A Unión Comarcal da CIG de Ferrol organizou na tarde do xoves un acto reivindicativo no Concello de Cedeira, dentro do programa acordado con motivo da campaña “Outro modelo económico e social é posíbel. Contra a crise, hai alternativa”, que incluíu unha concentración na Praza de Galiza de Cedeira na que se esixiu un cambio de rumbo nas políticas de recortes e ataques á clase traballadora aplicadas polos gobernos até o momento.

A CIG de Ferrol compareceu este mércores en rolda de prensa para informar dos novos actos programados con motivo da campaña “Hai alternativas”, que a central sindical iniciou o pasado ano, e como antesala das mobilizacións previstas para o Día da Clase Obreira Galega e a convocatoria de folga xeral de finais de marzo. Así mesmo, o voceiro comarcal, Xesús A. López Pintos, e o secretario de organización, Xosé Lois Rivera, tamén informaron que a CIG repite como primeira forza sindical en Ferrolterra ao obter o 32.6% da representación sindical.

O Secretariado Confederal da CIG, reunido este martes en Compostela, acordou convocar concentracións de delegados/as para este xoves, 12 de xaneiro, diante das delegacións de Facenda da administración central para manifestar o seu rexeitamento ás medidas aprobadas, vía decreto, polo goberno do PP. A central sindical, que tamén celebrará asembleas para analizar o novo escenario, considera que estas decisións son claramente negativas para a clase traballadora porque “os recortes do investimento público provocarán máis destrución de emprego e o deterioro dos servizos públicos e as medidas fiscais adoptadas nada teñen que ver coa reforma fiscal que sería necesario acometer”, afirma o Secretario Xeral, Suso Seixo.

Preto de 3.000 persoas sumáronse á convocatoria da CIG, na primeira mañá de chuvia e frío deste outono, para exixir un cambio radical nas políticas que os gobernos da Xunta e do Estado veñen aplicando. Así o demandou o secretario xeral, Suso Seixo, quen denunciou que hoxe, as traballadoras e traballadores galegos “estamos claramente ameazados por políticas económicas de recorte do gasto social” que levan, dixo, a un “incremento do desemprego, á destrución do tecido produtivo” e que poñen en perigo servizos sociais básicos como a sanidade e o ensino públicos.

Proseguindo co calendario de actos enmarcados na campaña “Si, existen alternativas. En defensa do emprego e dos servizos sociais”, a CIG de Ferrol celebrou unha asemblea aberta na tarde do mércores na que participou tamén o Secretario Xeral da central nacionalista. Seixo demandou un cambio nas políticas fiscais, que debe pasar por máis impostos para as rendas máis altas e a persecución da fraude e dos paraísos fiscais, ao tempo  que criticou o recorte do gasto social e do investimento público nun momento no que este é a única vía para xerar emprego e reactivar a economía

CIG, ELA e CGTP-IN mantiveron a semana pasada un encontro para avaliar as consecuencias que está a ter, nos respectivos países, a crise económica, o negativo impacto das medidas que veñen adoptando os distintos gobernos para enfrontala, valorar a contestación social e as alternativas defendidas por cada central sindical. A xuntanza, celebrada a instancias da CIG, concluíu co compromiso de manter unha comunicación fluída entre as tres organizacións, abrir vías de colaboración máis intensas e intentar confluír con mobilizacións similares.

A Unión Comarcal da CIG de Ferrol protagonizaba este martes unha curiosa acción de protesta a bordo dunha embarcación que se desprazaba pola ría transmitindo a mensaxe de que “Si, existen alternativas” e na “Defensa do emprego e dos Servizos Públicos”. O acto, que terá continuidade o xoves cunha asemblea aberta no auditorio Torrente Ballester, enmárcase na campaña nacional que a central sindical está a desenvolver en demanda dun novo modelo económico e social.