A CIG-Administración cualifica de “indignantes” as recentes declaracións televisivas do voceiro do Partido Popular, Antonio Rodríguez Miranda, nas que intentaba transmitir a idea de que os empregados/as públicos son uns privilexiados que se están a mobilizar por dereitos dos que non gozan o resto dos cidadáns, “sumándose a campaña do PP que pretende xustificar os recortes aos empregados/as públicos/as e o abandono dos servizos públicos polo gasto que se xera na Administración”.

Delegados e delegadas dos servizos centrais da Xunta de Galiza concentráronse no edificio administrativo de San Caetano, en Compostela, para manifestar a súa protesta “polo menosprezo da administración galega no exercicio das nosas funcións, legalmente recoñecidas”.  Con esta concentración denunciaban ademais que malia ter solicitado unha entrevista co propio presidente da Xunta de Galiza para manifestarlle a súa “indignación pola campaña de humillación contra a nosa figura”, nin sequera recibiron unha resposta.

A federación de Administración da CIG vén de remitir un escrito á nova conselleira de Facenda, Elena Muñoz Fonteriz, no que se lle solicita unha xuntanza “na que queremos que nos aclare cal vai ser o rumbo que vai emprender esta Administración en función dos posíbeis escenarios económicos que manexa”, segundo explican dende a central nacionalista. Neste senso, denuncian que a parálise na función pública galega é total, “non así no gabinete de prensa da Consellaría, que non para de facilitar información ambigua, que non aclara nada, senón que máis ben causa cada día máis inquietude no conxunto do colectivo de empregados públicos da Xunta de Galiza”.

No consello da Xunta celebrado onte, xoves 19 de xaneiro, anunciouse unha suba das taxas das escolas infantís do 19% que se fará efectiva a partir do vindeiro curso. Porén, a suba real é moi superior dado que aínda que o prezo por asistencia pasa do tope máximo de 110 euros mensuais a incrementarse até os 160 euros, o servizo por utilizar o comedor pasa de 33 euros até os 70 euros.

A CIG celebra que se denegara o Expediente de Regulación de Emprego solicitado pola empresa Estrella de Santiago, que xestiona, mediante concesión administrativa, as instalacións da Cidade de Vacacións Monte de Gozo, de titulariedade pública. A autoridade laboral considera que non hai motivos abondo e que o feito de que este non sexa ano Xacobeo non é unha causa conxuntural. A empresa solicitaba a suspensión dos contratos non só para este ano, senón para os seis anos que dura a concesión.

A CIG-Ensino considera que é un “despropósito” o nomeamento de Jesús Vázquez como conselleiro de Educación e Cultura. O secretario nacional de CIG-Ensino, Anxo Louzao, alerta da “grave involución”, que suporá para a Cultura galega dados os antecedentes que ten á fronte da consellaría de Educación e lamenta que se lle dea este "premio" como consolación por non ter conseguido un posto en Madrid que, afirma, “é ao que realmente aspiraba”.

A CIG-Administración, sector da autonómica, vén de denunciar a adxudicación dun contrato, negociado sen publicidade, por valor de 151.038 euros á corporación norteamericana Microsoft. Unha adxudicación que consideran que supón “seguir esgotando os cartos públicos”, en lugar de “apostar por unha austeridade que non dane os servizos públicos nin agrida ao persoal que os desenvolve” e que supón o incumprimento do compromiso do goberno galego de implantar o software libre.