O Xulgado Social número 1 de Ourense vén de facer pública unha sentenza pola que se condena ao Concello de Viana do Bolo por violación do dereito á negociación colectiva ao tentar impor unhas condicións laborais ao seu persoal sen negociar e á marxe das pactadas no convenio colectivo.

Un cento de delegados/as da limpeza da CIG-Servizos e do sindicato vasco ELA realizaron onte unha concentración de protesta en Madrid coincidindo coa reunión da comisión negociadora do convenio estatal. Dende a central nacionalista denuncian que a patronal pretende limitar as negociacións de ámbito inferior, como os convenios de empresa e os acordos de equiparación.

A CIG-Banca vén de rexeitar, novamente, a conxelación salarial prevista para os vindeiros catro anos no preacordo do convenio estatal de caixas, que suporá unha perda do poder adquisitivo de entre o 8 e o 10%. A este respecto, a Federación da CIG puntualiza que esta conxelación e recorte salarial non se basea na situación do sector senón que responde ao Acordo Interconfederal asinado recentemente por CCOO, UGT, CEOE e CEPYME.

A CIG e o O Concello de Verín alcanzaron un preacordo sobre o inicio da negociación colectiva para o persoal laboral e funcionario que posibilitará, en caso de respectarse, que a representación sindical non impugne, logo de catro anos facéndoo, os orzamentos municipais para o exercicio 2012.

A Sala do Contencioso Administrativo do TSXG, estimando o Recurso de Apelación interposto pola CIG, vén de anular, definitivamente, o Orzamento Xeral do Concello de Verín do ano 2009 por vulnerar o dereito de negociación colectiva da central sindical nacionalista. A sentenza do alto tribunal galego condena tamén á entidade a acometer unha negociación real coa representación sindical. Ademais, o Tribunal Superior de Xustiza de Galiza impón ao Concello, como parte vencida no preito, o pagamento das costas do proceso por valor de 1.000 euros.

A segunda xornada de folga convocada na planta de Leyma en Sabón (Arteixo) está sendo un novo éxito ao ser secundada pola práctica totalidade do cadro de persoal. De feito, só entrou a traballar o persoal de administración e o propietario da empresa, quen nun alarde da súa actitude antidialogante accedeu ás instalacións no seu vehículo atravesando a faixa que os empregados/as colocaran no portón con motivo da protesta. Cómpre subliñar que malia a arroutada do empresario a faixa permaneceu intacta á entrada da planta até o momento no que os traballadores/as acordaron retirala.

A práctica totalidade do persoal da planta que Leyma no Polígono de Sabón (Arteixo) secundou a primeira xornada de folga en contra da negativa da empresa á negociar o novo convenio colectivo e contra os recortes sociais aplicados de xeito unilateral polo propietario das instalacións. Durante a folga, que se desenvolveu dende as 06:00 horas luns 31 de outubro até a mesma hora do martes, tan só catro persoas do departamento de administración, xunto co propietario da planta, entraron a traballar.