O secretariado confederal da CIG, reunido esta mañá, decidiu pórse de acordo con CCOO e UGT para coordinar todo o traballo previo á folga xeral e o do propio día 29 de marzo, para garantir o máximo éxito posíbel da convocatoria. Xunto a isto, acordou emprazar a CCOO e UGT a ter unha unidade, pola base, nas empresas, nos centros de traballo e nos convenios colectivos para inviabilizar a posta en marcha da reforma laboral. Respecto das mobilizacións que se convocarán durante a xornada de folga xeral, o secretariado confederal decidiu celebrar manifestacións propias o día 29.

A Fundación Moncho Reboira-Fesga presenta un traballo audiovisual que recolle a análise sobre o recente acordo de CCOO e UGT coa patronal de CEOE e CEPYME (“II Acuerdo para el empleo y la negociación colectiva”). Inclúe entrevistas con Xesús Seixo, secretario xeral da CIG, e Antolín Alcántara, secretario confederal de negociación colectiva da central.

A CIG manifesta a súa máis enérxica e rotunda oposición á cesión de CCOO e UGT ante as demandas da patronal, asinando un acordo polo que os incrementos salariais deixarán de calcularse en función do IPC como até o de agora. O secretario confederal de Negociación Colectiva, Antolín Alcántara considera que estamos “ante o maior ataque na historia aos salarios da clase traballadora”.

A CIG manifesta o seu total rexeitamento á proposta presentada polos secretarios de CCOO e UGT, en carta dirixida ao Presidente do Goberno español, referida a aceptar un novo acordo de moderación salarial para vindeiros anos, ampliando o período de tres anos que xa contemplaba o Acordo Interconfederal de Negociación Colectiva aínda vixente. Suso Seixo, secretario xeral da CIG, considera que con este tipo de propostas “dá a impresión que quen lles está pagando é a CEOE, en vez dos seus afiliados e afiliadas”.

A CIG considera un exercicio de cinismo e un gran engano á cidadanía a posta en escena este mediodía da sinatura do “Acordo económico e social para o crecemento, o emprego e a garantía das pensións”. Para a central sindical este acordo, que contempla as propostas saídas do goberno e a patronal, supón unha clara entrega do sindicalismo estatal ao poder, mais non terá repercusións relevantes nin na saída á crise nin na xeración de emprego.

A Confederación Intersindical Galega vén de reclamar transparencia no proceso de negociacións que o Goberno español e representantes das centrais sindicais estatais están mantendo dende o pasado venres a respecto da reforma do sistema de pensións e da negociación colectiva. Dende a CIG reclámase a UGT e CCOO que non asinen ningún tipo de acordo que supoña un retroceso nos dereitos da clase traballadora e anímase a ambas organizacións a sumarse á convocatoria de folga xeral prevista para o vindeiro 27 de xaneiro.

Delegados e delegadas da CIG mantiveron esta mañá un peche na oficina do Servizo Público de Emprego de Ferrol e da delegación territorial da Xunta para denunciar a situación socioeconómica da comarca de Ferrolterra, a proposta de reforma laboral e das pensións anunciadas polo Goberno, así como a actitude mantida por CCOO e UGT diante desta situación, actuando como cómplices das tentativas de recortar os dereitos da clase obreira e apoiando a perda do poder adquisitivo dos salarios.