Máis de 5.000 persoas maniféstanse en demanda de carga de traballo para o naval de Ferrol

paula.castro — Thu, 15 Mar 2012 14:59:22 +0100

Manel Grandal, voceiro da CIG de Ferrolterra e membro da sección sindical de Navantia, lamenta os escasos froitos obtidos nesta xuntanza. “O conselleiro deu largas e condicionou todo aos acordos aos que cheguen os presidentes da Xunta e do goberno central. Sabemos que hai moitas presións, para favorecer ao sector en Andalucía en detrimento de Galiza e aquí non van facer nada até que pasen as eleccións andaluzas. Pero o naval de Ferrol non pode agardar máis. Precisa garantías de futuro, porque iso é o que está en xogo: o noso futuro”.

Para garantir os máis de 17.000 postos de traballo directos e indirectos que dependen do sector precísase do financiamento do dique flotante. Do contrario, explica Grandal, os estaleiros non poderán seguir no mercado de reparación de buques de grande porte. Ademais precísase de carga de traballo urxente para o sector de aceiros e a implicación real dos gobernos para acadar novas contratacións.

Mentres os representantes dos traballadores se reunían co conselleiro, os traballadores cortaban o tráfico nos arredores do edificio administrativo da Xunta de Galiza. A manifestación remataba coa intervención dos representantes sindicais do comité de empresa, para dar conta dos nulos compromisos adquiridos polo conselleiro de Industria.

Xuntanza en Madrid

E mentres isto ocorría en Compostela, en Madrid tiña lugar unha xuntanza entre o presidente da Xunta de Galiza, Alberte Núñez Feijóo e o presidente do goberno central Mariano Rajoy, para falar, entre outras cousas, da carga de traballo de Ferrol e do tax lease da Ría de Vigo.

A este respecto, Xoán Xosé Bouzas, secretario nacional de CIG-Metal, sinala que nos dous casos é competencia do goberno central e que desa reunión ten que saír, necesariamente un compromiso tanto respecto do dique flotante para Ferrol, como de carga de traballo.“Ten que reflectirse nos orzamentos do estado. Aí é onde se vai comprobar se esa partida está realmente recollida, ao igual que para construír barcos para o ministerio de Defensa”.

Sobre o tax-lease, Bouzas afirma que “independentemente de que teña que visalo a Comisión Europea son competencia do Congreso as bonificacións que implica o tax-lease. A Xunta de Galiza ten que se facer valer para que ambos os compromisos se acaden. Agora, xa non valen promesas”.

Para o secretario nacional de CIG-Metal, remataron todos os prazos e agora “é hora dos feitos. Xa non se poden escusar nin nos gobernos anteriores, nin en que Bruxelas nos limita”. E, con contundencia, expresa a exixencia de CIG-Metal do levamentamento do veto á construción naval civil en Ferrol.

De feito, alerta da perda inminente de postos de traballo na industria auxiliar ferrolá se non se articulan as medidas necesarias e que a propia empresa principal quedaría en situación de incertidume total, porque non se sabe cal vai ser a saída.

No caso de Vigo, subliña que mesmo solucionando o tema do tax lease, non se xeraría carga de traballo, como mínimo até 2013, porque desde que se contrata un barco até que se comeza a cortar a chapa pasa, máis ou menos un ano. “Na situación na que están Vulcano, Barreras, Freire ou Metalship, tamén quedarían sen carga de traballo”.

Ante isto denuncia a inacción do goberno galego. “O único que se fixo desde que chegou o PP, foi perder postos de traballo”, afirma.

Mesa do naval

A CIG-Metal leva meses reclamando que se reúna a Mesa galega do Naval, na que están as empresas, os sectores, a administración e os sindicatos. Bouzas considera que é imprescindíbel que sexa nese marco onde se analice a situación actual e se decidan as medidas que se teñen que adoptar. “Nunca foi tratado o tema do naval nesa mesa, malia ter sido creada para tal fin. Está absolutamente ninguneada”.

Denuncia que a consellaría de Industria supliuna pola Mesa de Diálogo Social, onde só están representados ASIME, CCOO e UGT. “Deixa fóra ao resto da representación social e económica, a parte máis importante e representativa do sector”. De feito, quedan excluídas, non só a CIG, senón tamén ACLUNAGA, PYMAR ou GESNAVAL, onde están os grandes estaleiros. Lembra que ASIME só representa ás auxiliares e que nin as principais nin o CLUSTER, por exemplo, están aí.

Galería de imaxes

Chegan a pé a Compostela os traballadores do naval de Ferrol, en demanda de carga de traballo

paula.castro — Wed, 14 Mar 2012 19:51:46 +0100

Nesta xuntanza agardan obter, información das xestións realizadas polo goberno galego e as medidas que desde o executivo se porán en marcha para salvar un sector do que dependen máis de 17.000 empregos na comarca.

O sector leva mobilizándose máis de seis meses para exixir medidas que permitan afrontar a grave crise que padece o sector. Neste sentido, Manel Grandal, advirte de que a finais deste mes, en Fene “comezarán a pechar talleres e en Ferrol a partir de xuño hai un plan para ir pechando talleres e mandando ao persoal a outros gremios”. Isto repercutirá directamente nas industrias auxiliares que tiñan traballos xa contratados.

Grandal lembra que no parlamento galego se aprobou instar ao Goberno español a que no prazo dun mes concretase a construción do dique flotante do que, de momento non se sabe nada. Por iso, agardan que o conselleiro explique o que vai facer a Xunta de Galiza, máis alá de promesas.

Galería de imaxes

Navantia Fene

Máis de 5.000 persoas maniféstanse en demanda de carga de traballo para o naval de Ferrol

Chegan a pé a Compostela os traballadores do naval de Ferrol, en demanda de carga de traballo