A federación de Administración da CIG reclama publicamente a supresión “inmediata e definitiva” do coñecido como plus de altos cargos despois de que o presidente da Xunta de Galiza anunciase a súa suspensión temporal. Dende a central nacionalista cualifican esta medida de demagóxica e critican que se poña á mesma altura un complemento salarial que un por enfermidade ou accidente non laboral.

O 17 de xuño de 2008 entregábanse no rexistro do parlamento, as máis de 19.000 sinaturas recollidas pola CIG para promover unha Iniciativa Lexislativa Popular para a derrogación do chamado plus dos altos cargos. Transcorrido máis dun ano anúnciase que a ILP será debatida polo pleno do Parlamento o próximo día 9 de decembro. A CIG valora positivamente que se incluíra, por fin, o debate da ILP na orde do día da sesión plenaria. Porén, lamenta o acordo de PSOE e PP de votar en contra, máis cando desde o goberno se está xustificando a conxelación dos salarios dos empregados públicos alegando unha suposta política de austeridade, pero se manteñen os gastos derivados deste plus.

A CIG recibiu con satisfacción a noticia de que o BNG vai instar aos seus militantes que ocuparon postos de dirección política na pasada lexislatura e teñen dereito a cobrar o plus de até 15.000 euros a renunciar a dito complemento. Non obstante, dende a central considérase que esta recomendación non deixa de ser “un parche” que non soluciona o problema de fondo, xa que deixa en mans da decisión individual a renuncia ao complemento.   

O portavoz do grupo parlamentar do BNG, Carlos Aymerich, remitiu un escrito á presidenta da Cámara en protesta polos feitos acontecidos na mañá do martes 17 de xuño no Parlamento, nos que os representantes da CIG foron expulsados cando ían atender aos medios de comunicación despois de presentar unha iniciativa lexislativa popular.

Representantes da CIG fixeron entrega, este martes día 17 de xuño, das máis de 19.000 sinaturas, xa certificadas pola oficina do censo electoral, para promover unha ILP e obrigar á institución parlamentaria a retomar o debate sobre o chamado plus de altos cargos. Porén, non se puido explicar aos medios o contido da mesma porque o xefe de seguridade do Parlamento impediuno, aducindo que tiña ordes de prohibir que se fixeran declaracións, nin sequera na porta de entrada do edificio.