A Secretaría Confederal da Mocidade denuncia o uso fraudulento de bolsas para encubrir postos de traballo

begonha.carballo — Fri, 25 Nov 2011 10:47:40 +0100

Se no pasado mes de outubro se regulaba a cotización dos bolseiros/as que non perciben contraprestación económica, agora dáse un paso máis na precariedade que caracteriza a este colectivo a través dunha medida que supón a cobertura dun posto de traballo a cargo dun mozo ou moza que carecerá de relación laboral, que non terá dereito a paro, que tampouco cobrará un salario, pero que desempeñará as mesmas funcións que calquera outro traballador ou traballadora a cambio dunha remuneración do 80% do IPREM (uns 426€).

Dende a Secretaría Confederal denúnciase que co RD tampouco se regula a xornada, nin o horario nin as encomendas relacionadas co posto, nin se xustifica se as prácticas van supoñer unha mellora da súa empregabilidade. Porén o que si aparece recollido é que as empresas poderán beneficiarse de incentivos para levar a cabo esta práctica.

Esta medida supón que os mozos e as mozas poidan seguir traballando de balde entre 3 e 9 meses.

A Secretaría da Mocidade da CIG considera insuficiente a medida que regula a cotización dos bolseiros/as aprobada este venres

begonha.carballo — Fri, 21 Oct 2011 15:19:30 +0200

Esta medida xa foi incluída na reforma das pensións aprobada o pasado 27 de xullo e desde o pasado 2 de agosto, a Lei sobre Adecuación, Adaptación e Modernización do Sistema da Seguridade Social recolle que quen realizou prácticas de formación como bolseiro/a pode computar até un máximo de 2 anos deste período na carreira de cotización necesaria para ter acceso á xubilación. Unha vez publicado no BOE, a medida entraría en vigor o 1 de novembro.

A partires deste día, todas as persoas que fagan prácticas cotizarán á Seguridade Social, estando as empresas obrigadas a dalas de alta, sempre e cando reciban unha contraprestación económica. É dicir, os bolseiros e bolseiras terán dereito a cobrar a baixa por enfermidade ou a recibir indemnizacións por accidentes de traballo, mais non terán dereito ao desemprego e a recibir indemnizacións do FOGASA.

Aqueles traballadores/as que fixeran prácticas con anterioridade á data sinalada terán a opción de subscribir un convenio especial (até o 31 de decembro de 2012) que faga posíbel o cómputo de cotizacións polos períodos de formación realizados no pasado, até un máximo de 2 anos, debendo facerse cargo do ingreso das cotizacións. Neste caso, aplicaráselle un coeficiente do 0,77%.

O pasado 26 de agosto a través do Real Decreto de Medidas Urxentes para a promoción do emprego dos mozos, o goberno español xa impulsara medidas que, no canto de mellorar a empregabilidade da mocidade tomando como partida as necesidades laborais desta, o que fixeron foi impulsar a temporalidade e precarizar aínda máis o emprego da mocidade a través de figuras como o contrato lixo.

Por iso, explica a Secretaria da CIG-Mocidade, Margarida Corral, “a pesares de que poidamos valorar como positivo unha proposta relacionada con garantir a cotización de calquera persoa que desempeñe uns servizos, rexeitamos de xeito rotundo que sexa o propio traballador ou traballadora quen se teña que facer cargo da mesma, e máis aínda, que non se aproveite para regular unha figura que, até o de agora, segue a estar á marxe da protección por non ter ningunha relación laboral contractual. Máis aínda cando se deixa fóra da proposta aos bolseiros e bolseiras sen contraprestación, e que, por tanto, traballan de balde”.

Esta medida é, pois, unha mellora cativa que debe entenderse dentro do marco dunha política nefasta do goberno de cara á mocidade, sustentada, coma sempre, na situación de crise económica, unha crise que, a pesar de non ter orixe algunha no ámbito laboral, son as traballadoras e traballadores quen a están a pagar, e particularmente, a mocidade.

“Desde a Secretaría da Mocidade da CIG consideramos que as ultimas medidas aprobadas polo goberno español veñen a fondar aínda máis a xa de por si difícil situación que a xuventude está a atravesar. Non podemos deixar pasar desapercibidas unhas medidas que promoven a temporalidade, desregulan o mercado e afondan na desigualdade, no recorte de dereitos e a falta de estabilidade laboral”.

Por iso dende a Secretaria realizouse un chamamento á manifestación prevista para este domingo 23 de outubro, ás 12:30 horas na Alameda de Compostela, “porque consideramos que SI EXISTEN ALTERNATIVAS a este modelo e a estas políticas neoliberais, para unha mellor defensa dos intereses da mocidade e de toda a maioría social, da clase traballadora”.