A Mesa Estatal do Carbón acordou pasado venres día 4 de febreiro o desenvolvemento de toda a normativa legal necesaria para a aplicación efectiva do Decreto do Carbón. Segundo o Ministerio de Industria, só quedaría pendente que a Xunta de Galiza retire o recurso interposto contra o documento diante do Tribunal de Luxemburgo.

Membros da CIG -entre os que se atopaban responsábeis da federación de Químicas e Enerxía, representantes do sindicato nas comarcas afectadas, Coruña e Ferrol, así como delegados sindicais das empresas afectadas- realizaron este xoves 14 unha acción de protesta no Parlamento galego para rexeitar o novo decreto do carbón. Xusto antes de que dese comezo a intervención do secretario xeral do PSdeG despregaron unha faixa e berraron consignas denunciando a actitude de PP e PSOE, reclamando a súa implicación no conflito e esixindo a modificación do texto até que foron desaloxados.

Representantes da federación de Químicas e Enerxía da CIG mantiveron o pasado día 10 de setembro unha xuntanza cunha delegación do grupo parlamentario do PSOE no Parlamento galego para abordar a problemática relacionada co Decreto do Carbón do Goberno español (Real Decreto 134/2010) que establece o procedemento de resolución de restricións por garantía de subministro. Dende a central nacionalista reclámanlle un posicionamento público en contra dunha normativa que terá graves repercusións no tecido produtivo das comarcas afectadas.