Centos de empregados/as públicos/as participaron este venres na concentración convocada ante a Escola Galega de Administración Pública, coincidindo coa celebración da Mesa Xeral da Función Pública. Tanto as persoas concentradas, como os representantes sindicais que participaban na Mesa exixiron a retirada do “Anteproxecto de medidas no emprego público na Xunta de Galiza”. Denuncia que se trata dunha proposta que se limita a introducir recortes nas condicións laborais e salariais dos empregados e empregadas do sector público.

Máis de 3.000 traballadores e traballadoras do sector público déronse cita esta mañá diante de San Caetano, coincidindo coa celebración do Consello da Xunta. O que inicialmente estaba previsto como unha concentración de delegados e delegadas converteuse finalmente nunha masiva mobilización á que se sumou todo o persoal que por proximidade ou por quendas puido ir a manifestar o seu máis rotundo rexeitamento aos recortes propostos polo goberno do PP. O persoal, que participou masivamente nas asembleas convocadas polas organizacións sindicais, chegou a fletar autobuses desde diversos puntos de Galiza para sumarse a esta mobilización convocada con carácter de urxencia.

A CIG-Administración cualifica de “indignantes” as recentes declaracións televisivas do voceiro do Partido Popular, Antonio Rodríguez Miranda, nas que intentaba transmitir a idea de que os empregados/as públicos son uns privilexiados que se están a mobilizar por dereitos dos que non gozan o resto dos cidadáns, “sumándose a campaña do PP que pretende xustificar os recortes aos empregados/as públicos/as e o abandono dos servizos públicos polo gasto que se xera na Administración”.

O PP comeza a facer pública agora a súa axenda oculta en materia sanitaria. Axenda de cuxa existencia xa se viña advertindo e que conduce, segundo CIG-Saúde, ao co-pago e ao desmantelamento do servizo sanitario público. Por iso a federación exixe a súa retirada, sequera do debate, e alerta da pretensión do goberno Feijóo de privatizar o sistema.

O PP de Ames, que goberna con maioría absoluta, presentou o pasado martes unha proposta de supresión de servizos que afecta ás áreas de Animación á Lectura, Comunicación, Normalización Lingüística e Medioambiente. Isto leva aparellado eliminar 12 postos de traballo e o despedimento de 9 persoas das que, máis da metade son delegados/as sindicais, forman parte do Comité ou integran as candidaturas da CIG e UGT. O Comité de Empresa, que compareceu en pleno xunto cos representantes da CIG, UGT e CCOO, exixe a súa retirada e a apertura inmediata dun proceso ‘serio’ de negociación.

A CIG-Administración de San Caetano, o edificio administrativo da Xunta de Galiza e Compostela, denuncia que hai coches que teñen a tarxeta identificativa que permite utilizar o aparcamento interior ou as súas inmediacións para deixar o vehículo, por ser do PP. Dadas as dificultades para aparcar que teñen traballadores e traballadoras, a CIG anímaos a presentar unha solicitude para que lle sexa concedida esta tarxeta que si se concede ao Partido Popular.

A Confederación Intersindical Galega considera que o feito de ter sido presidente da Xunta de Galiza non xustifica que o goberno do PP de Santiago decida pórlle a unha rúa da cidade o nome de Manuel Fraga. O secretario comarcal, Anxo Noceda, lembra que Fraga Iribarne tivo unha profunda implicación na ditadura franquista, á que foi leal aínda despois da morte do ditador. Alén diso sinala que tras da súa “conversión” á democracia e durante o seu mandato os sectores produtivos galegos sufriron non só un grave deterioro, senón que mesmo moitos foron desmantelados. Un período de 16 anos que, lembra, rematou logo da súa nefasta xestión dunha catástrofe como a do Prestige.