A CIG participou esta mañá no escracho convocado pola Plataforma de Afectadas/os polas Hipotecas (PAH) de Vigo diante das centrais do Banco Santander e do BBVA, entidades que se negan a designar un interlocutor para negociar as execucións hipotecarias da comarca.

A Consellaría de Economía e Industria publica no DOG do 27 de febreiro os convenios subscritos no último cuatrimestre do 2012 no que aparecen outros 300.000 € para diferentes grupos editoriais de prensa galega. Esta asignación únese aos 450.000 € do resto deste tipo de convenios que subscribiu esta consellaría durante o ano 2012 (DOG de 2 de novembro). O sector da Autonómica da CIG-Administración denuncia a falsa austeridade do goberno do PP, que mantén as partidas destes convenios coas mesmas contías que ne 2011.

O Gabinete Técnico de Economía vén de presentar a análise da evolución do mercado laboral en Galiza no ano 2012. Os datos son demoledores: unhas 116 persoas perderon diariamente o posto de traballo; a poboación activa entre os 16 e os 34 anos descendeu en 16.000 persoas; desde que se iniciou a crise, o 66% de todos os postos de traballo destruídos é do sector industrial e da construción, aínda que no último ano, o sector servizos viuse afectado con especial virulencia; 44.500 asalariados perderon o posto de traballo; descendeu fortemente o número de ocupados/as con xornada a tempo completo, e medran os de xornada a tempo parcial. Malia este panorama, a partida que máis descende –nun 40%- nos orzamentos de 2013 é a de promoción de emprego.

A CIG ten convocadas para mañá, xoves 7 de febreiro, Asembleas de Delegados/as, e posteriores mobilizacións en todas as comarcas, en rexeitamento aos Orzamentos da Xunta de Galiza para o ano 2013. Uns orzamentos que unha vez máis, e amparados na política da austeridade posta en marcha polo PP, levan á maioría social a unha situación de miseria e a un gran número de famílias á exclusión social.

A CIG denuncia, logo de analizar os orzamentos da Xunta para 2013, que o Partido Popular non ten como obxectivo saír da crise, senón dar os pasos necesarios para modificar substancialmente -á baixa- as condicións laborais da maioría da clase traballadora, privatizar servizos até o de agora impartidos polo sector público, como educación e sanidade, e acabar co modelo de caixas de aforro, entre outros. Achegamos o documento elaborado polo Gabinete Técnico da central sindical que foi aprobado este luns pola Executiva Confederal.

O Goberno español do PP aproveitou o último Consello de Ministros do ano 2011, celebrado o pasado 28 de decembro, para aprobar o desenvolvemento da reforma das pensións tramitada polo PSOE que eleva a idade de xubilación até os 67 anos. A nova normativa establece un período de transición no que se incrementará de xeito progresivo até 2027 e fixa o cómputo para o acceso ao cobro da prestación en 25 anos.

A decisión do goberno de non revalorizar as pensións conforme o IPC, anunciada este venres tras do Consello de Ministros, confirma as sospeitas da CIG de que non había intención algunha de facelo. Suso Seixo, secretario xeral, denuncia que “aínda que dicían que cumprirían a lei ao respecto, o PP utilizou este tema con fins puramente electorais, adiando facer pública a súa decisión até a celebración dos comicios en Galiza, Euskadi e Catalunya”. Seixo acusa ao PP de xogar coas “necesidades e os sentimentos” da xente, dunha forma “cruel” para protexer os intereses do PP.