A Sala do Contencioso Administrativo do TSXG, estimando o Recurso de Apelación interposto pola CIG, vén de anular, definitivamente, o Orzamento Xeral do Concello de Verín do ano 2009 por vulnerar o dereito de negociación colectiva da central sindical nacionalista. A sentenza do alto tribunal galego condena tamén á entidade a acometer unha negociación real coa representación sindical. Ademais, o Tribunal Superior de Xustiza de Galiza impón ao Concello, como parte vencida no preito, o pagamento das costas do proceso por valor de 1.000 euros.

A sala do social do Tribunal Supremo vén de publicar a súa Sentenza de 22 de Setembro de 2011, pola que se estima o Recurso de Casación interposto polos servizos xurídicos da CIG de Verín. O Supremo anula unha sentenza previa do Tribunal Superior de Xustiza de Galiza e recoñece a improcedencia do despedimento dun traballador temporal da empresa pública Servizos Agrarios Galegos, S.A. (SEAGA). Declara que existe fraude de lei, dada a condición de indefinido-descontinuo do citado traballador, por ter sufrido un encadeamento irregular de contratos, subscritos, en determinados ciclos temporais, para a actividade normal e permanente da citada patronal pública.

A Unión Local da CIG de Verín organiza este venres 21 de xullo un acto ao aire libre en homenaxe ás vítimas do franquismo nas comarcas de Monterrei e Conso Frieiras. A cita é na Praza da Mercede a partir das 21.30 horas.

A Mesa Xeral de Negociación do Concello de Maceda, integrada por 4 representantes da CIG, 2 representantes da CSIF e o Alcalde do Concello acordou, o pasado 2 de maio, dar a súa aprobación a proposta de Convenio Colectivo para o Persoal Laboral ao Servizo do Concello e á proposta de Acordo Regulador das condicións de traballo do persoal funcionario do Concello.

O Xulgado de Xinzo da Limia vén de sobreser a causa penal aberta contra dous sindicalistas da CIG, Anxo García Torres e Luis Ferreiro Fernández, acusados polo último Director Xerente da Vidreira do Atlántico de inxurias, estragos e encubrimento, tras dos sucesos acontecidos o 5 de Abril de 2009, nunha das xornadas de folga na factoría de Verín, nos que aparecera no interior da planta de vidro un plástico dun palet de botellas levemente queimado.

O tribunal Superior de Xustiza de Galiza vén de confirmar o ditame do Consello Consultivo polo que se ratificara a validez do Plano de Viabilidade e o Convenio Colectivo da Mancomunidade de A Limia, aprobados no ano 2005, logo dunha folga dos traballadores/as que durou máis de 90 días. Con esta decisión impídese a disolución do ente supramunicipal, tal e como viñan pretendendo os seus dirixentes. A consecuencia máis inmediata da sentenza do TSXG é que a institución terá que pagar ao persoal, en concepto de atrasos de convenio, máis de 160.000 euros en conxunto.

O Tribunal Superior de Xustiza de Galiza vén de confirmar a sentenza do Xulgado do Contencioso Administrativo nº 1 de Ourense pola que, acollendo as teses da avogada da CIG de Verín, anulou unha praza de Conserxe no Colexio Laureano Prieto da Gudiña e unha praza de Vixiante Municipal de Obras e Servizos, adxudicadas ambas polo alcalde do concello en febreiro de 2008, segundo afirman desde a CIG de Verín, “violando o dereito á liberdade sindical e, por extensión, limitando os dereitos de todos/as os traballadores/as a optar en pé de igualdade cos adxudicatarios”.