Desde a sinatura do Convenio por parte de CCOO e UGT, coa patronal, teñense dado novos pasos para tentar desregularizar máis o sector naval. A CIG-Metal denuncia que na Mesa do Naval, que debería servir para regularizar o modelo de contratación neste sector, a patronal, coa axuda dos sindicatos CCOO e UGT, queren botar abaixo o modelo da Bolsa de Emprego e aumentar a flexibilidade coa imposición dunha bolsa de horas. Diante desta situación, a central sindical nacionalista editou unha folla informativa para dar conta da súa oposición e dos últimos acontecementos neste conflito.

O martes 24 de novembro desde as dez e media da mañá tiña lugar a asemblea de delegados e delegadas do Metal da comarca de Vigo para analizar a sinatura do convenio provincial, estudar pormenorizadamente o seu articulado e poñer en común os erros atopados no mesmo, repartiuse o convenio editado pola CIG-Metal e un novo número do Novas do Metal. Ademais deuse a coñecer a posta en marcha dunha asemblea de parados do naval, que comezará con mobilizacións nesta mesma semana, e a convocatoria da manifestación da CIG para o venres 4 de decembro en Compostela pola problemática das posíbeis fusións das caixas.

CIG-Metal editou unha folla informativa para dar a coñecer no sector a reclamación presentada diante da Comisión Paritaria do Convenio do Metal da Provincia de Pontevedra, sobre a desaparición do artigo 53, co que desaparece o texto que fai referencia ao primeiro suposto dos tóxicos. A continuación reproducimos o panfleto repartido nos centros de traballos do sector estes dias polo seu interese e importancia

Pasadas as sete e media da tarde comezaba a asemblea de afiliados e afiliadas da CIG, e simpatizantes, afectados pola negociación do convenio provincial do Metal, no que se analizou a situación na que se encontra este convenio, asi como o preacordo, ao que se lle deu un rotundo rexeitamento. A cuestión da mascarada do referendo orquestrada polas centrais sindicais CCOO e UGT tamén foi tratada nesta asemblea, asi como se estudaron posíbeis novas accións para enfrontar o problema da regulación na contratación no naval e dar resposta ás demandas de melloras laborais e salariais no sector.

Ao longo da última semana de outubro CCOO e UGT anunciaron que van realizar referendos en máis de 700 empresas do metal da provincia de Pontevedra  para preguntar sobre o preacordo que xa asinaron coas asociacións empresariais do Metal na semana pasada. A CIG-Metal xa anunciara que non ía asinar este preacordo, xa que é insuficiente e é a mesma proposta que xa fora presentada no mes de xuño, rexeitada polas asembleas de traballadores en folga. Diante da convocatoria destes referendos a CIG chama a non participar deste proceso, xa que "é unha votación para xustificar o seu preacordo e lexitimar unha sinatura dun convenio, que queda moi lonxe das demandas do sector e polas que se loitou moi duramente este ano".

A Federación do Metal da CIG convoca unha asemblea de afiliados e afiliadas, asi como simpatizantes que terá lugar o vindeiro mércores 28 de outubro ás 19.30 horas no Cine Salesianos, na rúa Venezuela número 3, para tratar como único ponto da orde do día o convenio do metal.