Ante as declaracións realizadas polo Presidente da Autoridade Portuaria da Coruña, a CIG quere destacar que foi a propia Inspección de Traballo quen constatou que se retomaron os traballos de desmontado da grúa (paralizados logo da morte dun operario) sen a autorización pertinente e que a central sindical tan só expuxo ante a opinión pública esta situación. Así mesmo, a CIG lamenta que o Porto, en lugar de depurar responsabilidades por estes graves feitos, se limite a criticar a CIG e non a investigar e condenar aos culpábeis do accidente e a quen incumpriu o Requirimento da Inspección.

O Secretario da Unión Comarcal da CIG da Coruña, Paulo Carril, quere denunciar publicamente as decisións irresponsábeis e neglixentes adoptadas pola UTE Langosteira, as empresas subcontratadas e a Autoridade Portuaria que, a pesar do requirimento expreso da Inspección de Traballo, decidiron retomar as tarefas de desmontado da grúa nas que o pasado mes de outubro faleceu un operario. Ante esta grave actuación, alén das posíbeis consecuencias penais para os actuantes, a CIG esixe da Autoridade Portuaria que depure responsabilidades entre os culpábeis de pór en risco a vida dos traballadores/as e dificultar a continuidade da investigación aberta para esclarecer as causas do sinistro.

A CIG quere denunciar publicamente o persistente silencio mantido pola Autoridade Portuaria da Coruña quen, a pesar do gravísimo accidente que custou a vida a un traballador de Grúas Usabiaga, once días despois continúa sen convocar a Mesa de Seguridade de Langosteira. Ademais, a Inspección de Traballo ten paralizadas as tarefas de desmontado da grúa na que se produciu o accidente até que non se garantan todas as medidas necesarias para realizar os traballos de xeito seguro.

O 100% do cadro de persoal da UTE-Langosteira está secundando o paro de 24 de horas convocado polo Comité nas obras do Porto Exterior da Coruña en rexeitamento ao accidente que o pasado venres lle custou a vida a un traballador de Grúas Usabiaga, afiliado á CIG. Con este paro o persoal tamén quere trasladar a súa solidariedade á familia do afectado e reclamar a revisión e reforzamento das medidas de seguridade nas obras do porto.

Tras da xuntanza do Comité de Seguridade e Hixiene mantida na tarde de onte, a CIG e o Comité de empresa lamentan que a día de hoxe, a UTE-Langosteira e a Autoridade Portuaria non estean en condicións de presentar o informe do accidente sucedido o pasado 7 de xuño nas obras do Porto Exterior nin avanzar as posíbeis causas que expliquen a caída doutra grúa este mesmo mércores. A central sindical e o Comité de empresa reclaman ditos informes co único obxectivo de mellorar o plano e a aplicación de medidas de seguridade, que a vista está, resultan insuficientes.

Diante das periódicas disputas de carácter político xurdidas pola falta de garantías no financiamento do Porto Exterior da Coruña e os constantes cruces de acusacións entre a Autoridade Portuaria e o ente público Puertos del Estado (Ministerio de Fomento), a CIG e o Comité de empresa da UTE Langosteira esixen un entendemento entre todas as partes implicadas para acadar unha solución definitiva de xeito que se garantan os orzamentos necesarios para a conclusión dos traballos e a continuidade dos empregos.

A CIG de A Coruña e o Comité de Empresa veñen de denunciar o incumprimento por parte da UTE Langosteira dos compromisos que rexen en toda a obra do Porto do Exterior en canto aos procesos de contratación de persoal e das medidas de seguridade e saúde laboral. En rolda de prensa, o Secretario Comarcal da Federación de Construción e Madeira, Victorino Ares, o Secretario Comarcal da CIG de A Coruña, Paulo Carril, así como os membros do Comité denunciaron o proceso de contratación de 150 traballadores destinados á nova tarefa “Fabricación de Caixóns” que se vén de iniciar para a construción do peirao de atraque.