A CIG vén de demandar, en rolda de prensa, a retirada do anteproxecto de Lei de Racionalización e Sostemento da Administración Local e da taxa de reposición de efectivos que impide a contratación de persoal nas administracións públicas. O secretario xeral, Suso Seixo, alerta de que esta Lei pretende a recentralización do Estado, reforzando as competencias das deputacións, e abrir á empresa privada o negocio dos servizos públicos que prestan os concellos. Ante isto, Antonio López, responsábel do sector local da CIG-Administración advirte de que os casos denunciados constatan que “a privatización alimenta a corrupción”.

CIG-Saúde denuncia a privatización da xestión das Incapacidades Temporais (baixas médicas) e o recorte de dereitos que isto supón, potenciando a burocratización do traballo das e dos médicos de Atención Primaria e xeneralizando a presunción de fraude por parte das traballadoras e traballadores.

A Plataforma Galega en defensa dos Servizos Públicos convoca unha concentración para este martes, día 26 de febreiro, ás 12:00 horas, diante do Parlamento de Galiza. Con esta mobilización que coincide coa votación dos orzamentos da Xunta de Galiza para 2013, aos que queren manifestar o seu máis rotundo rexeitamento. Denuncian que poñen en perigo os servizos públicos, promoven a supresión e despedimento de persoal e deterioran as súas condicións laborais e económicas.

O persoal do SERGAS desenvolveu nas últimas semanas unha campaña de mobilizacións para denunciar que os recortes previstos nos Orzamentos da Xunta para 2013 provocarán a deterioración da sanidade pública galega e das condicións laborais e salariais do seu persoal. A secretaria nacional de CIG-Saúde, María Xosé Abuín, advirte de que con estas medidas non se trata de paliar a crise, senón de aplicar a folla de ruta que o Partido Popular puxo en marcha desde a súa chegada ao goberno da Xunta e que persegue, tal e como explica nesta entrevista, a súa privatización.

A CIG denuncia, logo de analizar os orzamentos da Xunta para 2013, que o Partido Popular non ten como obxectivo saír da crise, senón dar os pasos necesarios para modificar substancialmente -á baixa- as condicións laborais da maioría da clase traballadora, privatizar servizos até o de agora impartidos polo sector público, como educación e sanidade, e acabar co modelo de caixas de aforro, entre outros. Achegamos o documento elaborado polo Gabinete Técnico da central sindical que foi aprobado este luns pola Executiva Confederal.

O día 22 de xaneiro publicáronse no DOUE os anuncios de adxudicación doutros tres contratos de servizos informáticos da Axencia de Modernización Tecnolóxica (AMTEGA) da Xunta de Galiza por valor de 805.645€ (IVE excluído). Foron  PLEXUS S.L. e Altia Consultores S.A. as que se levaron as contratas deste gran sorteo da venta dos servizos públicos. Desta volta quedou fóra Indra Sistemas S.A., outra das compañías que xa case se pode considerar un departamento propio dentro da AMTEGA.

O goberno de Mariano Rajoy vén publicando, nas últimas semanas, toda unha serie de ordes ou borradores de ordes, que introducen medidas de recorte nas prestacións sanitarias, desde o (re)pago no transporte sanitario, ortopróteses ou produtos dietéticos, até o aumento do número de medicamentos excluídos ou o pagamente daqueles que son de uso hospitalario para doentes que seguen o tratamento no seu domicilio. A CIG-Saúde denuncia que se trata dun imposto á enfermidade, e que “o PP cébase con aqueles colectivos máis desfavorecidos, máis enfermos, con patoloxías máis graves e con menos recursos”.