A CIG-Ensino esixirá, na Mesa Sectorial do vindeiro 31 de xaneiro, a convocatoria da oferta de emprego público, unha convocatoria absolutamente necesaria para manter a atención educativa nos centros e para crear emprego. A conxelación da oferta significaría que non se cubrirían as xubilacións que se están a producir neste curso, sumadas ás que xa se produciron o ano pasado e que non foron cubertas, o que se traduciu nun déficit de máis de mil docentes no mesmo inicio do curso.

A CIG-Ensino volveu denunciar que a Consellaría de Educación continúe sen convocar a Mesa Sectorial docente para tratar a oferta de emprego público, varios días despois de que o Conselleiro utilizase este tema propagandisticamente. Así mesmo, a Federación aclarou que vai demandar que, como mínimo, unha parte da proba de acceso se realice na nosa lingua “como mellor forma de garantir que o profesorado que acceda á función pública en Galiza reúna a formación necesaria para cumprir o establecido en materia lingüística”.

A CIG-Ensino lamentou a actuación do Conselleiro de Educación, quen o pasado mércores anunciou nun acto propagandístico que a Xunta sacará o próximo mes de marzo unha oferta de emprego público con prazas para infantil e primaria. Dende a Federación do Ensino da CIG emprazaron ao Conselleiro a convocar a Mesa Sectorial, xa que este é o órgano de representación lexítima do profesorado e o lugar onde corresponde informar e negociar a oferta de emprego.

O Tribunal Superior de Xustiza de Galiza vén de confirmar a sentenza do Xulgado do Contencioso Administrativo nº 1 de Ourense pola que, acollendo as teses da avogada da CIG de Verín, anulou unha praza de Conserxe no Colexio Laureano Prieto da Gudiña e unha praza de Vixiante Municipal de Obras e Servizos, adxudicadas ambas polo alcalde do concello en febreiro de 2008, segundo afirman desde a CIG de Verín, “violando o dereito á liberdade sindical e, por extensión, limitando os dereitos de todos/as os traballadores/as a optar en pé de igualdade cos adxudicatarios”.