Lugo

O Comité de Alimentos Lácteos advirte que o silencio da Xunta deixa a factoría nunha situación moi complicada

begonha.carballo — Thu, 16 May 2013 15:40:11 +0200

O Secretario Comarcal da FGAMT-CIG de Lugo, Christian López Carmona, apuntaba que na reunión empresa e Comité coincidiron en que o non pronunciamento da Xunta e dos seus máximos responsábeis condena a mesma a unha situación moi complicada “na cal non se garanten os tempos necesarios para poder escenificar unha solución e, por tanto, parece significar a perda do, até agora, “interese” manifestado dende a Xunta”.

Doutra banda a dirección da empresa manifestou ao comité a súa negativa a participar sen voz e sen voto no Consello de Administración, “algo que non se comparte nin se viu aceptábel por parte da representación do persoal, dada a situación extrema actual e no que vai supoñer as decisións do Consello no futuro inmediato dos traballadores/as”.

Procesión pola salvación da empresa

Na noite do mércores os traballadores e traballadoras realizaron en Lugo unha procesión pola salvación da empresa, que tivo un seguimento masivo por parte do persoal, quen acudiu incluso acompañado de familiares e achegados/as. O acto tivo punto de partida diante da catedral de Lugo, accedendo á Muralla romana a través da rampa adxacente. O séquito compúñase do emblema principal da factoría, un cartón xigante de “Deleite”, que foi portado a relevos polos traballadores e onde”lucía a data a partir da cal, se non existe unha solución por parte da Xunta, a planta se atopará en situación de concurso de acredores”.

O resto dos participantes na procesión concorreu portando a súa vela correspondente. Destacar que as 80 velas previstas inicialmente, ficaron escasas diante da afluencia do público participante. O percorrido pola Muralla rematou á altura da Praza do Ferrol, dende onde se accedeu á Ronda da Muralla para rematar cunha breve concentración diante da Xunta de Galiza, onde finalmente ficaron de ornamentación e prego unha multitude de velas prendidas. Rematando o acto aproximadamente en torno as 00.15 horas.

O luns, 20 de maio, terá lugar a vindeira asemblea de traballadores, ás 12.00 horas, nas instalacións da factoría en Outeiro de Rei.

Concentración para reclamar da Panadería Bollería Majufer que abone as indemnizacións ao persoal despedido

begonha.carballo — Thu, 16 May 2013 14:39:11 +0200

Durante a protesta, o Secretario Comarcal da FGAMT-CIG de Lugo, Christian López Carmona, destacou que case a metade dos despedimentos se realizaron contra traballadores en situación de baixa médica “que casualmente se correspondían cos traballadores de maior antigüidade na empresa”.

Para o responsábel sindical, esta decisión constitúe unha manobra para que, aproveitando a actual reforma laboral do Partido Popular, “se precarice o despedimento e a situación dos traballadores que os estaban a substituír durante a súa baixa médica”.

Dende a CIG, que ostenta a representación sindical, denúncianse estes despedimentos como inxustificados, pois non obedecen ás situacións definidas pola empresa, senón a unha situación que está a forzar a propia firma de eliminación de rutas e clientes. De feito, destaca López Carmona, até o presente “foron os traballadores os que estaban a defender e manter o nivel de ventas nas rutas, ao tempo que sempre se avalou a realización de novas iniciativas comerciais para manter o nivel de ventas, esforzos que en ningún caso foron correspondidos pola empresa”.

Neste sentido, dende a central sindical denúnciase a manobra da empresa tendente a efectivizar o pagamento dos salarios pendentes e das indemnizacións de xeito fraudulento a través do Fondo de Garantía Salarial, “unha vez máis, en sintonía coa práctica habitual que están a empregar un bo número de empresas baixo o amparo das últimas reformas nos despedimentos por causas obxectivas”.

Dende a FGAMT-CIG lembran que a Panadería Bollería Majufer ten un longo expediente de incumprimentos en materia laboral, sendo reincidente nos incumprimentos de pagamento de salarios e no relativo ao incumprimento da xornada laboral.

O Goberno galego agóchase tras un “estamos traballando” e continúa sen aclarar se apoia o actual proxecto para Alimentos Lácteos

begonha.carballo — Wed, 15 May 2013 17:05:59 +0200

No referente á reunión mantida co máximo responsábel do XesGalicia, o Secretario Comarcal da FGMAT-CIG de Lugo, Christian López Carmona, destacou que, efectivamente, nin se confirmou se existía solución ou a súa inexistencia. En todo caso, constatouse que logo de dous meses de ERE de suspensión temporal dos traballadores/as, e de ter esixido compromisos a todos os “factores” implicados no conflito de Alimentos Lácteos, “continuamos sen solución e, o que é peor, sen que existan perspectivas, datas significativas ou pasos definitivos a concretar nesta semana ou na que vén”, denuncia.

Neste sentido, apuntou López Carmona, “dubidamos das garantías suficientes da Xunta de Galiza, nomeadamente da Consellería de Industria e do señor Feijóo, para implicarse na solución definitiva deste problema e por tanto instamos ao Goberno galego a concretar unha solución e un pronunciamento favorábel definitivo para a factoría de Outeiro de Rei”.

Xa polo serán, o conxunto do cadro de persoal trasladouse ás inmediacións do Parlamento e, unha representación dos traballadores/as, puido seguir en directo o tratamento da proposta do Bloque Nacionalista Galego. Unha proposta que, destacaron, é de mínimos: proposición de reunión de todas as partes afectadas nun prazo inferior aos 15 días, a concreción do plan de viabilidade e a súa dotación económica. Cuestións ás que, “curiosamente, se opuxo o Partido Popular, quen se centrou durante o 99% da súa intervención en crear conflito cos grupos da oposición, sen aclarar en ningún caso cal vai ser a proposta alternativa da Xunta de Galiza para Alimentos Lácteos, toda vez que se negaron a apoiar a proposta dos nacionalistas, pechando, iso si, como é norma nos responsábeis do Partido Popular cun ‘está moi complicada a solución pero estamos traballando niso’”.

“Que nos van seguir dicindo a partir do 28 de maio, cando a empresa entre en concurso de acredores? Que seguen traballando nunha solución? O conxunto do cadro de persoal entende que ten que existir un pronunciamento claro e favorábel neste contexto, pois o contrario é manter o engano e continuar a superar todos os prazos para a supervivencia da factoría”, critica o voceiro dos traballadores/as.

Á vista da situación, este mércores, ás 23 horas, os traballadores e traballadoras de Alimentos Lácteos escenificarán unha procesión, con punto de partida diante da Catedral de Lugo e combinando percorrido pola Muralla Romana, con remate diante da sede da Xunta de Galiza – Edificio Administrativo, na Ronda da Muralla.

Mañá, xoves o persoal terá a reunión semanal coa dirección da empresa Alimentos Lácteos ás 10.00 horas e, de seguido, teñen solicitado a presenza de algún representante do comité no Consello de Administración que ten previsto realizar mañá mesmo a empresa.

O persoal de Alimentos Lácteos marcha a pé dende a factoría de Outeiro de Rei até o Concello de Lugo

begonha.carballo — Mon, 13 May 2013 09:41:04 +0200

A camiñada, segundo valorou o Secretario Comarcal da FGAMT-CIG, Christian López, foi todo un éxito. A marcha partiu das instalacións da factoría de Outeiro ás 9.30 horas desenvolvéndose sen ningún tipo de incidencia e cunha participación de máis de 50 traballadores e traballadoras, “o que representa unha alta porcentaxe de seguimento da actividade tendo en conta o persoal que circunstancialmente non se atopa afectado polo ERE”.

Até a chegada a Lugo, a camiñada desenvolveuse pola N-VI. Dende o acceso á Avenida da Coruña continuouse en manifestación, ocupando un único carril, accedendo a continuación ao interior da Muralla por San Fernando, San Marcos, Santo Domingo, Rúa da Raína e á Praza Maior.

Á chegada á Praza Maior os traballadores/as concentráronse, mentres un grupo máis reducido foi recibido nas instalacións do concello polo alcalde, Xosé López Orozco, e máis polo presidente da Deputación Provincial de Lugo, José Ramón Gómez Besteiro. Segundo apuntou López Carmona, durante a entrevista ambos amosaron moito interese pola situación actual na que se atopa o conflito pero sobre todo no aspecto humano. Nese senso, sinala, o alcalde de Lugo, comprometeuse a demandarlle ao Presidente da Xunta que se tomen as medidas oportunas encamiñadas a solucionar o actual problema de Alimentos Lácteos de cara a retomar a actividade canto antes na factoría.

“Os traballadores/as, que continúan sen ter noticias da Administración galega e que están a ollar como a única solución segura para este conflito pretende ser a morte mediante o concurso de acredores, e coa fin de maio, previsibelmente pola tarde, os traballadores volverán ao Parlamento para asistir ao tratamento dunha pregunta do Bloque Nacionalista Galego”, adiantou López Carmona.

A Asemblea de Desempregados/as de Lugo reclama ás empresas eléctricas reducións das tarifas

begonha.carballo — Thu, 09 May 2013 15:29:18 +0200

A continuación reproducimos o contido do escrito entregado pola Asemblea de Desempregados/as de Lugo:

Ante os grandes beneficios que as eléctricas, tiveron en tódolos tempos, vémonos abocadas a consumir cada vez menos e pagar cada vez máis.

Nós persoas desempregadas ou que non chegamos ó SMI, queremos que se nos teñan en conta as dificultades polas que estamos a pasar. Estamos de acordo que diante de situacións difíciles, respostas arriscadas e é por iso que as medidas que queremos que tomen dende esas compañías vaian encamiñadas a que se nos poñan prezos reducidos das tarifas para podermos resistir e sobrevivir e tendo en conta que a maior parte do prezo son impostos esiximos a exención destes.

Esta medida non supón para as compañías eléctricas unha perda de diñeiro, o que pode supoñer é deixar de gañar un pouco, moi pouco dos grandes beneficios, mais seguen gañando.

Nós, usuarias e usuarios, levamos pagando un aluguer de contadores, que ó longo do tempo témolo pagado de sobra o que nos parece unha práctica abusiva, como as cláusulas abusivas dos Bancos, respecto ás que agora o Tribunal de Europa deu a razón á Plataforma de Afectados polas Hipotecas.

Vostedes son un monopolio, aínda que haxa varias compañías, porque en realidade actúan como unha, impoñéndonos as súas normas e condicións ás que nós, consumidoras non ternos outra opción que tragar.

É un ha medida que exiximos para os tempos de crise na que segundo din dende o poder, “se toman medidas das que non gustamos", esta podería ser unha.

Quen temos uns ingresos tan reducidos que nos obrigan a renunciar a moitas das consideradas necesidades básicas nesta sociedade, ternos a obriga de contribuír vía impostos (coma exemplo o IVE que afecta por igual a quen non ten nada coma a quen ten elevados ingresos) para axudar a saír desta crise que nós non provocamos. A pobreza enerxética, está a causar agravamento das doenzas, incluso a morte.

Chegou o momento de que as empresas arrimen o ombreiro para que todas nós poidamos ter satisfeitas as nosas necesidades básicas. Non sería moito pedir que as grandes empresas renuncien a unha cantidade ridícula das súas ganancias para paliar os efectos desta crise sobre quen a sufrimos realmente.

O persoal de Alimentos Lácteos reclama en Xesgalicia unha solución inmediata porque “entramos en tempo de desconto”

paula.castro — Wed, 08 May 2013 14:31:17 +0200

“Entramos no tempo de desconto”, explicaba Christian López Carmona, secretario comarcal da FGAMT-CIG de Lugo na concentración que esta mañá protagonizaban as traballadoras e traballadores de Alimentos Lácteos diante de Xesgalicia. Unha nova concentración convocada para exixir a inmediata resposta dunha administración da que só se sabe que está facendo un traballo silencioso. “É tan silencioso que non sabemos nada do que están facendo a Xunta e os responsábeis do PP neste momento”.

López Carmona considera que, se se estivera a dar ese traballo silencioso tería que comezar a dar algún froito “claro e contundente” para garantir unha saída. Porén, denuncia que seguen pasando os días e malia ter comunicado a súa presenza esta mañá en Compostela para que se lles facilitara unha entrevista “seguen a rexeitar calquera tipo de contacto tanto desde Xesgalicia como do IGAPE, o propio conselleiro de Industria ou o presidente da Xunta”.

O secretario da FGAMT-CIG de Lugo lembra que foi no edifico do IGAPE onde se celebrou a primeira xuntanza para analizar a situación económica pola que atravesaba Alimentos Lácteos, onde se lles dixo que para superala precisábase un ERE e onde se lles foron requirindo unha e outra vez novos compromisos sen que se conseguiran os obxectivos marcados. “Temos data de caducidade”, alerta López Carmona, “ao final de mes entramos en concurso de acredores e do punto de vista legal non hai outra solución”.

Co compromiso dos produtores e cooperativas de leite, co plan de negocio e viabilidade presentado, co socio industrial á espera e co persoal en vilo porque automaticamente van á rúa, só resta que Xesgalicia garanta o financiamento para contar coa liquidez necesaria para retomar a actividade. “Nesa situación é na que estamos porque ese compromiso existía. Cada quen cumpriu a súa parte agás estes, que parece que se volven para atrás e non se sabe que van facer”, asegura López Carmona quen adianta que, ante esta situación “volveremos todas as veces que faga falta”.

Os traballadores/as de Alimentos Lácteos proseguirán esta semana coas mobilizacións ante o silencio da Xunta

begonha.carballo — Tue, 07 May 2013 10:36:37 +0200

Así mesmo, unha representación de traballadores participaron onte no Pleno do Concello de Lugo para asistir ao tratamento dunha moción do Bloque Nacionalista Galego relativo a Alimentos Lácteos na cal se insta á Xunta a que “determine e garanta un plan de viabilidade para Alimentos Lácteos coa concreción económica que sexa oportuna e sempre dentro do prazo legal para a entrada en situación de concurso de acredores”.

Dita moción. criticou o Secretario Comarcal da FGAMT-CIG, Christian López Carmona, foi proposta polo Partido Popular para “a coitela” suprimindo as referencias á concreción económica necesaria e eliminando os topes temporais que legalmente ten xa definidos na conta atrás na que se atopa inmersa a empresa.

“Vendo actuacións deste talante, preguntamos ao Partido Popular e aos responsábeis da Xunta de Galiza se realmente están a traballar en algo? Que garantías poden ter os traballadores dunha solución positiva ou esperanzadora da Administración galega? E, se este é o xeito de facer do presidente da Xunta e do seu Conselleiro de Industria, demandarlle precisamente a todos os afectados e non culpábeis desta situación axustar o cinto, e non darlles agora a cara nin os compromisos para a saída?”, censurou.