CEE Terra de Ferrol

A CIG demanda un Plano específico de Prevención e Atención das agresións ao persoal para o CEE Terra de Ferrol

begonha.carballo — Mon, 10 Oct 2011 11:03:11 +0200

A reclamación prodúcese logo de que o pasado día 6 de outubro, catro traballadoras do CEE Terra de Ferrol presentaran denuncia na comisaría de policía ante unha grave incidencia de agresións por parte dun usuario do centro. Este tipo de incidentes, explica a delegada de persoal da CIG, non son puntuais, senón que se teñen repetido nos últimos tempos, pondo en perigo tanto aos alumnos/as como aos traballadores e traballadoras.

Por iso, e co obxecto de acoutar as condicións laborais “deficientes e inseguras”, a representación do persoal demanda a elaboración urxente deste Plano Específico que contemple tanto formación para manexo destas situacións, apoio psicolóxico dos/das agredidos/as, maiores medidas de seguridade, reforzo do cadro de persoal, etc.

“É vital para o funcionamento correcto do centro, mais sobre todo para a protección dos usuarios e usuarias así como do persoal, dispor de planos e directrices internas que indiquen claramente a maneira de actuar ante situacións” de agresións ou que poñan en risco a seguridade dos alumnos/as e o persoal.

Nova concentración diante da EGAP contra a amortización de postos no Terra de Ferrol e no servizo contra incendios

begonha.carballo — Mon, 21 Feb 2011 15:25:57 +0100

O paso pola Comisión de Persoal, explican dende a CIG-Administración Pública é o paso definitivo para a publicación das supresións no DOG e o despedimento das traballadoras e traballadores do centro de Ferrol. Hai uns meses, o goberno galego anunciara a súa intención de pasar a xestión privada o CAPD Souto de Leixa (disgregado do Terra de Ferrol e que atende a persoas con discapacidade maiores de 21 anos) e despedir a 51 traballadores/as, que contan cunha ampla e recoñecida traxectoria profesional.

A pasada semana publicábase no DOG a adxudicación da xestión do centro a Clece, empresa de Florentino Pérez, por case 6 millóns de euros e iniciábanse os trámites finais para amortizar os postos de traballo. O resultado desta operación, baixo a escusa da austeridade, será unha redución da calidade asistencial, 51 empregados/as públicos despedidos/as e a entrega da xestión dun servizo público en mans dunha empresa cuxo obxectivo non será a atención aos usuarios/as, senón a obtención de beneficios.

Así mesmo, coa protesta a CIG quixo amosar o rexeitamento ao anuncio do goberno galego de suprimir 148 postos de traballo no servizo de prevención e defensa contra incendios forestais, o que suporá na práctica o desmantelamento deste servizo. Na RTP remitida pola Consellaría do Medio Rural ás organizacións sindicais exclúense 148 prazas de peóns e peóns condutores que pretenden amortizar.

Estas privatizacións, denuncian dende a CIG-Autonómica non son as primeiras, senón que continúan na liña das xa executadas, como no caso do Centro de Educación Especial Santiago Apóstolo da Coruña, ou dos servizos de cociña, limpeza ou mantemento das consellarías de Educación, Traballo ou Xustiza.

A Xunta amortiza 51 postos de traballo logo de formalizar con Clece o contrato de xestión do centro Terra de Ferrol

begonha.carballo — Thu, 17 Feb 2011 14:13:06 +0100

Estes postos de traballo, explican dende a CIG-Administración Autonómica, “sobran” segundo a Xunta despois de que a administración decidira dividir xuridica e fisicamente un único centro en dous: o Terra de Ferrol. Este quedaría como público, mentres que o Souto de Leixa sería privatizado.

O día 15 de febreiro publicábase no DOG a formalización do contrato de xestión do centro Souto de Leixa por case 6 millóns de euros á empresa Clece S.A. “O resultado desta operación é doarlle á empresa de Florentino Pérez un centro feito con cartos públicos e 6 millóns de euros para xestionalo. As consecuencias son a privatización dun servizo público, o deterioro do servizos prestados aos usuarios/as, nenos e nenas discapacitados/as, que ven como diminúe o persoal que os atende, e 51 despedimentos de traballadores/as con sobrada experiencia e coa condición de empregados/as públicos/as”, denuncian.

A este respecto, critican a falsa política de austeridade do Partido Popular, que consiste en limitar o gasto no capítulo de persoal reducindo emprego público “para darlle eses cartos a empresas privadas. Consiste en deteriorar os servizos públicos para logo xustificar a súa privatización”. Dende a CIG-Autonómica subliñan que os 51 postos de traballo que pretende amortizar a Xunta, súmanse aos case 200 empregos que o goberno do PP ten amortizado nestes anos de mandato.

Así mesmo, censuraron o “indigno papel de CCOO” que se negou a participar na mobilización convocada pola CIG e UGT diante da Escola Galega de Administración Pública, e a que o comité de empresa de persoal laboral de Educación na provincia da Coruña tivese a súa reunión na EGAP en Compostela, coincidindo coa Mesa Xeral, en solidariedade cos compañeiros/as despedidos/as”.

Nova protesta contra a amortización de postos e a privatización da xestión do centro Santiago Apóstolo

begonha.carballo — Fri, 10 Dec 2010 14:01:25 +0100

A concentración, convocada polo Comité de empresa e apoiada pola CIG, desenvolveuse diante do Edificio Administrativo da Xunta en Monelos, en contra das intencións da Consellaría de Traballo e Benestar, de quen depende o servizo de atención aos usuarios/as maiores de 21 anos, que ten previsto amortizar 19 postos e deixar en mans dunha empresa privada a xestión deste centro.

A protesta coincidiu coa reunión que mantiveron en Compostela representantes do Centro de educación especial Terra de Ferrol coa administración para informarse do futuro deste centro, xa que se atopa en situación similar ao Santiago Apóstolo. En dita reunión, a Xunta transmitiu a súa intención de despedir a todo o persoal interino e pasar á xestión privada a parte asistencial para maiores de 21 anos.

Ao igual que no caso do Santiago Apóstolo, o persoal do CEE Terra de Ferrol vén mobilizándose dende que a Xunta anunciara a súa decisión de avanzar no proceso de privatización de servizos sociais, tamén no eido da atención a persoas con discapacidade psíquica.

Novas mobilizacións a vindeira semana

Así mesmo, a CIG de A Coruña e UGT teñen convocada unha campaña de mobilizacións que terá continuidade o vindeiro 16 de decembro, día no que está previsto desenvolver diante do edificio administración da Xunta en Monelos, o “velorio polo CAEE Santiago Apóstol”; unha acción pola defensa e polo futuro desta instalación como centro público, con xestión pública e con empregados/as públicos.

Novas relacionadas

Persoal do Souto de Leixa péchase na sede ferrolá do PP contra a privatización do centro

begonha.carballo — Fri, 03 Dec 2010 12:03:05 +0100

O persoal, que foi atendido polo responsábel local do PP, prosegue así co calendario de mobilizacións iniciados dende que a Xunta anunciou a súa intención de privatizar o centro asistencial, pondo en perigo os postos de traballo e a cualidade dun servizo público que atende a persoas con discapacidades psíquicas.

Dende o colectivo de traballadores/as volveuse a instar Xunta para que garanta a continuidade da xestión pública do centro Souto de Leixa no proceso de segregación e posta en funcionamento, mantendo os postos de traballo da totalidade do cadro de persoal adscrito ao Centro de Educación Especial Terra de Ferrol, na súa condición de empregados públicos, e garantindo a calidade asistencial aos usuarios e usuarios, do mesmo xeito que se viña facendo até o de agora.

Manifesto das centrais sindicais

A CIG de Ferrol, CCOO e UGT veñen de presentar un manifesto contra a privatización da xestón do Souto de Leixa e de apoio aos traballadores e traballadoras. A continuación reproducimos á integra o contido do texto:

Manifesto das Confederacións Sindicais Comarcais de CIG, UGT e CCOO sobre a privatización da xestión pública do Centro Souto de Leixa

Os representantes comarcais de Ferrol das Confederacións de CIG, UGT e CCOO manifestamos a nosa oposición a privatización da xestión da atención ás persoas con discapacidades psíquicas e outras asociadas que, no momento actual e desde hai moitos anos, están a seren atendidos no Centro de Educación Especial Terra de Ferrol.

Os xestores actuais da Administración galega téñense embarcado nunha carreira de renuncias á xestión directa das súas obrigas de tutela, auxilio e apoio ás persoas necesitadas dunha especial cobertura social. Para iso iniciaron unha política de apertura da xestión dos servizos sociais esencias ás empresas privadas, poñendo a satisfacción desas necesidades ao servizo do beneficio das empresas privadas.

As razóns para a nosa oposición están ben definidas:

1. Estamos diante dunha posición apriorística, fundamentalista, a prol das bondades do mercado e en contra da xestión pública dos servizos tamén públicos. Non existe ningún fundamento, nin na práctica ata agora desenvolvida, nin nos estudios académicos realizados, que xustifiquen esa defensa ultra das bondades do mercado con respecto á xestión pública. Si existen múltiples prexuízos sobre este tema, prexuízos mantidos e fomentados a pesar de que a experiencia nos indica que a xestión pública dos servizos esenciais á comunidades é unha garantía da súa calidade e, sobre todo, da súa neutralidade económica.

Non se prestan só aos mellor situados socialmente. Tampouco se establecen discriminacións en función da renda individual de cada un dos asistidos. Estes prexuízos favorecen as posicións daquelas empresas que ven que poden obter beneficios inmediatos acudindo aos concursos que as Administracións convocan. Tal e como están as cousas non podemos senón preguntarnos cal é o pago que as empresas beneficiarias realizan a cambio de poder entrar no xogo de repartirse os fondos públicos destinados a servizos sociais.

2. Doutro lado, a decisión de privatizar esta xestión implica a supresión de decenas de postos públicos existentes na nosa comarca. Postos que están a ser ocupados por persoas en precario pero que eran e son susceptibles de consolidar e estabilizar. Postos que, en última instancia estaban abrigados por un convenio e polo Estatuto básico dos empregados públicos. Elimínanse eses postos e créanse algunhas decenas menos en condicións peores que as que tiñan os suprimidos. Onde había precariedade seguirá a habela, pero ademais aparecerán as sobrexornadas, os despedimentos improcedentes, e outros males presentes en boa parte do tecido empresarial, sobre todo naquel que está moi maioritariamente feminizado.

3. O respecto pola xestión pública dos servizos sociais é un elemento clave á hora de asegurar a súa calidade. A estas alturas todos somos conscientes das disfuncións que poden causar os mercados cando actúan sen control, desreguladamente. Tamén todos somos conscientes de que non todos perdemos o mesmo nesa situación. Mesmo hai que obtén fabulosos beneficios. As Administracións públicas están obrigadas a garantir que unhas liñas de accións social que aseguren a cobertura das necesidades sociais esenciais. De ningún xeito deben poñer estas en función dos negocios privados.

4. Finalmente, estamos convencidos de que non son posíbeis uns servizos públicos de calidade sen unha forte presenza do sector público nesa área de actividade. A pretensión de que estes servizos se desenvolvan mediante empresas que atendan esencialmente ás sinais dos mercados, é dicir, beneficios inmediatos, ameazas de perdas ou realización das mesmas, é, por un lado, unha falsificación da realidade porque esas empresas se aseguran de ter a cobertura necesaria das Administracións para que o seu negocio nunca dea perdas. Pola outra parte, elimina unha referencia estritamente necesaria, a da actividade pública que non se guía polo beneficio senón pola valoración acaída de necesidade social á que obedece ese servizo.

É por todo isto que rexeitamos a privatización da xestión do servizo público no centro Souto de Leixa, expresamos a nosa solidariedade cos traballadores e traballadoras afectados, tamén cos usuarios e usuarias que van ver radicalmente modificados os principios de actuación que ata agora estaban a ser desenvolvidos para atendelos e chamamos a máis ampla mobilización en defensa duns servizos públicos de calidade.

Ferrol, 3 de decembro de 2010.

Manifestación en Ferrol en contra da privatización do centro Souto de Leixa

begonha.carballo — Mon, 22 Nov 2010 11:35:17 +0100

As rúas de Ferrol acolleron o pasado sábado unha nova manifestación en contra das políticas privatizadoras que está a pór en práctica a Xunta de Galiza, e que neste caso afectan á xestión do centro de educación especial Souto de Leixa. Estas privatizacións, denuncian dende a CIG-Administración de Ferrol, implican confirmar unha política de apertura da xestión dos servizos sociais á empresa privada, poñendo a satisfacción de necesidades básicas da cidadanía ao servizo do beneficio das empresas privadas.

Dende hai anos o CEE Terra de Ferrol (antigo Carmen Polo) comezou un proceso de segregación da parte de alumnos/as menores de 21 anos dos/as alumnos/as maiores de 21 anos, que actualmente conviven no mesmo centro. No ano 2005 iniciáronse as obras para a división física do centro, creando unha residencia para alumnos menores de 21 anos con unha capacidade para 35 residentes e a remodelación da parte dos alumnos maiores de 21 anos, quedando así divididos fisicamente os dous centros.

Xa co bipartito, no ano 2008, estabeleceuse unha distribución do persoal laboral, escribíndose daquela unha parte á Vicepresidencia e outra á Consellaría de Educación. Finalmente, en 2009 constituíse formalmente a denominada parte de maiores, baixo nome CAPD Souto de Leixa e que vai ocuparse dos alumnos de máis de 21 anos. Na actualidade hai 117 traballadores/as no CEE Terra de Ferrol, dos cales 55 son postos vacantes, coñecidos como interinos, mentres que o resto dos postos están ocupados por persoal laboral fixo.

O pasado 13 de outubro, nunha rolda de prensa onde estaba o Delegado Territorial mais os Secretarios Xerais das Consellarías de Educación e Traballo, anunciábase a xestión privada do Souto de Leixa; mais en ningún momento a Xunta de Galiza se dirixiu ao Comité de Empresa ou Comité Intercentros para negociar esta problemática. Dende entón, os traballadores e traballadoras viñeron desenvolvendo un calendario de mobilizacións na defensa deste servizo público e dos seus empregos.

Dende a CIG-Administración de Ferrol advirten que privatizar estes servizos suporá o despedimento dun elevado número de traballadores e traballadoras con experiencia adquirida ao longo de moitos anos desenvolvendo as súas funcións e substituílos por outros en situación de maior precariedade laboral. “O respecto pola xestión pública dos servizos sociais é un elemento clave á hora de asegurar a súa calidade. Non son posíbeis uns servizos públicos de calidade sen unha forte presenza do sector público nesa área de actividade”, denuncian nun comunicado.

CIG-Administración exixe, xa que logo, que se manteña o carácter público da xestión que se realiza neses centros de referencia nas súas comarca se denuncia que “estamos diante dunha actitude de eliminación permanente de servizos públicos por parte do Partido Popular no goberno galego e de converter a actividade que se estaba a desenvolver desde a Administración Pública Galega nun negocio.

A CIG-Administración traslada o seu apoio á loita do persoal do Centro de Educación Especial Terra de Ferrol

begonha.carballo — Tue, 09 Nov 2010 19:05:02 +0100

A continuación reproducimos o comunicado feito público pola CIG-Administración de Ferrol:

A Executiva comarcal de CIG Administración Pública de Ferrol quere mostrar a súa solidariedade e apoio á loita dos traballadores e traballadoras do Centro de Educación Especial Terra de Ferrol, contra a privatización e pala defensa dos seus postos de traballo.

Tomamos a decisión de enviar aos nosos servizos xurídicos a Orde do día 29 de outubro na que se contrata a xestión da atención residencial e diurna para persoas con discapacidade intelectual. Unha orde de tramitación urxente, con prazos mínimos e sen garantía provisoria, que ten toda a aparencia de encubrir a concesión a unha empresa privada amiga para que faga o negocio co futuro dos nosos discapacitados/as.

Asistimos á apropiación polo empresa privada dun espazo e usos públicos no que o Partido Popular dá un paso cualitativo e pasa a mans privadas a parte asistencial das persoas discapacitadas maiores de 21 anos, e deixa sen ocupación aos empregados/as públicos.

É o mesmo caso que se anuncia para as oficinas do Igape no estranxeiro, cedidas a unha asociación patronal ou, na nosa cidade, as instalacións da casa do Mar, cedidas a unha asociación asistencial.

Estamos diante dunha actitude de eliminación permanente de servizos públicos e de converter a actividade que se estaba a desenvolver desde a Administración nun negocio. Así se fixo co servizo de comedores escolares, despedindo a traballadoras/es eventuais, ofrecendo o negocio a 'catterings' privados e abandonando a poboación escolar de Moeche, As Somozas, Cerdido, Mañón e outros concellos da nasa comarca; negándose a cubrir as demandas dos pais e nais do Colexio Atios de Valdoviño, a pesar de ter un posto de traballo creado e a unha traballadora sen posto asignado, nunha manifestación de malgasto da fondos públicos.

Os traballadores e traballadoras do Terra da Ferrol teñen todos os motivos do mundo para estaren preocupados pola súa estabilidade e o seu futuro laboral, vendo como esta Administración decide trasladar con carácter forzoso ao persoal de cociña saltándose o previsto no Convenio e actuando nos organismos sen ningún ánimo negociador, impoñendo a súa vontade. As consecuencias legais de todo isto veranse no futuro.

O Partido Popular ten atopado a fórmula para desmantelar os servizos públicos, con unha estratexia que desde logo non ten nada de oculta. A paralización de toda a administración autonómica é palpábel, non hai máis que ver o DOG, convertido día a día nun raquítico boletín que volve ter contidos mínimos que non se daban desde os primeiros anos 80, ao principio da autonomía. Logo, cunha hábil campaña a través de algúns medios amigos, minusvalorízase o público e véndese a idea de privatizar. Por último, aparecen empresas xestoras cuxas características e fins podemos ver en sumarios coma o Gürtel.

En Ferrol temos casos escandalosos, como que as persoas que solicitan unha minusvalía teñen que agardar máis de 18 meses para ser atendidas, con só un equipo de valoración para máis de 150.000 persoas (a media son de 6 a 9 meses de espera no resto de Galiza). Hai servizos que non dan chegado á cidade aínda que necesitarían unha dotación mínima. Pola contra, vanse gastar 600,000 € en reformas interiores dun edificio, o da Xunta de Galiza na cidade, que ten menos de dez anos de funcionamento.

Agora cedemos para o negocio privado a atención ás persoas discapacitadas psíquicas. A mentira e o engano preceden tamén a este atropelo. O mesmo Diego Calvo, en entrevista con este sindicato ao principio do seu mandato, asegurábanos que, en todo caso, as privatizacións nunca afectarían a centros e instalacións existentes.

Todo indica que o seguinte obxectivo da especulación vai ser o centro de maiores de Caranza. É necesario, pois, a unidade dentro dos colectivos laborais e ampla difusión entre a cidadanía do que nos estamos a xogar.

Esther Leira Penabad

Secretaria Comarcal de CIG-Administración