantemente cuestionado por algún medio de comunicación e polo propio goberno cando é, este mesmo, o que está dirixindo esta entidade”.

A Federación de Construción e Madeira da CIG-Ferrol levou a cabo no mediodía do venres 18 de setembro unha concentración ás portas do Concello de Ferrol para denunciar, unha vez máis, as precarias condicións de traballo nas que se atopan os traballadores da maioría das empresas que desenvolven a súa actividade nas obras adscritas ao Plan E.