Os traballadores e as traballadoras de ATENTO foron os galardoados na III edición do Premio do Día da Clase Obreira Galega, co que a CIG quere recoñecer a loita levada a cabo polo persoal desta empresa durante o ano pasado. O premio tamén pretende ser unha homenaxe a todos os/as traballadores/as do telemárketing, un sector especialmente precarizado e vítima constante dos procesos de deslocalización. Así mesmo, fíxose unha especial mención a labor desenvolta polas seccións sindicais de Cedonosa, Ingemarga e Ferroatlántica.

O sábado 24 de xaneiro unha nova mobilización percorreu as rúas de Catoira contra o peche da fábrica de cerámica Cedonosa, para oporse á decisión da dirección da empresa de pechar as súas portas a finais de mes. De novo centos de persoas reclamaban o mantemento dos postos de traballo, que son vitais para moitas familias desta vila pontevedresa, e reclaman "un investimento real" na factoría, "porque a viabilidade desta fábrica está máis que demostrada e non podemos permitir que se peche e que se destrúa emprego desta maneira".

Máis de 1.500 persoas mobilizáronse o domingo 12 de outubro desde as doce da mañá en Catoira contra o expediente de regulación de emprego exposto pola dirección da fábrica de cerámica de Cedonosa situada neste concello pontevedrés. A mobilización estaba convocada polo Comité de empresa, CIG, CCOO e UGT, e contou co apoio masivo do pobo de Catoira, que volveu encher as rúas desta vila en defensa dos postos de traballo e pola viabilidade desta empresa.

O venres 12 de setembro os traballadores e traballadoras de Cedonosa de Catoira volvían saír as rúas para berrar contra os despedimentos e coa situación que veñen arrastrando desde abril, mes desde o que o persoal se reduciu un 32%. Desde este momento paralizouse un forno e Cedonosa deixou de producir 150.000 metros cuadrados de gres entre as factorías de Teruel e Catoira.

O 3 de setembro tivo lugar unha reunión do Comité de empresa e das centrais sindicais (CIG-CCOO-UGT), para avaliar o proceso do concurso de acredores, o expediente de regulación de emprego (ERE) e a situación actual pola que está a atravesar a planta de Catoira. Os traballadores e traballadoras comezaron unha serie de mobilizacións contra a destrución de postos de traballo e pola viabilidade desta factoría

Cedonosa atópase no concurso de acredores ordinario que se está a levar no Xulgado do Mercantil nº1 de Pontevedra. Dentro deste procedemento a empresa solicitou a extinción de 26 contratos e a conversión de 11 en fixos descontinuos. Por parte do Xulgado instouse as partes a que tal e como establece a lei concursal se iniciara o período de consultas para negociar de boa fe un acordo do ERE.

O xoves 22 de maio os traballadores e traballadoras de Cedonosa concentrábanse ás portas da fábrica para protestar pola subministración eléctrico e reclamar que, coa volta da luz, a factoría puidese volver a traballar. Ían manter as concentracións todos os días, mais esa mesma tarde Fenosa conectou esta instalación de novo á rede eléctrica.