A Plataforma pola defensa e mellora da sanidade pública de A Coruña convocou a centos de cidadáns e cidadás esta tarde no Obelisco que quixeron deste xeito amosar o seu rexeitamento aos recortes que os Gobernos español e galego pretenden aplicar no sistema sanitario público. Estes recortes eliminan a condición da saúde como dereito, deixando fóra da asistencia ordinaria a un enorme colectivo de persoas, e obrigando aos/ás usuarios/as a pagar por servizos que xa está financiando cos seus impostos.

Delegados e delegadas de CIG-Saúde concentráronse este martes diante do edificio do Sergas, en Compostela, para reclamar a retirada do decreto aprobado polo PP en Madrid e trasladado por Feijóo “submisamente” a Galiza. Un decreto que, denuncian, pon en perigo o modelo sanitario público, gratuíto e universal e que terá consecuencias negativas tanto para o persoal como para as usuarias e usuarios. A convocatoria coincidía coa celebración da mesa sectorial na que se tratou precisamente este asunto, entre outros.

A Executiva da CIG-Saúde ao completo compareceu en rolda de prensa, para denunciar as medidas de recorte nos dereitos e prestacións sanitarias impostas no Consello Interterritorial de Saúde, co beneplácito das comunidades autónomas do Partido Popular, nomeadamente co do goberno galego, representado pola conselleira de Sanidade. A federación advertiu que con estas medidas regresivas, que afectan sobre todo á poboación con menos recursos, estase poñendo en xogo o acceso universal á sanidade pública e o seu carácter redistributivo e asegurou que só coa mobilización social se pode frear este ataque, sen precedentes, a un dereito fundamental como é o dereito á saúde.

A CIG-Saúde, á espera de coñecer máis polo miúdo as medidas baralladas este mércores no Consello de Interterritorial de Saúde avanza xa o seu rexeitamento ao anunciado copago, que suporía o aumento da porcentaxe de pago por prestación farmacéutica para persoas en activo dun 40% a un 50% e mesmo a introdución dunha porcentaxe de pago dun 10% ou incluso un 20% para pensionistas. Ante a gravidade desta medida, exixe ao goberno da Xunta que faga valer as súas competencia sen materia de Sanidade.

CIG-Saúde exixe ao goberno da Xunta de Galiza que rexeite de plano o recorte orzamentario quie o goberno do Estado pretende impor na Sanidade Publica e manteña unha defensa do sistema sanitario público na reunión do Consello Interterritorial que se celebra esta mañá. A federación entende que non se pode prestar asistencia pública de calidade e universal sen recursos económicos.

CIG-Saúde vén de manifestar o seu rexeitamento á proposta de Decreto de Oferta de Emprego Público remitido pola Administración, que limita a taxa de reposición ao 10%, provoca a eliminación de postos de traballo na sanidade pública e repercute negativamente tanto na prestación como nas condicións laborais do persoal.

A CIG-Saúde vén de dirixirse á conselleira de Sanidade, Rocío Mosquera; á Xerenta do Servizo galego de Saúde, Nieves Domínguez e á Directora de Recursos Humanos do SERGAS, para demandar a convocatoria urxente do Consello Galego de Saúde e do Consello Asesor de Pacientes para que se expliquen as medidas que se van a adoptar, tras do anuncio dun novo recorte dos orzamentos en materia de Sanidade, e como van afectar aos profesionais e aos doentes. Xunto a isto, demanda a xuntanza da Mesa Sectorial tras da celebración do Consello Interterritorial no que se abordarán os recortes, valorados en sete mil millóns de euros.