A substituta do Xulgado do Social número 2 de Vigo decidiu hoxe adiar até o vindeiro 3 de setembro o xuízo pola denuncia presentada pola CIG contra a decisión de Asientos de Galicia de introducir no convenio colectivo unha categoría laboral inferior ás establecidas no centro de traballo. Dende a central nacionalista argumentan a súa decisión no feito de que a nova categoría representa unha perda salarial de arredor de 250 euros ao mes. Un grupo de delegados/as da automoción da CIG realizaron unha concentración fronte ao edificio xudicial para reclamar a equiparación salarial e convenios dignos no sector.

Arredor de medio cento de delegados e delegadas da CIG en empresas da automoción concentráronse esta mañá diante da sede da Xunta de Galiza en Vigo para rexeitar a autorización masiva de Expedientes de Regulación de Emprego no sector sen que existan razóns obxectivas. Dende a Coordinadora do Automóbil da central nacionalista instan á Administración autonómica e á Inspección de Traballo a velar polos intereses dos traballadores/as e impedir que se sigan a utilizar fondos públicos na aplicación dos EREs.