A Unión Temporal de Empresas (UTE) que constrúe o novo hospital de Vigo comprometeuse hoxe a velar polo cumprimento das condicións laborais das distintas subcontratas que prestan servizo na obra, para o contará coa participación das organizacións sindicais. A decisión foi adoptada na primeira xuntanza da comisión de seguimento e control dos traballos que se constituíu despois de que a CIG-Construcción denunciase incumprimentos sistemáticos do convenio colectivo provincial.

Delegados e delegadas da CIG-Construción paralizaron hoxe as obras do novo hospital de Vigo para denunciar as condicións laborais que as empresas contratadas pola Administración impoñen aos seus empregados/as. Desde a central nacionalista anunciaron que permanecerán no recinto até que a Inspección de Traballo se comprometa a mediar para rematar cos incumprimentos en materia de xornada e salario que padecen os operarios/as.

A Secretaria da Mocidade da CIG considera insuficiente a medida que regulará a cotización dos bolseiros e bolseiras, que este venres aprobou o Consello de Ministros, xa que serán os propios traballadores e traballadoras os que se verán obrigados a facerse cargo de dita cotización. Dende a CIG-Mocidade laméntase, ademais, que non se teña aproveitado a ocasión para regular unha figura que, até o de agora, segue a estar á marxe da protección por non ter ningunha relación laboral contractual, “máis aínda cando se deixa fóra da proposta aos bolseiros e bolseiras sen contraprestación, e que, por tanto, traballan de balde”.

A federación da Construción da CIG critica a inoperancia da Inspección de Traballo diante da vulneración de dereitos laborais no sector. A central nacionalista constatou que a pesar das súas reiteradas denuncias os operarios que traballan na ampliación do aeroporto vigués de Peinador seguen a realizar xornadas de máis de 13 horas diarias. O sindicato realizou hai varios meses unha acción de protesta na terminal de Vigo no marco da campaña que está a desenvolver para reclamar mellores condicións nas obras que executa a Administración pública e agora vén de comprobar que a situación non mellorou.

CIG-Mocidade de Vigo iniciou o 13 de decembro unha serie de concentracións contra o consumismo e a explotación laboral no Nadal que leva por nome “Racha co consumismo, tamén é explotación laboral!”. A campaña está a ser difundida coa colada de 400 cartaces e co reparto de 3.000 follas informativas. CIG-Mocidade anima a non mercar os domingos e festivos e a deixar de acudir aos centros comerciais como unha forma de lecer.

A CIG vén de convocar concentracións simultáneas en todas as comarcas de Galiza para o día 7 de outubro, para denunciar a grave perda de dereitos que suporá para a clase traballadora a ratificación, por parte do Parlamento Europeo, das modificacións introducidas na Directiva de Tempo de Traballo. Unhas modificacións que contemplan, entre outros aspectos, a xeneralización da posibilidade de ampliar a duración máxima da xornada laboral até as 65 horas semanais ou a relaxación na obriga empresarial de compensar con descansos o traballo realizado a maiores.

A federación de Construción denuncia que a situación dos traballadores das obras do Tren de Alta Velocidade no tramo onde se produciu o accidente en setembro de 2007, é a mesma, ou se cabe peor que daquela. Aseguran que nestes momentos están a traballar en quendas de 12 horas continuadas e no momento de facer os empurres nos tramos do viaduto, as xornadas prorróganse moito máis.