Actualidade Vigo, 22 de novembro de 2003 Por un convenio galego ¡xa! Numerosa manifestación da Federación de Banca da CIG na cidade de Pontevedra   CIG-Comunicación- cig.prensa@galizacig.com   A manifestación ía encabezada por unha pancarta co lema “Convenio Galego ¡XA!, eiquí traballamos, eiquí negociamos” e ía precedida por un cadaleito que contiña o convenio colectivo da banca, como símbolo das pretensións da patronal de enterrar a negociación colectiva e impoñer unilateralmente as condicións de traballo para os seus empregados e empregadas. (Ver reportaxe gráfica).   Máis de 300 delegados e delegadas de tódolos comités de empresa de Galiza do sector financeiro participaron na Manifestación Nacional convocada pola Federación de Banca da CIG ante a ruptura unilateral por parte da patronal AEB da Mesa de Negociación do convenio colectivo da Banca Privada o pasado día 13 en Madrid. A manifestación saíu ás 11 da mañá e percorreu as rúas da cidade nas que están establecidas as oficinas principais de distintas entidades bancarias. Ía encabezada por unha pancarta co lema “Convenio Galego ¡XA! – Eiquí traballamos, eiquí negociamos”. Tamén ía precedida por un cadaleito que contiña o convenio colectivo da banca, como símbolo das pretensións da patronal de enterrar a negociación colectiva e impoñer unilateralmente as condicións de traballo para os seus empregados e empregadas. Durante o percorrido, escoitáronse berros alusivos á situación do convenio, entre os que destacaban “Convenios dignos na nosa terra”, “Eiquí traballamos, eiquí negociamos”, “Suba salarial como a patronal”, “Recuperación poder adquisitivo”... A medida que se chegaba ás oficinas bancarias, algúns representantes sindicais entraban nelas para contarlles aos empregados e empregadas a situación do convenio e repartir comunicados sobre o mesmo, mentres o resto da mobilización quedaba na rúa coreando as consignas. Responsables da federación xa comunicaron que esta mobilización de hoxe sería unha máis das que se están a facer durante todo o ano pola prepotencia da patronal AEB na mesa negociadora, e que no vindeiro mes de decembro habería máis mobilizacións en distintas cidades galegas. Vigo, 21 de novembro de 2003.

Confederación Intersindical Galega www.galizacig.com ÚLTIMA REVISIÓN: 22/11/2003