A CIG negouse a asinar onte o novo convenio colectivo de transporte de enfermos e accidentados en ambulancia de Galiza, apoiado por UGT e CCOO, xa que supón unha perda de poder adquisitivo para o conxunto dos traballadores/as, consolida a desaparición da terceira paga extraordinaria lograda no ano 2006 e, ademais, non estabelece garantías de mantemento do emprego.

Os traballadores e traballadoras das ambulancias do 061 acordaron nas asembleas celebradas o xoves pola tarde, desconvocar a folga indefinida iniciada o mércores 19 de decembro e mudar as accións de protesta por unha folga indefinida intermitente todos os xoves e venres, a partir do 10 de xaneiro.

CIG, CCOO e UGT veñen de anunciar a convocatoria de folga no sector de ambulancias, inicialmente para os días 12, 13 e 14 de decembro. Exixen o desbloqueo da negociación do convenio e anuncian que, de non conseguirse avance algún, continuarán, a partir do 19 de decembro, cunha folga indefinida. Denuncian que o convenio anterior rematou en decembro de 2010 e que, desde aquela, non se conseguiu chegar a ningún acordo.

O DOG deste mércores, publica o decreto 221/2012, do 31 de outubro, polo que se fixan as tarifas aplicábeis a doentes que non sexan beneficiarios/as da Seguridade Social, así como naqueles casos en que, sendo beneficiarios, exista un terceiro obrigado ao pagamento que deba asumir o gasto sanitario. O decreto abre tamén a posibilidade de “repercutir nos usuarios os gastos ocasionados por eles como consecuencia do uso irresponsábel das prestacións asistenciais do sistema público de saúde de Galiza” e estabelece ademais que o transporte sanitario será “pola conta directa do paciente”. Entra en vigor este xoves.

O sector de Transportes da CIG na Coruña vén de presentar denuncia diante da Fiscalía para depurar responsabilidades, logo de que dous traballadores de Ambulancias Xuvias fosen obrigados a trasladar dende o CHUAC até o Hospital Xeral Cíes de Vigo a unha bebé prematura nunhas condicións que non cumprían os requisitos mínimos de seguridade.

O responsábel comarcal da FGAMT-CIG de Pontevedra, Xabier Aboi, comparecía en rolda de prensa acompañado polo deputado do BNG, Bieito Lobeira, para avaliar as consecuencias dos atrasos nos tempos de resposta da ambulancia de Marín, logo de ter sido recortado o servizo de ambulancias por decisión da consellaría de Sanidade. O deputado nacionalista aclarou que os datos foron proporcionados pola propia consellaría, logo de seren demandados en sede parlamentaria polo BNG.

A CIG amosou hoxe o seu rexeitamento ao proceso xudicial aberto contra o responsábel nacional de Mar da FGAMT a raíz da denuncia presentada pola Consellería de Sanidade diante da Fiscalía despois de que Xabier Aboi fixese públicos os tempos de resposta da ambulancia de Marín. O representante sindical negouse hoxe a declarar ao entender que a acusación de revelación de segredos non se sostén porque os datos que deu a coñecer nunha rolda de prensa convocada para criticar os recortes no servizo de emerxencias son públicos.