Galiza pechou agosto cun total de 224.582 persoas desempregadas, o que supón un incremento do 0,71% (1.582) con respecto ao mes anterior. Aínda que se trata dunha subida menor que a rexistrada no conxunto do Estado español, a taxa interanual no noso país situouse no 6,17%, o que se traduce en 13.050 novos demandantes de emprego con respecto a agosto do ano 2010. Tamén destaca a elevada temporalidade dos contratos, xa que o 93,5% dos 59.850 contratos rexistrados o mes pasado foron deste tipo.

A Confederación Intersindical Galega considera altamente negativos e preocupantes os datos de paro rexistrado no mes de xullo, con 223.000 desempregados/as, o que sitúa a taxa de paro en Galiza nun 17,01%, fronte o 16,19% que se rexistraba en xullo de 2010. Uns datos que veñen confirmar as predicións da central sindical, que desde que comezou a crise vén denunciando as políticas que se estaban a aplicar e advertindo que con elas contribuiríase a deteriorar aínda máis a economía e, polo tanto, a incrementar o desemprego. A CIG considera que os/as 10.557 desempregados/as menos rexistrados no mes de xullo, con respecto do mes anterior, obedecen exclusivamente a razóns de estacionalidade.

O secretario xeral da CIG asistiu en Valdeorras os actos conmemorativos do XXV aniversario da creación da Unión Local do sindicato na localidade ourensá. Xesús Seixo mantivo xunto cos compañeiros da central unha entrevista co alcalde da localidade, Alfredo García, e co presidente da Asociación Galega de Pizarristas (AGP) para analizar o futuro do sector no contexto da crise.

Diante das alternativas que se están a barallar por parte dos gobernos central e galego para atallar a crise económica, “a conta dun sacrificio enorme por parte da maioría social, que son os traballadores/as, mentres que aqueles que a provocaron van saír de rositas”, a CIG acordou darlle un carácter máis mobilizador a este 10 de marzo, Día da Clase Obreira Galega. Por iso, este ano convocará manifestacións nas sete cidades do país baixo o lema “O emprego, os salarios e as pensións deféndese loitando”. Ademais, celebrará, por cuarto ano consecutivo, o Premio do Día da Clase Obreira Galega, nun acto que terá lugar, en Compostela, o día 9 de marzo.

A CIG vén de anunciar a posta en marcha dunha campaña dirixida a explicar as causas da actual crise económica e en demanda da aplicación de medidas que garantan as condicións de vida da clase traballadora, que favorezan realmente aos sectores produtivos e que posibilten maior autogoberno para Galiza. Unha campaña que se quere facer chegar a todas as organizacións do nacionalismo para poder dar unha resposta común ante unha crise que vai afectar á maioría da poboación.