As seccións sindicais da CIG, ELA, CCOO, UGT e FITC compareceron este mediodía ante os medios de comunicación para denunciar os despedimentos que a dirección do Banco Pastor está a realizar nas oficinas de todo o Estado, con especial incidencia na Dirección Rexional Galiza-Sur. Até o momento, a entidade xa despediu a cinco empregados/as na Galiza, cunha antigüidade media na empresa de 25 anos, alegando problemas de actitude e falta de cumprimento de obxectivos, mais recoñecendo a improcedencia da súa decisión.

O 5 de marzo tivo lugar unha rolda de prensa convocada para presentar a campaña do 10 de marzo, en defensa das pensións e para a posta en andamento de políticas alternativas fronte a crise, e contra a reforma laboral e o aumento da idade da xubilación, e a manifestación do 10 de marzo, Dia da Clase Obreira, que percorrerá Vigo nesa data ás 20 da tarde. Participaron o secretario comarcal da CIG de Vigo, Serafín Otero, e unha representación da Executiva Comarcal.

A forte presenza policial impediu que os traballadores/as de Seaga levasen a cabo as accións de protesta que tiñan intención de realizar en cada delegación provincial da Xunta e na Consellaría do Medio Rural, que se concretarían en encerros nos edificios. Non obstante, o desproporcionado número de axentes presentes nas delegacións fixo inviábel levar adiante as protestas a través das que o persoal quere reiterar as denuncias sobre a súa precaria situación laboral, a incerteza sobre o futuro da empresa de servizos agrarios e demandar explicacións ao Goberno galego de por que está asignando a empresas privadas as tarefas forestais que até o momento viña realizando persoal de Seaga.

Baixo a consigna “polo mantemento do emprego en Sykes, non aos despedimentos, non á deslocalización”, preto de catrocentos traballadores e traballadoras da multinacional do telemárketing participaron nos paros de dúas horas convocados en contra das intencións da empresa de desfacerse de máis da metade do seu persoal. Durante o paro da mañá, que se volveu repetir na quenda de traballo da tarde, traballadores/as e delegados/as sindicais desenvolveron unha manifestación que partiu dende ás portas de Sykes até as oficinas que Vodafone ten situadas en Agrela, dificultando a circulación do tráfico en boa parte do polígono industrial.

Delegados e delegadas da CIG mantiveron esta mañá un peche na oficina do Servizo Público de Emprego de Ferrol e da delegación territorial da Xunta para denunciar a situación socioeconómica da comarca de Ferrolterra, a proposta de reforma laboral e das pensións anunciadas polo Goberno, así como a actitude mantida por CCOO e UGT diante desta situación, actuando como cómplices das tentativas de recortar os dereitos da clase obreira e apoiando a perda do poder adquisitivo dos salarios.

O Goberno local de Ferrol comprometeuse diante do Pleno a iniciar os trámites para rescatar a concesión das instalacións deportivas, nestes momentos en mans de dúas empresas. Así o asegurou o concelleiro de Deportes, Manuel Santiago, en resposta as preguntas presentadas polos edís de EU e do BNG. Durante a sesión plenaria tamén participou Rocío Doce, da CIG-Servizos, quen pediu explicacións ante a lentitude do Concello á hora de mediar, máis despois dos compromisos adquiridos nos anteriores plenos de decembro e xaneiro e na Xunta de Portavoces, nos que se acordou pechar as instalacións en solidariedade co persoal até o remate do conflito; incumprido tras a apertura da piscina de Caranza. Mentres, sindicatos e patronal desenvolven este venres unha xuntanza, coa mediación da Consellaría de Traballo, para tentar desbloquear o conflito e retomar a vía da negociación.