As marchas de desempregados e desempregadas que percorreron Galiza desde Ferrol, A Coruña, Vigo, Pontevedra, Ourense, Lugo e Vilagarcía confluíron este domingo na Alameda compostelá. Entre aplausos e malia o cansazo acumulado, sumáronse aos milleiros de galegos e galegas que saíron en manifestación convocados pola CIG para percorrer as rúas da capital de Galiza até a praza da Quintana. Alí foi onde Suso Seixo, secretario xeral da CIG, anunciou que a central sindical promoverá unha grande mobilización, a finais de outubro, xunto con outras organizacións políticas e sociais do país, que se intentará facer confluír con convocatorias similares noutras nacións do estado, de cara a preparar, se é posíbel, unha nova folga xeral, mesmo a nivel do estado español.

As Marchas polo Emprego chegaron este sábado até as proximidades de Santiago de Compostela. Sigüeiro (Concello de Oroso), Milladoiro (Concello de Ames) ou o lugar da Lavacolla serán os puntos onde os grupos de desempregados e desempregadas que conforman as marchas organicen as últimas asembleas. Alí pasarán tamén a noite do sábado e xa na mañá do domingo retomarán o camiño para cubrir os derradeiros quilómetros antes de unirse á manifestación que ás 12 do mediodía partirá da Alameda.

Unha vez unificadas as distintas marchas que avanzan desde as cidades e vilas de Galiza cara Compostela, para participar na manifestación que sairá da Alameda compostelá, o vindeiro domingo día 3,de xullo, mañá farán a súa penúltima etapa. Recollemos as previsións de saída, chegada e os horarios de celebración das distintas asembleas.

Esquivando o cansazo acumulado, as pendentes do camiño e as elevadas temperaturas que abrasan o País, as marchas polo emprego que dende o mércores percorren Galiza continuaban este venres a bo ritmo. Ademais, un grupo de desempregados e desempregadas de Pontevedra sumábase a marcha que o xoves partiu de Vigo. O Secretario Xeral da CIG, que se achegou até a cidade do Lérez para apoiar a iniciativa, asegurou que nestes momentos resulta fundamental chamar a atención da cidadanía e pedir a solidariedade cos traballadores e traballadoras afectados pola falta de traballo. Mentres os e as participantes das marchas de Ferrol e A Coruña xuntaban os seus pasos para continuar o camiño até Ordes, onde pasarán a noite.

A Marcha Galega polo Emprego da CIG continúa a súa andaina cara Compostela. Ás que saíron onte de Lugo, Ourense e Ferrol incorporáronse, nesta segunda xornada, as de Vigo e A Coruña. Mañá sairán tamén as de Pontevedra e Vilagarcía. Son desempregados que camiñan cara Compostela para manifestarse o vindeiro domingo día 3 de xullo na capital de Galiza. Exíxenlle ao goberno central e ao goberno galego que non fagan pagar a crise aos traballadores/as e que se poñan en marcha medidas para frear a sangría do paro.

A Marcha galega polo emprego da CIG segue a sumar efectivos na súa segunda xornada. Hoxe incorporáronse á mobilización cara a Compostela parados e paradas da Coruña e de Vigo. O grupo máis numeroso, integrado por máis de 100 persoas, partiu da cidade olívica pouco antes das nove da mañá acompañado polo secretario comarcal, Serafín Otero, que percorreu xunto a eles os primeiros quilómetros. A mobilización da Coruña, na que tamén participa o secretario comarcal, Paulo Carril, contou coa presenza do secretario xeral da CIG, Suso Seixo, quen sinalou que con estas marchas preténdese chamar a atención sobre o gran problema que golpea nestes momentos a Galiza: o desemprego.

A Marcha Galego polo Emprego convocada pola CIG daba os seus primeiros pasos na mañá deste mércores coa saída das mobilizacións dende as cidades de Ferrol, Lugo e Ourense, de onde grupos de desempregados e desempregadas partiron cara a Compostela. Polo camiño, as marchas fixeron altos nos concellos de paso para concienciar a poboación ante o grande problema que supón o paro e exixir a aplicación de medidas que permitan o crecemento económico e a creación de emprego, fronte ás políticas neoliberais desenvolvidas até o momento. Mañá xoves sairán tamén as marchas de Vigo e A Coruña e o venres tocaralle a quenda á de Pontevedra.