-Normalización Lingüística GalizaCIG-

O galego, de princípio a fin

O 17 de maio, manifestación nacional en defensa do noso idioma

Baixo o lema "O galego, de princípio a fin (Por unha maior presenza do galego nos meios de comunicación)", está-se a desenvolver unha campaña conxunta de reivindicación do noso idioma, na que participan diversas organizacións do ámbito político e sindical de Galiza, entre elas a nosa central sindical. A campaña está fundamentalmente centrada na reclamación dun maior uso do galego por parte dos meios de comunicación, xa que é evidente o papel secundário e case marxinal que o noso idioma ocupa nestes. Apenas un 5% da prensa escrita de Galiza utiliza o galego, e mesmo chega a traducir declaracións, entrevistas ou comunicados realizados no noso idioma. E isto, mália contaren os xornais galegos, con subsídios públicos outorgados anualmente pola Xunta de Galiza para este fin exclusivo, un maior emprego da língua galega. O uso que se fai do noso idioma nas emisoras de rádio é ridículo, e tamén aqui as diferentes emisoras privadas están a receber cartos públicos para a suposta promoción e utilización da língua própria. Nas televisións, tanto a pública estatal (TVE) como as privadas (Tele5, A3, Canal+) ou as plataformas (Via Digital, Canal Satélite), a existéncia do galego é residual e nalguns casos praticamente inexistente. Polo que respeita aos meios públicos galegos, tanto a RG como a TVG non son meios monolíngües en galego e fan un uso folclorizante da língua e culturas próprias, o que impide que cumpran a función para a que foron criadas, a normalización do noso idioma e cultura. Máis unha vez, a pasividade da administración galega ante este panorama é total. Por unha banda, non fai seguimento real nen obriga ao cumprimento dos convénios que asina coa prensa escrita ou coas emisoras de rádio ás que concede frecuéncia para unha maior utilización do galegos nos ditos meios. Pola outra, non articula nen planifica nengun outro tipo de medidas que garantan unha presenza real, e non simplesmente anedótica, do galego nos meios de comunicación. E nos meios públicos próprios, leva-se unha dirección errática que en nada contribue á extensión do uso do galego. Existe, xa que logo, unha total falta de sintonia destes meios de comunicación coa povoación á que se dirixen –a sociedade galega– cunha visión tremendamente centralista do seu papel social e uniformizadora lingüística e culturalmente. E isto diante dunha Xunta, en mans do PP, totalmente pasiva e mesmo potenciadora desta ocultación da identidade nacional de Galiza. Estas son basicamente as razóns que moven a campaña emprendida, "En galego, de princípio a fin. (Por unha maior presenza do galego nos meios de comunicación)", que en resumo vai consistir en: Elaboración e difusión pública dun manifesto. As diferentes organizacións, asociacións e institucións farán pronunciamentos públicos por un maior uso social do galego nos meios de comunicacións, nos termos en que cada unha o considere conveniente. Igualmente, os colaboradores dos meios que estean pola normalización do idioma pronunciarán-se neste sentido nas suas colunas habituais, etc. No nome das organizacións convocantes, a Mesa pola Normalización Lingüística entrevistará-se cos directores dos principais meios para realizar unha série de demandas concretas, e que estes se comprometan por escrito a respeitar o uso da língua galega dos interlocutores e a aumentar significativamente a presenza do noso idioma no meio que dirixen. O próprio 17 de maio terá lugar unha manifestación nacional en Compostela, con saída ás 12.30 h. da Alameda da cidade.

Por unha maior presenza do galego nos meios de comunicación

Manifesto É inegábel a importáncia da información neste período de entre-séculos, nun momento en que se fan cada vez máis cotiás e familiares as relacións cos meios de comunicación, coas novas tecnoloxias, con todo o que isto implica socialmente. É cada vez maior a cantidade de información que circula, chega cada vez a máis xente e a máis lugares e condiciona cada vez con maior intensidade as relacións humanas. Tamén é inegábel que hai unha preocupación crecente pola repercusión que este proceso está a ter na preservación da identidade de todos os povos e comunidades lingüísticas que conforman a diversidade social e cultural do planeta. Fronte ao estendido tópico de que camiñamos cara a unha inevitábel uniformización, medra o interese por garantir o futuro das línguas e culturas do mundo. Os galegos e galegas non debemos permanecer á marxe disto, xa que o noso mellor contributo nace necesariamente da nosa identidade diferenciada. E, sen dúbida, son os meios de ecomunicación os que maior responsabilidade teñen na transmisión desa realidade própria que ten como principal elemento caracterizador o idioma. Sen embargo, os meios de comunicación do noso país non deron asumido ainda esa responsabilidade. A escasa presenza do galego nos meios non se corresponde co nível de uso do noso idioma por parte da cidadania. Comprobar que a porcentaxe de emprego da língua própria nos grandes diários galegos non chega ao 4% é un dado preocupante que transmite unha realidade que en nada se corresponde coa vitalidade lingüística do noso país. Ante a gravidade desta situación e a pasividade que se observa tanto nos poderes públicos como nos responsábeis dos próprios meios, as organizacións abaixo asinantes queremos abrir un debate para que se arbitren as medidas que conduzan a unha maior presenza do noso idioma nos meios de comunicación, tanto de titularidade pública como privada. Un primeiro paso debe ser, como norma básica de estilo, o respeito do uso do galego cando esta sexa a língua na que lles chega unha información. A partir de aí, cada meio terá que estudar os mecanismos que o leven a unha progresiva incorporación do galego como língua normal de comunicación, en consonáncia co amplo uso que o galego ten na nosa sociedade e mesmo a sua condición de língua oficial. E nese proceso que nos ha levar a poder dispoñer de meios de comunicación en galego, e sen obviar que a responsabilidade primeira reside nas próprias empresas de comunicación e nos poderes públicos, nomeadamente o governo galego, tamén a cidadania, como emisora e receptora de información, xoga un papel importante na consolidación duns meios próprios. Por iso, ainda que xa se vén percebendo a demanda da cidadania para reclamar unha maior presenza do noso idioma neste ámbito, esta demanda terá que intensificar-se até conseguir que os meios sexan o reflexo real dunha sociedade que se expresa moi maioritariamente en galego. Galiza, 17 de maio do 2000. A Mesa pola Normalización Lingüística, Bloque Nacionalista Galego (BNG), Comisións Obreiras (CC.OO), Confederación Intersindical Galega (CIG) e Esquerda de Galicia (EdG).

Confederación Intersindical Galega www.galizacig.com ÚLTIMA REVISIÓN: 23/10/2000