CIG-Saúde demandou, en rolda de prensa, o correcto cumprimento dos acordos de Puntos de Atención Continuada (PACs) e solicitou a reunión, con carácter urxente, da Comisión de Seguimento dos Acordos para tratar aspectos como cómputo de xornada; confección de calendarios; cumprimento da acta do 16 de xuño e contratación de persoal das listas. Antes da rolda de prensa presentou, no rexistro da consellaría de Sanidade, 400 sinaturas de médicas/os e enfermeiras/os sumándose a estas reclamacións.

Delegados e delegadas da CIG levaron a cabo unha concentración o mércores para demandar da Xunta de Galiza que regularice as condicións laborais dos traballadores e as traballadoras do Consorcio Galego de Igualdade e Benestar. Durante a protesta, a central rexistrou máis de 700 sinaturas de empregados destes servizos nas que solicitan unha resposta inmediata as súas reivindicacións e unha entrevista co Xerente do Consorcio para abordar a situación do persoal.

A CIG-ENSINO vén de presentar 281 sinaturas de músicas e músicos, reclamando que o futuro decreto de Ensinanzas Artísticas Superiores de Grao en Música recolla a creación da especialidade de Dirección de Orquestra nos conservatorios superiores de Galiza.

A Plataforma en Defensa da Sanidade Pública do Barbanza presentou esta mañá, no rexistro do SERGAS, en Santiago de Compostela, un total de 7.388 sinaturas en contra da privatización do servizo de diálise do hospital do Barbanza. A Plataforma denuncia que o SERGAS está estudando que pase a xestionalo FRIAT, unha fundación privada que xa xestiona o servizo no hospital de Verín.

Traballadoras e traballadores da Fábrica de Cerámica de Sargadelos de Cervo, acompañados dunha representación da CIG de Lugo-A Mariña, desprazáronse este mércores a Lugo para rexistrar no edificio administrativo da Xunta de Galiza as máis de 5.000 sinaturas recollidas en demanda da readmisión dos oito compañeiros/as despedidos, tras a aprobación dun ERE no mes de setembro.

A CIG-Autonómica presentou hoxe 9.000 sinaturas contra a privatización dos comedores escolares. O acto de entrega tivo lugar ao mediodía no rexistro xeral do edificio administrativo da Xunta da Galiza en San Caetano, en Santiago de Compostela.

A CIG-Ensino fixo entrega na mañá do 19 de maio de 5.546 sinaturas en defensa do mantemento dos postos de traballo no Consorcio Galego de Servizos de Igualdade e Benestar, do carácter público dos servizos que ofrece e en demanda da realización inmediata dos procesos selectivos paralizados como consecuencia das eleccións galegas. No escrito rexistrado na Xunta, as catro presidentas dos Comités provinciais do Consorcio lembran as declaracións realizadas por Feijoo en relación ao organismo e advirten á Conselleira de Traballo e Benestar que “non imos aceptar ningún paso atrás en materia de prestacións sociais”.