A Fundación Moncho Reboira-Fesga presenta un traballo audiovisual que recolle a análise sobre o recente acordo de CCOO e UGT coa patronal de CEOE e CEPYME (“II Acuerdo para el empleo y la negociación colectiva”). Inclúe entrevistas con Xesús Seixo, secretario xeral da CIG, e Antolín Alcántara, secretario confederal de negociación colectiva da central.

A CIG manifesta a súa máis enérxica e rotunda oposición á cesión de CCOO e UGT ante as demandas da patronal, asinando un acordo polo que os incrementos salariais deixarán de calcularse en función do IPC como até o de agora. O secretario confederal de Negociación Colectiva, Antolín Alcántara considera que estamos “ante o maior ataque na historia aos salarios da clase traballadora”.

O Comité de empresa da Refinaría que Repsol Petróleo ten na Coruña amosaron este luns as súas inquedanzas polas consecuencias negativas que o pacto Sacyr-Pemex para facerse co control da petroleira podería supor no emprego e na continuidade da propia empresa. Dende o Comité denuncian a actuación dos “especuladores directivos” que permitiron cos seus votos favorábeis esta manobra coa que se pretende “tratar de roubar dun xeito sutil a tecnoloxía” de Repsol.