A fiscal decidiu manter a petición de tres anos de prisión para os dous sindicalistas da CIG acusados, xunto a un terceiro de CCOO, dun delito contra a liberdade dos traballadores/as pola súa participación na folga do comercio de alimentación en 2009 a pesar de que durante o xuízo celebrado hoxe en Pontevedra non se constatase a existencia de probas. Varios centos de persoas trasladáronlle a súa solidariedade aos acusados cunha concentración ás portas do edificio xudicial.

A Confederación Intersindical Galega convoca mañá martes en Pontevedra unha concentración solidaria coincidindo co xuízo a dous compañeiros da federación de Servizos aos que lle reclaman tres anos de cadea por ter participado na folga do comercio de alimentación na Coruña e Pontevedra en 2009. Marcos Cadórniga e Carlos Aján están acusados, xunto a un sindicalista de CCOO que tamén formaba parte do piquete na xornada de paro, dun delito contra a liberdade dos traballadores/as.

Persoal da ITV e delegados/as da CIG concentráronse o pasado venres ás portas das ITV en diferentes puntos do País, para demandar a readmisión de Antonio Rosales, delegado do comité de empresa, despedido pola concesionaria SyC. Para os días 29 e 30 de xuño, a CIG ten convocadas dúas xornadas de folga de catro horas, que se desenvolverá entre as 8:00 e as 12:00 do mediodía.

Centos de traballadores/as da Inspección Técnica de Vehículos (ITV) e delegados/as da CIG participaron este mércores 20 na última das tres concentracións convocadas en todas as estacións da provincia de Pontevedra para esixir a readmisión dun compañeiro despedido por SyC, a empresa concesionaria. A CIG ten convocadas tamén dúas xornadas de folga parciais a finais de mes para denunciar este novo caso de represión sindical xa que o afectado era delegado do comité de empresa.

A CIG anunciou hoxe o inicio dunha campaña de mobilizacións contra o despedimento dun delegado da central nacionalista no comité de Supervisión y Control (SyC), empresa concesionaria das ITV galegas. As protestas incluirán dúas xornadas de folga parcial e a celebración de concentracións de apoio en todas as estacións do país.

Delegados e delegadas da CIG concentráronse na mañá do xoves diante dos xulgados de Ferrol en apoio e solidariedade co co-voceiro comarcal Xesús López Pintos, coincidindo co xuízo de faltas seguido por falta de danos. Este compañeiro foi denunciado pola empresa Alcampo por participar nunha acción reivindicativa, convocada por todos os sindicatos, que se realizou no hipermercado o pasado 19 de abril.

A Confederación Intersindical Galega vén de recibir a sentenza do xuízo contra dous dirixentes da central que participaron na folga do Metal do 2007. A xuíza absolve a Víctor García do delito de desordes públicos e danos. No caso de Antolín Alcántara, secretario confederal de Negociación Colectiva da CIG, condénao a un ano de prisión por desordes públicos e absólveo do delito de danos. A central nacionalista recorrerá a sentenza.