Os traballadores e traballadoras da Fundación USC Deportiva foron á folga novamente este mércores, día 25 de maio, das 10:00 ás 13:00 horas e das 18:00 ás 21:00 horas, ao igual que fixeron a semana pasada. Demandan da dirección da fundación información dos contidos do plano de viabilidade que prevé pór en marcha o organismo e que, polo que saben, implicará unha redución de traballadores e de actividades deportivas. Denuncian que tras da xuntanza do pasado 18 de maio, nin a Fundación nin o reitorado abriron canles de diálogo que permitiran desbloquear o conflito.

Os traballadores e traballadoras da Fundación USC Deportiva foron na xornada deste xoves á folga ao non chegar a concretarse ningunha das súas demandas na mesa de negociación celebrada onte. A folga levouse a cabo entre as 10:00 e as 13:00 horas e continuou pola tarde, entre as 18:00 e as 21:00 horas. Alén diso, concentráronse na Praza do Obradoiro, diante do reitorado da Universidade de Santiago, para exixir que a fundación informe dos contidos do plano de viabilidade que prevé unha redución de traballadores e de actividades deportivas.

A CIG-Servizos vén de informar da suspensión da folga convocada na Fundación USC Deportiva para mañá, mércores 11 de maio, logo de que o novo xerente da Fundación acordara, como primeira medida, convocar a mesa de negociación coa representación do persoal. A xuntanza terá lugar o vindeiro xoves, 12 de maio.

A CIG e os traballadores da Fundación USC Deportiva veñen de convocar un paro parcial os días 11, 13 e 19 de maio e unha concentración diante do reitorado da Universidade de Santiago ás 11:30 horas deste mércores para reclamar da Universidade e da Fundación a creación dunha mesa de negociación para avaliar o plano de viabilidade que se está a deseñar e que, segundo as escasas informacións das que dispoñen, implicaría a extinción de postos de traballo e de actividades deportivas.