A Consellaría de Traballo vén de desestimar a solicitude do ERE de exitinción de contratos solicitado por Rodiñas Milladoiro porque “non se consideran suficientemente acreditadas as causas económicas, técnicas e produtivas alegadas”. Con esta resolución, a administración dá a razón á CIG, que en todo momento defendeu que a empresa era viábel e denunciou a pretensión do Grupo de eliminar a 15 traballadores para substituílos por outros en condicións precarias.

A semana pasada remataba sen acordo o período de consultas para o ERE extintivo presentado polo Grupo Rodiñas na planta de Milladoiro. ERE que suporía a eliminación de 15 postos de traballo e que deixaría este centro de traballo con tan só 6 traballadores de almacén. CIG-Metal considera que as causas económicas alegadas pola empresa non estarían xustificadas e que detrás agóchase a intención do Grupo de substituír aos traballadores fixos por outros en precario. A decisión da Autoridade Laboral podería coñecerse xa no decurso desta semana.

O Grupo Rodiñas, dedicado á produción de ferralla e outros materiais para construción, vén de presentar un ERE de extinción no centro de traballo do Milladorio, que afecta a 15 traballadores. Para manifestar a súa oposición a esta decisión, que segundo a documentación presentada non estaría abondo xustificada, a federación de Metal da CIG de Compostela celebraba hoxe unha concentración ás portas da nave da empresa, ás 13:00 horas, coincidindo co remate da quenda da mañá, na que participou practicamente todo o cadro de persoal.