|
2.1. Qué é o Comité de Seguridade e Saúde
O Comité de Seguridade e Saúde é
o órgano paritario e colexiado de participación, destinado á consulta regular e periódica
das actuacións da empresa en materia de prevención de riscos. [LPRL
art.38]
Ten que constituírse en todas as empresas ou centros de traballo que conten con 50 o mais traballadores
e traballadoras. [LPRL art.38.2]
Estará formado polos Delegados e Delegadas de Prevención dunha parte e polo empresario e/ou os seus
representantes, en número igual ao de Delegados/as de Prevención, da outra.
Nas empresas con varios centros de traballo pódese acordar a creación dun Comité Intercentros. [LPRL
art.38.3]
O Comité de Seguridade e Saúde reunirase trimestralmente como mínimo, e sempre que o solicite
algunha das dúas partes do mesmo.
[LPRL art.38.3]
O Comité adoptará as súas propias normas de funcionamento. [LPRL
art.38.3]
Nas xuntanzas do Comité de Seguridade e Saúde participarán, con voz pero sen voto, os Delegados
Sindicais e os responsables técnicos da prevención na empresa que non estean incluídos na
composición oficial do propio Comité. Nas mesmas condicións poderán participar traballadores
da empresa que conten cunha especial cualificación ou información respecto das cuestións concretas
que se debatan neste órgano e técnicos en prevención alleos á empresa, sempre que así
o solicite algunha das representacións no Comité.
[LPRL art.38.2]
Segundo a Lei, o Delegado ou Delegada de
Prevención poderán solicitar seren acompañados por un técnico alleo á empresa
para apoiar algunha demanda especialmente complexa. Para esto poden pedir asesoramento no sindicato.
2.2. Competencias e facultades do Comité
de Seguridade e Saúde
A Lei de Prevención de Riscos Laborais atribúe
ao Comité de Seguridade e Saúde as seguintes competencias: [LPRL
art.39.1]
• Participar na elaboración, desenvolvemento e avaliación
dos programas de prevención de riscos da empresa.
• Debater, antes da súa posta en práctica, os
proxectos en materia de organización do traballo e introducción de novas tecnoloxías, no referente
á súa incidencia na prevención de riscos.
• Promover iniciativas de prevención e mellora das condicións
de traballo.
• Propoñer á empresa a mellora das condicións
de traballo ou a corrección das deficiencias existentes.
No exercicio das súas competencias, o Comité de
Seguridade e Saúde estará facultado para:
[LPRL art.39.2]
• Visitar os centros de traballo para coñecer directamente
a situación relativa á prevención de riscos.
• Coñecer cantos documentos e informes relativos ás
condicións de traballo sexan necesarios para o cumprimento das súas funcións.
• Coñecer e analizar os danos producidos na saúde
dos traballadores/as ó obxecto de valorar as súas causas e propoñer as medidas preventivas
oportunas.
• Coñecer e informar a memoria e programación
anual dos servicios de prevención.
Os Comités de Seguridade e Saúde de empresas que
desenvolvan a súa actividade nun mesmo centro de traballo, poden acordar a realización de reunións
conxuntas. [LPRL art.39.3][RD 171/2004 art.16]
Nas empresas que, por non acadaren o número
mínimo de 50 traballadores/as, non conten con Comité de Seguridade e Saúde, as competencias
atribuídas ao mesmo serán exercidas polos Delegados ou Delegadas de Prevención. [LPRL
art.36.1]
2.3. Como constituír un Comité
de Seguridade e Saúde
Cando hai obriga de formar un Comité de Seguridade e
Saúde, sexa por Lei ou por acordo de convenio, hai que exixir a súa constitución.
Hai que solicitalo á empresa por escrito e se nun
prazo razoable non hai resposta positiva, pódese
presentar unha denuncia ante a Inspección de
traballo.
O Comité de Seguridade e Saúde debe ser paritario:
igual número de representantes da empresa que de Delegados/as de Prevención. [LPRL
art.38]
Unha vez constituído, hai que acordar entre as partes
unhas normas de funcionamento. Un regulamento interno cunhas cláusulas que deben constar por escrito. Por
exemplo:
• Distribuír os cargos de presidente/a e secretario/a
entre as partes: un para a empresa e outro para os Delegados/as. Estes cargos poden ser rotatorios.
• A representación do Comité deberá ser
sempre de carácter mixto, con presencia dun membro de cada unha das partes.
• As reunións deben convocarse por escrito, con orde
do día e con antelación abondo para poder preparalas.
• En todas as reunións trimestrais, a empresa debe presentar
un informe sobre a evolución do plano de prevención, incluíndo os resultados dos controis
ambientais ou de a vixilancia da saúde, as estatísticas sobre accidentes de traballo ou enfermidades
profesionais, así como sobre a incidencia de enfermidades que ocasionan baixas laborais.
• Ademais das reunións trimestrais regulamentarias, convocaranse
reunións extraordinarias cando se dean algunhas destas circunstancias:
- Accidentes ou danos graves.
- Incidentes con risco grave.
- Sancións por incumprimentos.
- Tarefas puntuais especialmente perigosas.
- Reunión anual extraordinaria para facer balance do plano
de prevención e informar a memoria e programación do Servicio de Prevención.
• Levantarase acta de cada reunión, recolléndose
todos os asuntos tratados, os acordos adoptados cos puntos e motivos de discordancia, así como os prazos
e responsabilidades para levar a cabo as tarefas acordadas.
• Débese dar publicidade entre os traballadores e traballadoras
das reunións e os acordos do Comité, de maneira que calquera traballador/a poda facer chegar as súas
queixas e propostas, ben persoalmente ou por escrito.
• Contemplar a posibilidade de constituír grupos de traballo
para abordar problemas específicos.
Despois de ter constituído o Comité de Seguridade
e Saúde e dispoñer dun regulamento, temos que conseguir que funcione. Para isto hai que ter presente
algunhas cuestións e recomendacións:
• Buscar o compromiso da empresa de dotar de recursos propios
ao Comité, segundo as necesidades: local, materiais, libros técnicos, etc.
• Procurar que os asuntos non se "pudran" sobre a
mesa, fixando sempre prazos para cumprir os acordos e decisións.
• Levar ao comité os asuntos verdadeiramente importantes
e non enredarse con problemas que poden ser resoltos na mesma sección ou no posto de traballo.
• Máxima transparencia: informar sistematicamente aos
traballadores e traballadoras de todo o que acontece no Comité.
• Promover fórmulas para aumentar a participación
dos traballadores e traballadoras: buzón de suxerencias, impresos para elevar queixas ao Comité ou
para exixir a súa visita ao posto de traballo, etc.
• Non permitir que a empresa decline as súas responsabilidades
nun órgano consultivo como é o Comité.
Nas visitas aos centros de traballo para
a comprobación do cumprimento da normativa sobre prevención de riscos laborais, a Inspección
de Traballo comunicará a súa presencia ao Comité de Seguridade e Saúde a fin de que
lle poidan acompañar durante o desenvolvemento da visita e formularlle as observacións que estimen
oportunas. [LPRL art.40.2]
|
