A Dirección de novacaixagalicia (entendendida como a Caixa de Aforros xa sen actividade comercial) anunciou  que a participación no Banco da Caixa, reducida ao 6,84% pola negociación entre o Banco de España e os Fondos norteamericanos encabezados por José María Castellano, faría inviable a Obra Social e os 335 postos de traballo. Foi o remate dunha semana de escándalo.A CIG, ten convocado mobilizacións para esixir a paralización do proceso de privatización da entidade e unha fonda investigación ante a escandalosa actuación dos ex-directivos, directivos actuais, Banco de España e Xunta de Galicia.

Delegados e delegadas da CIG concentráronse esta tarde diante das portas do Pazo de Exposicións e Congresos da Coruña (Palexco), onde tivo lugar a Asemblea Xeral de Novacaixagalicia na que se aprobou o traspaso do negocio financeiro da caixa ao novo banco. Con esta protesta a CIG, que votou negativamente cada un dos puntos da orde do día da Asemblea, quixo amosar novamente o rexeitamento á privatización da caixa galega, a perda de soberanía financeira que supón e denunciar o custe laboral que este proceso está tendo para os traballadores e traballadoras, xa que implica a destrución de 1.700 empregos.

Tal e como anticipou a federación de Banca da CIG, a proposta presentada pola dirección de Novacaixagalicia para o acordo de traspaso ao banco non garantía o emprego nin contiña compromiso de non aplicar medidas traumáticas; non garantía as retribucións brutas anuais e a calidade das mesmas. CIG-Banca denuncia ademais que a empresa non facilitou ningún tipo de información da establecida legalmente.

CIG-Banca vén de cuestionar as declaracións da conselleira de Economía, Marta Fernández Currás, que dixo entender as rebaixas salariais anunciadas por novacaixagalicia como parte do plan de recapitalización que lle exixe o Banco de España, que inclúe un aforro de custos. Para a CIG-Banca resulta incoherente esta comprensión cos recortes nos salarios dos empregados e empregadas da caixa cando hai apenas 6 meses a Xunta de Galiza autorizou un incremento salarial para os directivos.