Miles de persoas participaron na mañá deste domingo nas manifestacións convocadas polas centrais sindicais maioritarias nas cidades de Vigo e Ferrol en defensa do emprego e dos servizos públicos e en demanda dun xiro radical nas políticas de recortes e axustes adoptadas polos Gobernos galego e español que permita unha saída á crise favorábel para a maioría social e facilite a creación de postos de traballo. Na mobilización de Ferrol denunciouse a situación de “emerxencia social e económica” que padecen as comarcas e esixíronse medidas inmediatas para garantir os 17.000 empregos que dependen da actividade dos estaleiros. No caso de Vigo fíxose fincapé en que o número de persoas desempregadas increméntase nun millar cada mes (superándose xa as 62.000) e que máis de 50.000 veciños/as da comarca atópanse xa en situación de pobreza.

A CIG vén de facer públicas as alegacións presentadas contra o Plan Xeral de Ordenación Municipal de A Coruña, centradas especialmente en aspectos que afectan ao futuro industrial e do emprego na cidade, ao acceso a unha vivenda digna, á reordenación brutal que se pretende coa desafección dos terreos do porto e en relación a cuestións ambientais e dos convenios das Rañas e Monte Alfeirán, anexados ao plan xeral, que a central entende inadecuados.

O Comité de Empresa de Alfageme, xunto a representantes sindicais de CIG e UGT, compareceron o martes 10 de novembro para dar a coñecer a situación actual a nivel laboral e industrial da planta de Alfageme en Vigo, asi como as consecuencias que está a ter o novo aval concedido pola administración galega asi como a aprobación do plano de viabilidade. Polo de agora neste centro continúa o impago de salarios e comezaron a chegar cartas para presionar ao persoal na cuestión do traslado a Vilaxoan, polo que realizaron esta rolda de prensa para dar a coñecer o posicionamento das traballadoras e traballadores neste contexto.

O Comité de Alfageme anunciou que non vai manter negociacións coa equipa directiva sobre o expediente de regulación de emprego, o peche de plantas e os traslados de traballadores/as que a empresa pretende levar adiante. Dende o Comité sinalaron que non aceptarán ningunha outra medida que non sexa o Plano de Viabilidade presentado no Igape e grazas ao que conseguiron do instituto público avales para préstamos por valor de 40 millóns de euros.

A sección sindical da CIG en Unión Fenosa volveu amosar a súa preocupación pola falla de interese da Xunta de Galiza ante a posibilidade de que se destrúan empregos na empresa recentemente adquirida por Gas Natural, logo de que esta anunciase a posta á venda da planta de Sabón. Dende a sección sindical reclámase ao goberno galego que atenda a solicitude de entrevista cos responsábeis das Consellarías de Economía e Industria e de Traballo e Benestar, trasladada o pasado mes de xuño, así como que interveña para que Gas Natural/Unión Fenosa se comprometa a garantir os postos de traballo e os investimentos previstos.

A federación de Servizos da CIG de Ourense denuncia o despedimento de catro traballadores/as da empresa Outro, S.L., pertencente ao grupo de “La Región”, no centro comercial do Paseo. Dende a CIG- Servizos sospéitase que tras estes despedimentos hai unha intención de pechar ese centro de traballo para especular co local comercial, pois o número de traballadores/as despedidos/as equivale ao 50% do cadro de persoal.

Os baixos prezos que, en xeral, as labregas e labregos galegos perciben polos seus produtos, e o desmesurado aumento dos custos de produción que se deu no último ano, fai que moitos produtores vexan seriamente comprometida a rendibilidade do seu traballo. Por iso o SLG acordou pór en marcha unha campaña en denuncia da especulación cos alimentos e en demanda de medidas para enfrontar a actual situación de crise.