25 anos

A CIG de Compostela homenaxea á militancia que leva máis de 25 anos afiliada polo seu compromiso co sindicalismo nacionalista

paula.castro — Sat, 26 May 2012 19:51:03 +0200

“Pretendemos facervos un recoñecemento individual a cada un de vós, claramente merecido, pero cremos que é tamén un bo momento para destacar valores como a solidariedade, o traballo colectivo, a xenerosidade, o compromiso militante e desinteresado a favor dunha noble causa, como a que representa a loita da clase traballadora por construír unha sociedade máis libre, xusta, solidaria, democrática e, no noso caso, máis galega”.

Así arrincaba Suso Seixo a súa intervención de clausura deste acto de homenaxe aos homes e mulleres da CIG de Compostela que, coa posta en práctica deste valores, colaboraron, dixo, “para construír un proxecto sindical, como o que hoxe representa a CIG, nas circunstancias tan difíciles en que se fixo”.

Un proxecto sindical ao que “procuramos ser fieis”, explicou, mantendo en todo momento “unha actitude combativa e de confronto cos poderes económicos, con aqueles que nos explotan como clase e que nos oprimen como nación”. Un proxecto sindical que, afirmou, ten o obxectivo estratéxico de facer realidade “unha sociedade galega socialista, nunha nación soberana”.

O secretario xeral da CIG sinalou ademais a adversa situación na que se desenvolve a actividade da central sindical: nun sistema económico capitalista; nunha sociedade –a galega- “colonizada no político, no económico e no cultural”; nun Estado con “forte vocación centralista”; baixo un acoso permanente dos poderes fácticos, a comezar polos medios de comunicación, e disputando o espazo con organizacións sindicais estatais “cunha práctica e uns posicionamentos ideolóxicos moi integrados no sistema e que responden claramente a esa visión centralista do Estado”.

Malia todas estas dificultades, manifestou a satisfacción de ser a primeira central sindical en afiliación e en capacidade mobilizadora, e unha peza básica nas relacións laborais en Galiza “sen renunciar aos nosos principios e mantendo a nosa autonomía financeira”, matizou.

Denunciou os recortes de dereitos e de calidade de vida conseguidos logo de anos de loita do movemento obreiro e das organizacións da esquerda. Recortes que, lembrou, están a practicar a burguesía e o capital, sob pretexto da crise económica e fixo un chamamento a responder a estas agresións con “máis organización” e “cun debate ideolóxico aberto á sociedade sobre que modelo económico e social é máis favorábel aos intereses da maioría”.

Do mesmo xeito, reclamou o valor da CIG, como “ferramenta que entre todas e todos construímos”, e pediu manter a firmeza e a esperanza “nas propias forzas e na nosa capacidade”, para superar “con éxito” o reto que supón para a loita de clases a crise económica e as saídas á mesma “na procura de que sexa favorábel aos intereses da nosa clase e do noso pobo”.

De igual xeito, Ramiro Oubiña e Anxo Noceda, agradeceron o compromiso de todas e todos os militantes que foron homenaxeados. O secretario comarcal recoñeceu o “traballo, compromiso, e loita que moitos e moitas de vós mesmo vides realizando de xeito continuado dende a propia dictadura”. Salientou o seu papel como “un claro referente a seguir” na permanente loita da central sindical “pola construcción dunha sociedade mais xusta e igualitaria”. Unha sociedade na que os homes e mulleres “realmente sexamos libres”, afirmou, “na que os dereitos dos pobos si sexan recoñecidos, en definitiva, por unha Galiza Soberana e Socialista”.

Galería de imaxes

Preto dun cento de afiliados/as da CIG con 25 anos ou máis de antigüidade reciben unha homenaxe en Pontevedra

ivan — Fri, 04 May 2012 17:58:15 +0200

Con este acto, enmarcado dentro da campaña do Primeiro de Maio, a CIG que subliñar o compromiso destes compañeiros e compañeiras; un compromiso fundamental para que, ao longo deste anos a Confederación se puidera consolidar como central sindical representativa cunha importante implantación en todo o país e en todos os sectores produtivos, acadando o amplo respaldo social co que conta hoxe en día.

Ao mesmo tempo, alén de facer o recoñecemento individual que simbolicamente se materializa cun obsequio, a CIG pretende transmitir a mensaxe de que o que hoxe representa é froito do esforzo colectivo de moitas persoas, especialmente de todas aquelas que levan tantos anos de compromiso co proxecto sindical.

Preto dun cento de persoas (das máis de 100 que comprían os requisitos) asistiron ao acto para recoller o agasallo e recibir a homenaxe dos seus compañeiros/as. O secretario comarcal da CIG de Pontevedra, Rafael Iglesias lembrou a orixe do sindicato na comarca e fixo un repaso polos primeiros conflitos laborais nos que se implicou a central nacionalista. Agradeceu especialmente o compromiso e o traballo dos primeiros afiliados/as, sen cuxa labor a CIG actual non sería posíbel.

Solidariedade, xenerosidade e traballo colectivo

Nestas ideas afondou o secretario xeral da CIG, quen agradeceu a todos e todas as presentes o seu compromiso co sindicalismo nacionalista, "e polo tanto, coa defensa dos dereitos e dos intereses da clase traballadora galega e tamén coa defensa dos intereses nacionais de Galiza".

Máis alá do propio recoñecemento individual, Suso Seixo apostou por salientar valores como a solidariedade, o traballo colectivo, a xenerosidade ou compromiso militante e desinteresado. "Só a través deste valores se pode explicar que foramos quen de construír un proxecto sindical como o que hoxe representa a CIG", lembrou.

Finalmente, chamou a todos/as os presentes a seguir a contestar na rúa as agrasións que está a podecer a clase traballadora no actual contexto de crise económica. "Temos que levar a iniciativa en canto a ofrecer alternativas e encabezar as mobilizacións e a contestación social a estas políticas tan inxustas, antisociais, antiobreiras, antigalegas e antidemocráticas".

A Mariña, A Coruña e Lugo homenaxean aos afiliados e afiliadas que levan 25 ou máis anos na CIG

begonha.carballo — Fri, 27 Apr 2012 12:35:41 +0200

Nos distintos actos, alén de facer o recoñecemento individual que simbolicamente se materializa cun obsequio, a CIG pretende transmitir a mensaxe de que o que hoxe representa é froito do esforzo colectivo de moitas persoas, especialmente de todas aquelas que levan tantos anos de compromiso co proxecto sindical.

Durante estes actos proxectarase un vídeo recordatorio das folgas xerais celebradas en Galiza nos últimos 30 anos, haberá intervencións dos secretarios comarcais e algunha actuación musical ou lectura de poemas.

No caso da Mariña, ademais, a homenaxe, celebrada o mércores 25 de abril, coincidiu coa clausura dunha xornada sobre a “actuación dos delegados/as de prevención” que a CIG celebrou no mesmo lugar e na que participaron delegados e delegadas da central nacionalista na comarca.

Esta mesma tarde corresponderá a quenda aos afiliados e afiliadas na CIG de Ferrol.

Os próximos actos terán lugar en:

Ferrol: 27 de abril, ás 18:00 horas, no salón de actos da Universidade.

Ourense: 28 de abril, ás 11:00 horas, na Casa Sindical.

Vigo: 28 de abril, ás 11:30 horas, no Auditorio de Novacaixa Galiza

Compostela: 1 de maio, no decurso do xantar, na Carballeira de San Lourenzo, no Campus Sur.

Pontevedra: 3 de maio, ás 20:00 horas, no salón de actos do Pazo da Cultura.