Confraría de Barallobre

A FGAMT-CIG alerta da “desfeita total” dos bancos marisqueiros de Ferrol e a gravísima situación dos traballadores/as

begonha.carballo — Thu, 13 Dec 2012 14:39:13 +0100

Así o denunciaba Joam Ferreiro, da executiva comarcal da FGAMT-CIG e biólogo da confraría de Barallobre, que este xoves compareceu en rolda de prensa xunto co secretario da Federación en Ferrol, Alexandre Romero e o co-responsábel comarcal da CIG en Ferrol, Xesús A. López Pintos. Ferreiro lembrou que, alén dos incumprimentos dos prazos para a instalación de depuradoras na ría (que continúa sendo a máis contaminada do país), a Consellaría decidiu o pasado ano (coa escusa da crise) suspender os plans de dinamización que combinaban a actividade extractiva con tarefas de limpeza e rexeneración, e que permitían aos traballadores/as do mar percibir uns ingresos dignos.

Como alternativa e estes plans, apunta Ferreiro, a Consellaría puxo en marcha as famosas bateas depuradoras intensivas, “un proxecto que nunca funcionou e que se puxo en marcha sen consultar cos mariscadores e mariscadoras”. De feito, as denuncias do colectivo sobre a elevadísima mortalidade do marisco neste dispositivo son reiteradas, xa que a deficiente depuración provoca que o molusco teña que pasar moito tempo na batea, chegando a acumularse tan só nun mes até 13 toneladas de ameixa babosa.

Ademais, esta acumulación fai que saia gran cantidade de marisco ao mercado provocando unha caída no seu prezo e nestes momentos págase o quilo de ameixa babosa a cinco euros, pero hai uns días estaba a só dous euros. Unha situación que resulta máis preocupante porque coincide coas datas do nadal, nas que as vendas adoitan incrementar e soe ser o mes que “levanta” o volume total de ingresos dos mariscadores/as.

Desfeita dos bancos e privatización da ría

A magnitude da problemática é tal que mesmo os bancos de libre marisqueo, só abertos durante seis meses ao ano, levan 14 meses abertos, sen control do furtivismo e xa están “esquilmado”. “Só nos queda o banco das Pías e o marisco que se extrae non se da depurado”, aseverou Ferreiro.

Dende a central nacionalista fálase de “situación total de miseria” e apúntase a que a “desfeita dos bancos” estaría enmarcada nunha política xeral da Xunta destinada a facer desaparecer o sector marisqueiro como tal e avanzar no camiño da privatización da ría, “acusando primeiro aos mariscadores/as de que non son capaces de xestionar os recursos para chegar finalmente a unha privatización”.

Nesta liña, Ferreiro criticou o desinterese da Xunta por solucionar os problemas da ría, e lembrou que todas as medidas positivas que adoptou a administración nos últimos anos foron propostas que partiron as propias Confrarías. Lamentou tamén que a día de hoxe a Consellaría de Medio Ambiente non teña dado resposta ao proxecto presentado polos mariscadores/as o pasado mes de abril para combinar a actividade extractiva coas tarefas de limpeza e rexeneración da ría, e garantir deste xeito uns ingresos mínimos para os traballadores/as, que se atopan nunha situación realmente precaria.

Os mariscadores/as da Ría de Ferrol dispostos a irromper na campaña electoral ante a situación límite na que se atopan

begonha.carballo — Wed, 19 Sep 2012 19:37:05 +0200

Así o anunciaron este mércores os representantes de ambas confrarías, acompañados polo co voceiro da CIG de Ferrol, Xesús López Pintos, e o Secretario Comarcal da FGAMT-CIG, Alexandre Romero, nunha rolda de prensa para denunciar a situación límite á que teñen chegado moitos mariscadores/as e que ameaza mesmo coa continuidade da actividade marisqueira e as propias confrarías.

Unha vez máis, púxose de manifesto a inoperatividade das bateas depuradoras instaladas na ría, na que se están a rexistrar unha elevadísima mortalidade do molusco, que combinada cos prolongados períodos que o marisco ten que pasar depurando e o baixo prezo de venda, provocou que moitos profesionais prefiran xa non saír a faenar.

Ademais, denunciouse o incremento do furtivismo “mentres a Consellaría mira para outro lado. Hai 500 familias en situación límite e en catro ou cinco meses, de non darse unha solución, as confrarías poderían pechar por falta de ingresos”, advertíase na rolda. Neste senso, tamén se apuntou ao “escurantismo” que rexe no departamento dirixido por Rosa Quintana, xa que se nega a achegar datos sobre o custe real das bateas depuradoras, “aínda que está demostrado que son un fracaso e un sistema non rendíbel”, afirmou o responsábel comarcal da CIG.

“A xente leva máis de dous meses en que non conseguen nin cubrir gastos”, criticou Pintos, quen fixo un chamamento urxente á Xunta para que asuma o compromiso adquirido no marco da Mesa de Dinamización de financiar as actividades para a rexeneración e recuperación da ría, mentres non estea concluído o saneamento integral das augas.

Do mesmo xeito, lamentou que dende o pasado mes de maio non se teña convocado a Mesa de Dinamización para avaliar a situación da ría e do colectivo de traballadores/as do mar. Ante esta situación, e se no prazo de unha semana non se recibe contestación por parte da Xunta, o colectivo xa advertiu que irromperá na campaña electoral con mobilizacións de diversa índole.

Os mariscadores/as de Ferrol advirten da crítica situación pola alta mortalidade do molusco e o baixo prezo de comercialización

begonha.carballo — Thu, 13 Sep 2012 14:54:08 +0200

O co-voceiro da CIG de Ferrol, Xesús Anxo López Pintos, explicaba as dificultades económicas que padecen os mariscadores e mariscadoras da ría de Ferrol, debido a que nestes momentos máis do 20% do marisco depositado nas bateas de depuración (instaladas a causa da cualificación como zona C de moitas áreas da ría) está morrendo no proceso. A isto hai que engadir a escasa rendibilidade da actividade extractiva provocada pola baixada do prezo dos moluscos (o quilo de ameixa babosa págase a 3.5 euros, cando no mercado se vende a 18 euros).

“Estas circunstancias provocan unha baixada dos ingresos e a moitos mariscadores/as xa só lles dá para pagar as cotas á Seguridade Social, pero para nada máis”, advertía.

Dende o colectivo acusouse á Xunta de Galiza polo abandono aos que os ten sometido, xa que, a pesar das demandas do sector, o Goberno galego nin sequera convocou a Mesa de Dinamización (con representación de organizacións sindicais, de mariscadores/as e administracións de diferente ámbito) dende o pasado mes de marzo.

Naquela última reunión, o propio conselleiro de Medio Ambiente chegou a un acordo co colectivo de traballadores/as para que presentasen un plan de traballo de limpeza e rexeneración da ría que sería financiado polo departamento autonómico mentres non estea concluída a rede de depuración. “Os/as mariscadores/as presentaron o plan, que supuña alternar días de extracción con días de tarefas alternativas, pero até o momento non se sabe nada, e dende a Xunta descúlpanse con que xa instalaron as bateas depuradoras”, sinalou Pintos.

Neste senso, o co voceiro da CIG de Ferrol rexeitou a desidia da Xunta diante dos elevados índices de contaminación das augas, criticando que “en vez de favorecer os traballos para mellorar a ría, prefira mirar para outro lado” pondo en perigo a continuidade da actividade produtiva para 500 familias. Cómpre lembrar que a depuración da ría estaba comprometida para o ano 1996, pero a día de hoxe non se agarda que estea rematada até o 2015.

Falta de pagos e furtivismo

A precaria situación destes/as profesionais, puntualizaron, agudizouse nas últimas semanas, porque a Consellaría do Mar non paga á empresa que se encarga do reparqueo do marisco, e esta hai dous meses que non abona o salario dos seus traballadores/as, que ante esta situación tamén se negan a traballar.

Xunto a isto, os mariscadores e mariscadoras alertaron do incremento do furtivismo, que non só afecta aos moluscos con tamaño adecuado para comercializar, senón que agora os furtivos/as comezan a recoller cría que transportan e venden nos parques das Rías Baixas.

“Actitude mafiosa”

Durante a comparecencia, denunciouse tamén a “actitude mafiosa” amosada pola Consellaría do Mar para disuadir aos traballadores/as do mar e impedir que fagan denuncias públicas da súa grave situación. A crítica viña a colación do acontecido a un mariscador que logo de aparecer nos medios denunciando a elevada mortalidade do marisco nas bateas, veu como, aos poucos días, a administración lle decomisaba os aparellos que ten para saír traballar.

O afectado puxo denuncia no xulgado e na Inspección Pesqueira e finalmente devolvéronlle unha parte dos apeiros, mais en condicións inservíbeis, polo que non pode saír traballar. O deputado do BNG, Bieito Lobeira, comprometeuse a levar a documentación sobre este caso á Consellaría, co obxecto de abordar os feitos, reclamar que lle devolvan todas as pertenzas ao traballador e evitar que se volvan repetir prácticas deste tipo.

Os/as mariscadores/as de Barallobre levantan o encerro no Concello de Fene logo de cumprirse un mes da protesta

begonha.carballo — Wed, 02 May 2012 18:23:21 +0200

O colectivo levantou o peche logo de que a principios desta semana comezaran a recibirse os pagos das primeiras facturas, correspondentes a outubro e novembro de 2011. Nos próximos días, segundo o compromiso da Consellaría, deberían abonarse todas as cantidades pendentes.

Durante este último mes, alén do peche, os traballadores/as do mar estiveron realizando diversas accións de protesta, como concentracións, cortes de tráfico ou caravanas reivindicativas, e denuncias públicas da dramática situación que viven moitas familias pola falta de pago da Consellaría. Mobilizacións que contaron co apoio da CIG de Ferrol.

Porén, os mariscadores e mariscadoras lembran as dificultades que padecen para poder realizar o seu traballo con garantías, xa que nin están solucionados os problemas coa batea de depuración nin se ten iniciado o saneamento integral da ría de Ferrol, unha das máis contaminadas do estado.

Os impagos da Consellaría do Mar deixan ao borde do desafiuzamento a unha familia de mariscadores/as de Barallobre

begonha.carballo — Fri, 20 Apr 2012 15:14:47 +0200

A situación é tan dramática, advirten, que mesmo xa hai unha familia que se atopa ao borde do desafiuzamento xa que avalaron coa súa vivenda a compra dunha embarcación e agora non poden facer fronte ao pago das cotas. A familia, na que todos os seus membros traballan no mar, debe uns 2.500 euros ao banco, que o vindeiro martes comezará os trámites para o embargo. Porén, a Consellaría adebédalle arredor de 5.000 euros.

Esta situación límite, explican dende a CIG de Ferrol, non é exclusiva dunha familia senón que nas próximas semanas poden aparecer outros casos similares, polo que urxiron á administración a facer efectivos os pagos nos próximos días.

A este respecto, durante a comparecencia, a central nacionalista trasladou todo o seu apoio e solidariedade ao colectivo de traballadores e traballadoras afectados e lanzou un chamamento á Xunta para que asuma a súa responsabilidade, e non antepoña “intereses escuros” ás necesidades destas familias. Neste senso, o Secretario Comarcal da FGAMT-CIG, ironicamente apuntou a “todos estes políticos monarcas apoltronados nos seus tronos que nós somos traballadores e traballadoras, non elefantes”.

Ao mesmo tempo, dende a Confraría de Barallobre reiteraron o seu descontento coa actitude da Xunta e advertiron que hai moitos/as traballadores/as con problemas para facer fronte non só ás cotas das hipotecas ou alugueiros, senón mesmo ao pago dos seguros sociais ou facturas der luz ou auga. Por iso, acusan as administracións de “irresponsabilidade”, ao non cumprir cos prazos estabelecidos para o saneamento da ría de Ferrol e a posta en marcha das estacións depuradoras para o tratamento das augas fecais.

Os elevados índices de contaminación da Ría, apuntan, provocan un grave prexuízo sobre o sector da pesca e o marisqueo, dificultando ditas actividades. Á degradación medioambiental sen resolver, engádese a supresión por parte da Consellaría do Mar do Plan de Dinamización da Ría “causando graves prexuízos que fan que non sexa viábel economicamente para as confrarías” o traballo.

Continúa o peche no Concello de Fene

Os mariscadores e mariscadoras de Barallobre continúan adiante co peche iniciado hai tres semanas nas dependencias do Concello de Fene para esixir á Consellaría de Mar que abone as contías adebedadas e solucións definitivas para o saneamento da ría.

Con tal motivo, o colectivo de traballadores/as tamén está realizando mobilizacións continuadas. Así onte celebraron unha concentración diante do Casa Concello de Fene e esta mesma tarde trasladarán as protestas até o edificio administrativo da Xunta en Ferrol. Alí farase tamén unha asemblea para decidir as próximos actuacións a levar adiante no caso de que a Consellería non abone en breve os atrasos pendentes polas tarefas de limpeza e rexeneración das zonas C.

Dende a Confraría denunciaron novamente que, aínda que de media a administración deba 60 xornais por mariscador/a, a Xunta só teña intención de pagar tres días do mes de outubro ao marisqueo a flote e 11 días ás mariscadoras a pé.

Así as cousas, a Confraría manterá o peche até que non teña certeza do cobro das facturas pendentes e datas concretas de cobro das mesmas, non exista unha solución sobre a viabilidade económica do proceso de reinstalación de moluscos na batea, e non se aborde en termos reais e verificábeis o saneamento da ría.

De igual xeito, se o próximo luns a Consellaría non efectivizou os pagos, o colectivo intensificará o ton das protestas, porque, aseveran, “a situación é desesperada”.

A FGAMT de Ferrol apoia ás mobilizacións contra a exclusión das mariscadoras a pé do Plan de Dinamización

begonha.carballo — Fri, 13 Jan 2012 15:13:54 +0100

Porén no Plan de dinamización, explica Alexandre Romero, secretario comarcal da FGAMT-CIG, a Consellaría si que mantén aos profesionais a flote da ría. Fronte a esta discriminación, as mariscadoras a pé comezaron unha campaña de mobilizacións para esixir da Xunta que as volva incluír no programa xa que, ademais, os bancos marisqueiros nos que traballan están clasificados, practicamente, ao 100% como Zona C pola alto grao de contaminación.

Esta circunstancia imposibilita o desenvolvemento do seu traballo e a participación no plan permitíalles percibir un salario por realizar tarefas alternativas de limpeza e rexeneración da ría.

A este respecto, dende a FGAMT-CIG de Ferrol lembráronse á Xunta os reiterados incumprimentos dos gobernos a respecto do saneamento e a recuperación integral da ría de Ferrol. “É moi sangrante que nesta época de recesión económica se envíen a máis de 50 mariscadoras a engordar as listas do paro e baixas na Seguridade Social polas propias administracións públicas”, denuncia.