Arredor de 2.000 persoas sumáronse á convocatoria que baixo o lema “Galiza pola soberanía, os dereitos sociais e os servizos públicos. Esta reforma da Constitución é unha fraude!”, convocaron 14 organizacións sindicais, políticas e sociais, ademáis da CIG, a Organización de Montes en Man Común, o BNG, ADEGA, Comités, FRUGA, a Asociación de Escritores en Lingua Galega, a AS-PG, Galiza Nova, a Liga Estudantil Galega, Plataforma en defensa dos Servizos Sociais Públicos, Galiza Cultura, MEU e Rede Galega de Empresas. Os convocantes denunciaron a reforma da Constitución pactada por PP e PSOE e que, segundo afirmou o secretario xeral da CIG, Suso Seixo, “é innecesaria, antisocial e antidemocrática”.

Catorce organizacións sindicais, políticas e sociais veñen de presentar a convocatoria dunha concentración en Compostela para o vindeiro sábado día 17 de setembro, ás 6 da tarde na Praza da Quintana, baixo o lema “Galiza pola soberanía, os dereitos sociais e os servizos públicos. Esta reforma da Constitución é unha fraude! Os convocantes chaman a participar masivamente para manifestar un rotundo rexeitamento ao antidemocrático pacto acadado entre PP e PSOE que terá graves consecuencias nas nosas condicións de vida e que limita a capacidade de Galiza para adoptar políticas propias en materia económica.

CIG-Saúde denuncia que a previsión da Xunta de Galiza de recortar aínda máis os orzamentos deste ano en Sanidade -segundo as informacións aparecidas en prensa en 14,2 millóns de euros-, aos que hai que engadir os 17,8 millóns de euros que prevé recortar en Benestar, terán graves repercusións para a Sanidade Pública. María Xosé Abuín, secretaria nacional da federación de Saúde da CIG lembra que nos orzamentos deste ano xa se aplicaba un drástico recorte e asegura que incrementalo agora provocará a aceleración do desmantelamento deste servizo público esencial para favorecer a súa posterior privatización.

Delegados e delegadas da CIG concentrábanse este martes, en toda Galiza, contra a reforma da Constitución aprobada o pasado venres no Congreso dos Deputados. Unha reforma que limita o gasto público e que, segundo afirmou Suso Seixo na súa intervención na asemblea de delegados/as de Compostela, “terá graves consecuencias” de forma inmediata, con recortes en políticas sociais, en Ensino, Sanidade ou infraestruturas, limitando aínda máis a capacidade de Galiza “para decidir por nós mesmos as nosas políticas económicas”.

A Confederación Intersindical Galega desenvolveu unha concentración esta mañá ás portas da Delegación do Goberno na Galiza para rexeitar a reforma do artigo 135 da Constitución, artellada polo PSOE e o PP sen debate social e pola vía de urxencia, que vén introducir o dogma neoliberal do “déficit cero” no texto da mesma. A protesta, que se desenvolveu coincidindo coa votación da reforma no Congreso dos Deputados, terá continuidade o vindeiro martes 6 de setembro con asembleas de delegados/as e concentracións en todas as cidades do País.

A Executiva Confederal da CIG vén de acordar convocar mobilizacións contra a reforma do artigo 135 da CE. Unha reforma neoliberal pactada polo PSOE e o PP que limita a capacidade do Estado na súa intervención nas políticas económicas e sociais e que atenta contra a autonomía financeira de Galiza. A CIG considera ademais que o procedemento seguido para tramitar esta reforma constitucional é absolutamente antidemocrático e reclama a convocatoria dun referendo.

A CIG cualifica como “altamente negativas” as medidas aprobadas polo Executivo no Consello de Ministros do pasado venres. Medidas que o secretario xeral, Suso Seixo, considera que van na liña do xa aprobado na reforma laboral, que pretenden unicamente “facilitar o despedimento, proporcionar ás empresas man de obra barata” e que denotan a “intencionalidade e a ideoloxía neoliberal do goberno”. Diante destes ataques á clase traballadora a CIG anuncia que continuará a mobilizarse para dar a estas medidas a resposta que merecen.