|
|
 |
| Guía do retorno / Compéndio de textos legais que fan referéncia á emigración de retorno |
|
| Trámites posteriores ao retorno |
| |
|
| |
| |
1. Documento de Identidade
|
| |
Todos as persoas españolas teñen direito a obter o documento de identidade, DNI, desde o momento no que se inscrebese o seu nacimento no Rexistro Civil. As persoas maiores de 14 anos están na obriga de posuí-lo, custodia-lo e a conserva-lo. É un documento intransferíbel e ninguén poderá ser privado do mesmo, nen sequer temporalmente, agás cando deba ser renovado. Este documento pode-se tramitar con anterioridade ao Retorno através das Oficinas Consulares. Solicitude a) Primeira expedición - Impreso de solicitude, dispoñíbel nas comisarias de policia correspondentes, asi como nos Consulados, se se pide no exterior. Se a persoa solicitante é menor de idade, o impreso deberá ir asinado polo seu representante legal ou por persoa española maior de idade, comprobando-se o número do DNI, que deberá apresentar a persoa representante legal do menor.
- Certificación en Extracto de Inscrición do nacimento especial para o DNI, solicitada para efeitos de obtención do DNI no Rexistro Civil onde conste o nacimento ou, no seu defeito, no Rexistro Civil Central.
- Duas fotografias para o DNI.
- Alta no Padrón municipal do novo Concello no que vaia residir a persoa interesada.
- Aboar as taxas que correspondan.
b) Renovación - Impreso de solicitude de renovación, dispoñíbel nas comisarias de policia.
- Duas fotografias para o DNI e entrega do DNI caducado.
- Aboar as taxas que correspondan.
Incidéncias - A caducidade do DNI non conleva sanción. Nos casos de substracción do documento en vigor nos que conste denúncia, non se cobrará nengun tipo de taxa á persoa interesada. Cando se renove un documento antes da sua caducidade, se non se cámbian dados, cobrará-se unha sobretaxa.
- En determinadas circunstáncias, cando se apresente un DNI ou pasaporte caducados durante un longo período, poderá-se exixir a apresentación dalgun documento recente que acredite a nacionalidade española, como pode ser a alta no Padrón do concello no que resida a persoa interesada.
- Os cámbios de domicílio deberán-se acreditar mediante a alta no Padrón municipal do novo domicílio no que resida a persoa interesada.
- Para corrixir erros que figuren nos dados de filiación ou data de nacimento, deberá-se apresentar a certificación en Extracto de Inscrición do nacimento expedida para efeitos do DNI. Mália o anterior, cando os erros sexan da própria Administración esta xestionará de ofício estes documentos através do Rexistro Civil.
- Sempre se debe denunciar a substracción e a perda do DNI.
Tramitación Comisarias de policia e Oficinas do Documento Nacional de Identidade, asi como Consulados. |
| |
| |
2. Empadroamento
|
| |
Toda persoa do Estado español que se encontre en território estatal coa intención de permanecer indefinidamente no mesmo terá estar empadroada no Concello onde resida ou vaia residir habitualmente.
A persoa emigrante retornada deberá achegar para empadroar-se os documentos que acrediten a sua residéncia nese concello, tais como o contrato de aluguer ou escritura de propriedade da vivenda, o contrato de luz ou similares.
Lexislación
Real Decreto 2612/1996, do 20 de decembro (BOE 16 do xaneiro de 1997) |
| |
| |
3. Cámbio do permiso de conducir estranxeiro polo do Estado español
|
| |
Para efectuar o cámbio, deberá-se formular a solicitude, no modelo oficial, que será facilitado polas Xefaturas Provinciais de Tráfico, e acompañará-se dos seguintes documentos: a) Estados da Unión Europea - Non existe prazo para efectuar a cámbio dos permisos de condución expedidos por estados comunitários. Estes permisos poden-se cambiar en calquer momento, apresentando a seguinte documentación:
- Orixinal e fotocópia do DNI e / ou pasaporte.
- Orixinal do permiso que se pretende cambiar coa fotocópia do mesmo.
- Declaración por escrito da persoa emigrante retornada de non estar privada por resolución xudicial do direito a conducir veículos a motor e ciclomotores nen estaren estes sometidos a intervención ou a suspensión, xa se acordara en via xudicial ou administrativa.
- Declaración por escrito de non ser titular doutro permiso ou licenza de condución, xa sexa expedida no Estado español ou noutro estado comunitário, de igual clase que o solicitado.
- Duas fotografias recentes tamaño 3,5 x 2,5 cm.
- Aboar as taxas correspondentes.
b) Estados non pertencentes á Unión Europea Somentes é posíbel o cámbio do permiso de conducir se está autorizado polo correspondente Convénio entre o Estado español e o país de expedición do mesmo. Actualmente só existe Convénio con Suíza, debendo-se achegar a documentación indicada no apartado anterior e ademais a seguinte: - Tradución oficial ao español do permiso que se pretende cámbiar se non estivese redactado nese idioma. Esta tradución pode ser realizada por un Intérprete Xurado, por calquer Cónsul do Estado español no estranxeiro ou polo Real Automóbil Clube de España.
- Declaración expresa da persoa titular do permiso responsabilizando-se da autenticidade, validez e vixéncia do mesmo. No caso de que o permiso ofereza dúbidas, a Xefatura Provincial de Tráfico poderá solicitar á persoa interesada un informe emitido polo Real Automóbil Clube de España no que se xulgue a validez e vixencia e se especifique os veículos aos cais autoriza a condución e demais características do permiso.
- Informe de aptitude psicofísica expedido por un centro recoñecido de condutores.
O cámbio deberá-se solicitar dentro do prazo máximo de 6 meses contados desde a adquisición da residéncia no Estado español. |
| |
| |
4. Renovación do permiso de conducir do Estado español cando xa caducou
|
| |
O permiso español primitivo somente se pode renovar ou ser prorrogada a sua vixéncia se non transcorreu máis de catro anos desde a data da sua caducidade.
Tramitación
Nas Xefaturas Provinciais de Tráfico, onde é aconsellábel consultar antes de iniciar os trámites
Lexislación
Regulamento Xeral de Condutores aprobado polo Real Decreto 772/1997, do 30 de maio. Cámbio de Notas sobre o Acordo entre o Reino de España e a Confederación Suiza sobre o recoñecimento recíproco e o cámbio dos permisos de condución nacionais (BOE do 16 de setembro de 1998) |
| |
| |
5. Certificacións de nacimento, matrimónio e defunción
|
| |
Para obter certificacións de nacimento, matrimónio ou defunción ocorridas no estranxeiro e sendo a inscrición destas realizada nun Consulado español, deberán-se solicitar no Rexistro Civil Central en Madrid.
Pode-se solicitar o translado do expediente ao Rexistro Civil da localidad e onde se resida, neste caso deberá-se xustificar a inscrición do nacimento, matrimónio ou defunción no Consulado que corresponda mediante o Libro de Família ou unha certificación expedida polo mesmo.
Tramitación
No Rexistro Civil da localidade de residéncia.
Lexislación
Artigo 20 de la lei de Rexistro Civil do 8 xullo de 1957 (BOE do 10 de xullo); Artigos 76-78 do Regulamento do Rexistro Civil do 14 de novembro de 1958 (BOE do 21 de xaneiro de 1959). |
| |
| |
6. Certificación de diversidade de apelidos
|
| |
| A sua finalidade é resolver problemas de identificación das persoas que son designadas por apelidos distintos pola aplicación das diferentes lexislacións que poden entrar en xogo; conseguintemente, o feito da diversidade de apelidos deberá-se anotar no Rexistro Civil do lugar onde estea inscrito o nacimento da persoa interesada. |
| |
| |
7. Contas bancárias no estranxeiro
|
| |
As persoas emigrantes que retornen ao Estado español e sexan titulares de contas á vista, de aforro ou a prazo, denominadas en pesetas ou en divisas en oficinas bancárias ou de crédito estranxeiras, poderán seguir mantendo-as sen nengunha restrición, sendo libres os cobros e os pagamentos entre residentes e non residentes mediante aboamentos e débitos nesas contas, ainda que se deberán declarar ao Banco de España se superan certos límites. Obrigas da persoa titular - Declarar as contas ao Banco de España facendo constar na declaración: o nome, domicílio e Número de Identificación Fiscal (NIF) da persoa titular ou titulares da conta, clase e número da conta, denominación da moeda e os dados identificativos da oficina na que se abriu.
- Remeter ao Banco de España información periódica sobre os movimentos de créditos e de débitos da conta. Se nen os movimentos de débitos nen os de aboamentos superan nun ano natural os dez millóns de pesetas, informará-se só a requerimento expreso do Banco de España.
- Conservar os extractos bancários e a documentación relativa ás contas a disposición do Banco de España e das autoridades competentes por un período de tres anos.
A cancelación destas contas deberá-se comunicar ao citado Banco no prazo dun mes, contado a partir da data na que se produza. Tramitación Oficina de Balanza de Pagamentos do Banco de España (Plaza del Rey nº 6, 28004 Madrid). Lexislación Real Decreto 1816/1991 do 20 de decembro (BOE do 27 de decembro); Orde do 27 de decembro de 1991 (BOE do 31 de decembro); Resolución do 7 de xaneiro de 1992 (BOE do 14 de xaneiro); Circular 1/1992 de 15 do xaneiro (BOE do 22 de xaneiro); Circular 24/1992 do Banco de España (BOE do 28 de decembro); Circular nº 6/1996 do 11 de maio. |
| |
| |
8. Certificado de emigrante retornado
|
| |
É o certificado que acredita o feito do Retorno definitivo ao Estado español e que se expedirá na Delegación ou na Subdelegación de Governo da província de residéncia da persoa interesada. Este documento é imprescindíbel para acreditar a condición de Emigrante Retornado/a para efeitos de solicitar: - A prestación por desemprego de nível contributivo.
- O subsídio por desemprego estabelecido para emigrantes retornados.
- O subsídio por desemprego para maiores de 52 anos (sempre que reúnan os requisitos para aceder ao subsídio de emigrante retornado).
- As axudas estabelecidas polas diferentes Administracións Públicas a favor das persoas retornadas e que se recollen no apartado referido a "Axudas en favor das persoas emigrantes retornadas" desta Guia.
Cando se trate de traballadores retornados/as dun estado da Unión Europea ou do Espazo Económico Europeo que veñan provistos do formulário E-301 e só pretendan solicitar a prestación por desemprego de nível contributivo con totalización de períodos cotizados nun estado da Unión Europea ou do Espazo Económico Europeo cos cotizados no Estado español en último lugar, non será necesária a expedición do Certificado de Emigrante Retornado. a) Contido O certificado acreditará a condición de emigrante retornado/a, a data da última saída do Estado español, a data do retorno, o tempo traballado no país estranxeiro, o período de ocupación cotizado, se é o caso, asi como que a persoa traballadora non ten direito a prestación por desemprego nese país. b) Tramitación Para obter o certificado, o traballador/a emigrante retornado/a deberá acreditar diante da Delegación ou Subdelegación do Governo da sua província de residéncia os seguintes extremos: - Identidade
Pasaporte ou documento de identidade, DNI, ou, no seu defeito, calquer outro documento no que consten os dados persoais da persoa traballadora, asi como os relativos ao seu domicílio. - Nacionalidade española
Deberá-se acreditar a conservación da nacionalidade española mediante o DNI ou o certificado de inscrición no Rexistro de Matrícula de españois, expedido polo Consulado correspondente. - Data da última saída do Estado español
Deberá-se demostrar a data da sua última saída de Estado español, para o que se apresentará igualmente pasaporte, contrato de traballo ou outro documento que o xustifique. - País de procedéncia e data de retorno
O país de procedéncia acreditará-se por calquer documento que apresente a persoa interesada, como pode ser o pasaporte co selo estampado, contrato de traballo no estranxeiro, etc. A data de retorno será a que figure na Alta do Padrón municipal do Concello onde a persoa interesada vaia fixar a sua residéncia no Estado español ou calquer outra anterior que quede probada documentalmente de xeito ímprobo. - Tempo traballado no estranxeiro
O traballo realizado no estranxeiro, (con independéncia do tipo de traballo ou incluso se o país onde se traballou non fixase a obriga de estar asegurado) e a duración do mesmo deberán-se acreditar mediante documentos orixinais ou fotocópias compulsadas de contratos de traballo, follas salariais ou de cotización á Seguridade Social e/ou certificado de traballo da empresa onde se traballou, no que terá que figurar o tempo de prestación de servizos. Os documentos que non teñan carácter oficial referidos ao traballo realizado deberán vir adverados (autentificados) polo Consulado ou Consellaria Laboral española do país/estado de procedéncia. É conveniente achegar, se se posuen, documentos que acrediten a data da extinción da relación laboral. - Carecer de direito a prestacións por desemprego no país de emigración
A persoa interesada deberá manifestar, mediante declaración xurada ou promesa, que desde a data do seu Retorno ao Estado español non percebe prestación ou subsídio de desemprego a cargo do país de emigración. - Periodos de cotización á Seguridade Social e prestacións por desemprego no estranxeiro
As persosoas emigrantes retornadas de países/estado cos que existe Convénio de Seguridade Social en virtude dos que se podan totalizar períodos de seguro, de ocupación ou de cotización para o aceso a prestacións por desemprego deberán acreditar e cumprimentar no certificado os períodos de cotización á Seguridade Social e as prestacións por desemprego, se é o caso, percebidas no estranxeiro.
c) Tramitación no caso de traballadores/as emigrantes retornados/as procedentes de estados da Unión Europea Cando estas persoas traballadoras pidan o Certificado de emigrante retornado para efeitos de solicitar as prestacións ou subsídios por desemprego estabelecidos para as persoas emigrantes retornadas ou as axudas estabelecidas polas diferentes Administracións Públicas a favor dos retornados, só deberán acreditar a data da última saída do Estado español e a data do retorno sempre que veñan provistos do formulário comunitário E-301 para os efeitos de emitir ese certificado. Se a persoa interesada non viñese provista do devandito formulário, exixirá-se-lle a documentación que con carácter xeral se estabelece no apartado b) anterior. Lexislación Real Decreto 625/1985, do 2 de abril (BOE do 7 de maio, corrección de erros, BOE do 7 de xuño), Real Decreto Lexislativo 1/994, do 20 de xuño, polo que se aproba o Texto Refundido da Lei Xeral da Seguridade Social (BOE do 29 de xuño). |
|
|
Confederación Intersindical Galega
www.galizacig.com
ÚLTIMA REVISIÓN: 27/01/2001
|