Dende a CIG-Construción amosaron a súa preocupación pola situación na que quedan os arredor de 400 empregados/as despedidos das empresa que acometen a obra do AVE a Vigo, especialmente aqueles chegados dende outros puntos da Península. A central denuncia que moitos destes operarios/as que trouxeron ás súas familias e escolarizaron os seus fillos aquí deberán regresar ás súas localidades co curso xa comezado.

A empresa adxudicataria das obras do Tren de Alta Velocidade (AVE) en Redondela, UTE Acciona-Fomento, contratará a 91 novos operarios despois de que a CIG lograse coa súa presión un reordenamento da xornada laboral. O cambio prodúcese despois das reiteradas denuncias ante a Inspección de Traballo e as mobilizacións levadas a cabo pola Federación da Construción e a Madeira a causa do exceso de horas traballadas e as condicións laborais existentes nesta obra.

A CIG-Construción, diante do último accidente mortal rexistrado nas obras do AVE en Galiza o mércores 1 de xullo, quere denunciar novamente as terríbeis condicións laborais nas que teñen que desenvolver o seu traballado os obreiros/as desta infraestrutura pública, na que xa se teñen producido varias mortes e múltiples sinistros, ao tempo que lamenta a ausencia de medidas correctoras por parte da administración galega que poñan final a esta sangría humana. Este novo sinistro engádese a longa lista de accidentes rexistrados dende o comezo da construción do tren de alta velocidade no noso País.

SACYR, unha das principais empresas construtoras do AVE na provincia de Ourense, está a incumprir reiteradamente a normativa en materia de xornada laboral e descansos, impoñendo un horario de 10 e 11 horas diarias e obrigando a traballar en datas que son festivas de Convenio, como son estas da semana santa. Para cubrirse as costas, ponlle a cada traballador a asinar un escrito por cada un dos días festivos que traballen (neste caso polo luns, martes e mércores) no que en teoría cambian as datas por outras posteriores.

A Federación da Construción da CIG de Ourense vén de denunciar o incumprimento do convenio colectivo deste sector nas obras do AVE, logo da decisión das empresas concesionarias de continuar traballando toda a fin de semana, o vindeiro luns 23, que é festivo por convenio, así como o martes 24, festa local nos Concellos de Ourense, Maside e o Carballiño. Estes feitos xa foron postos en coñecemento da Inspección de Traballo, mentres se agarda unha solución definitiva para evitar as continúas vulneracións de dereitos que se rexistran nas obras públicas.

A CIG Construción realizou o mércores 11 de febreiro unha xornada de accións simultáneas nas catro provincias galegas, sinalando o incumprimento “sistemático” da lexislación laboral en todo o que ten a ver coas xornadas, salarios e medidas de seguridade, entre outras cuestións. Asi, en Lugo, Ourense e A Coruña delegados e traballadores do sector entraban nas obras da maior infraestrutura pública que se está a facer no noso país, o AVE, para criticar que nin tan sequera a propia Administración central faga cumprir o convenio. Na provincia de Pontevedra, no tramo de Redondela, máis de 120 delegados, traballadores do sector en desemprego e representantes sindicais foron acordonados por dotacións de Policias antidisturbios, que non lle permitiron achegarse nin ás portas destas obras ao seu paso por Redondela, pola presenza da Vicepresidenta do Goberno español, María Teresa Fernández de la Vega.

A CIG de Ourense vén de denunciar que a provincia continúa a estar á cabeza nos datos oficiais referidos á sinistralidade laboral, en contra da tendencia á redución que se rexistra no resto de Galiza. Nos nove primeiros meses de 2008 contabilizáronse 181 accidentes durante a xornada de traballo, o que representa un incremento do 5,49% fronte á media galega, situada no 0,05%.