Máis de 2.000 rapaces e rapazas percorreron as rúas de Compostela nunha nova edición do Correlingua baixo o lema “Galego, a chave do mundo”. A carreira rematou cunha festa final conducida polo actor Pepe Penabade e a lectura do manifesto gañador do Correlingua, que correu a cargo do alumnado do IES Antón Fraguas. A actuación musical de Monoulious Dop, banda gañadora do concurso Cantalingua, pechou o acto.

O Consello de Europa vén de dar a coñecer un relatorio sobre a aplicación en Galiza da Carta Europea das Linguas Rexionais ou Minoritarias, no que critica con contundencia a “redución gradual” do ensino en galego “en todos os niveis” e lembra que a obriga dos poderes públicos é garantir liñas educativas nucleadas no idioma propio de Galiza. Dende a Mesa pola Normalización Lingüística lamentouse que este relatorio “non se coñecese antes das eleccións”, pois “demostra de forma palpábel que existe unha distancia enorme entre a propaganda do equilibrio lingüístico que vende Feijóo de forma falaz e a dura precariedade en que se encontran os dereitos das e dos falantes de galego”.

A Mesa pola Normalización Lingüística vén de presentar os “máis que alarmantes” datos dun estudo sobre o uso do galego na educación infantil nas sete cidades galegas. Segundo estes datos, só 3,19% dos centros imparten ensino en galego, un 1,06% manteñen dúas liñas diferenciadas (unha en galego e outra en castelán) e un 4,96% dos centros responderon que “dan a metade en galego e a metade en castelán”, aínda que en varios deles o idioma propio de Galiza só se utiliza na oralidade, realizándose toda a lectoescritura en castelán ou, mesmo, en inglés.

Na educación infantil das sete cidades galegas (até os seis anos) a presenza da lingua propia do país “decaeu de forma notoria nos anos de goberno de Alberto Núñez Feijóo”, segundo denuncia a Mesa pola Normalización Lingüística. A entidade calcula que este descenso está mesmo por debaixo do 10% e alerta de que “unha posición tan residual da lingua propia nas áreas máis poboadas de Galiza e nas idades máis temperás pon en risco a cohesión social de Galiza e o futuro da nosa cultura”.

"Acosados, discriminados e excluídos”. Así é como se senten Brais Fernández Prieto, Carmen Ferreiro Seoane e Manuela Arias Estévez, os tres traballadores da Capitanía Marítima de Burela que na tarde do 6de maio compareceron ante os medios para denunciaren a situación de acoso laboral á que se ven sometidos por parte dos seus superiores desde que hai cinco meses e medio lles solicitaron que se cumprise a lexislación en materia lingüística. Estas tres persoas, tal e como explicaron aos medios de comunicación, están collendo baixas “que os nosos médicos non dubidan en informar como transtornos de ansiedade provocados pola situación de acoso laboral”.

Paul Bilbao, director de Behatokia, o Observatorio de Dereitos Lingüísticos do éuscaro, e Carlos Callón, presidente da Mesa pola Normalización Lingüística, coincidiron en sinalar á administración do Estado como a que máis vulnera os dereitos lingüísticos dos falantes de linguas cooficiais.

A Mesa pola Normalización Lingüística e a Concellaría de Normalización Lingüística do Concello da Coruña veñen de facer balance dos primeiros dez meses de funcionamento no ámbito municipal da Liña do Galego. Un servizo coordinado pola Mesa que ten como obxectivo velar polos dereitos lingüísicos da cidadanía, que se pode dirixir á asociación para lle facer chegar consultas sobre cales son estes dereitos, queixas no caso de que sexan vulnerados e mesmo enviar parabéns a aquelas empresas que deron pasos na inclusión do galego.