Actualidade Vigo, 21 de abril de 2003 Convenio da Banca Privada Comunicado nº 5   CIG-Comunicación- cig.prensa@galizacig.com O venres día 11 de abril, na reunión da Mesa Negociadora do Convenio, tratáronse os puntos de Salario e Igualdade de Oportunidades, tal e como quedara acordado na anterior reunión do día 3. Igualdade de Oportunidades: coincidindo cos demais sindicatos en que é necesario eliminar barreiras que dificulten a plena integración da muller no noso sector, para o que sería necesario levar adiante actuacións que contemplasen criterios de discriminación positiva e favorecesen a plena conciliación da vida familiar e laboral, a CIG formulou, como medida ineludible para empezar a afrontar con seriedade este problema, a eliminación das horas extras ilegais e o rigoroso cumprimento do horario establecido en convenio. A isto a patronal contestou que hai un horario regulado en convenio e que os bancos actúan dentro da legalidade. Sobre os outros temas que lles foron formulados sobre Igualdade de Oportunidades, tomaron nota e quedaron en contestar nunha próxima reunión. Salario: a día de hoxe, non temos coñecemento da proposta concreta da AEB a este respecto. Dende a CIG reiteramos a nosa proposta do 6% con cláusula de revisión á alza do IPC + 2 puntos. Así mesmo, reincidimos na importancia do concepto de recuperación do poder adquisitivo que consideramos é compartido polo resto dos sindicatos da mesa. Chegados a este punto cunha clara manobra por parte da patronal de dilatar as negociacións e sen concretar nada, dende a CIG reiteramos a necesidade dunha actuación conxunta por parte de tódolos sindicatos para facer fronte á patronal e conquerir un convenio xusto o antes posible. Quedaron fixadas novas reunións para os días 29 de abril e 8 de maio. Galiza, 14 de abril de 2003.

Confederación Intersindical Galega www.galizacig.com ÚLTIMA REVISIÓN: 21/04/2003