O secretariado confederal da CIG, reunido esta mañá, decidiu pórse de acordo con CCOO e UGT para coordinar todo o traballo previo á folga xeral e o do propio día 29 de marzo, para garantir o máximo éxito posíbel da convocatoria. Xunto a isto, acordou emprazar a CCOO e UGT a ter unha unidade, pola base, nas empresas, nos centros de traballo e nos convenios colectivos para inviabilizar a posta en marcha da reforma laboral. Respecto das mobilizacións que se convocarán durante a xornada de folga xeral, o secretariado confederal decidiu celebrar manifestacións propias o día 29.

A Fundación Moncho Reboira-Fesga presenta un traballo audiovisual que recolle a análise sobre o recente acordo de CCOO e UGT coa patronal de CEOE e CEPYME (“II Acuerdo para el empleo y la negociación colectiva”). Inclúe entrevistas con Xesús Seixo, secretario xeral da CIG, e Antolín Alcántara, secretario confederal de negociación colectiva da central.

A CIG manifesta a súa máis enérxica e rotunda oposición á cesión de CCOO e UGT ante as demandas da patronal, asinando un acordo polo que os incrementos salariais deixarán de calcularse en función do IPC como até o de agora. O secretario confederal de Negociación Colectiva, Antolín Alcántara considera que estamos “ante o maior ataque na historia aos salarios da clase traballadora”.

A CIG vén de denunciar que a empresa Aquagest, encargada do subministro e a depuración de auga en varias cidades e vilas galegas, modificou o censo das eleccións sindicais no último momento co obxectivo de que a UGT teña a maioría no comité intercentros. Dende a central nacionalista afirman que un membro da mesa electoral chegou a dimitir para completar a lista do sindicato español e facer posíbel deste xeito que puidese presentar candidatura no colexio de técnicos do centro de traballo de Pontevedra .

A Federación Galega de Alimentación, Mar, Transporte, Téxtil e Telecomunicacións (FGAMT) da CIG de Vigo anunciou que se presentará como acusación particular no caso da agresión sufrida por un condutor de Vitrasa afiliado da central a mans do responsábel de Transportes da UGT en Galiza. Dende o sindicato nacionalista agardan que se depuren responsabilidades por uns feitos que remataron co traballador da empresa concesionaria dos autobuses urbanos vigueses gravemente ferido.

A CIG manifesta o seu total rexeitamento á proposta presentada polos secretarios de CCOO e UGT, en carta dirixida ao Presidente do Goberno español, referida a aceptar un novo acordo de moderación salarial para vindeiros anos, ampliando o período de tres anos que xa contemplaba o Acordo Interconfederal de Negociación Colectiva aínda vixente. Suso Seixo, secretario xeral da CIG, considera que con este tipo de propostas “dá a impresión que quen lles está pagando é a CEOE, en vez dos seus afiliados e afiliadas”.

A CIG-Banca  de Compostela vén de denunciar que Telemark Spain, S.L., a empresa que desde o pasado mes de setembro ten a concesión da Xunta para a explotación do teléfono de emerxencias do 112 de Galiza, pretende manipular as eleccións sindicais neste servizo. Desde a incorporación da empresa, apuntan, as condicións de traballo do persoal contratado víronse claramente empeoradas e as relacións coa nova empresa son moi tensas.