Actualidade Vigo, 14 de febreiro de 2004 A CIG vai realizar exposicións, conferencias e varias publicacións sobre o tema durante todo o ano O 14 de febreiro cúmprense 20 anos da primeira folga xeral galega   CIG-Comunicación- cig.prensa@galizacig.com   Cartaz conmemorativo, 1984-2004, 20 anos da primeira folga xeral galega.   O 14 de febreiro cúmprense vinte anos da primeira folga xeral galega, por tal motivo a CIG vai realizar durante todo o ano diversos actos, aos que se lle dará abondosa difusión, e editar varias publicacións para conmemorar a data. Actividades a desenvolver pola CIG Entre estes publicacións e actos que teñen como finalidade lembrar un anaco importante da nosa historia nacional, na que o movemento obreiro e especialmente o sindicalismo tivo un papel sobresainte, están: Elaboración dun cartaz conmemorativo (mostra no cadro adxunto). Realización dun políptico sobre as 10 folgas xerais que se realizaron ate hoxe no País. Edición dun libro a toda cor sobre as folgas xerais, indicando as razóns polas que se realizaron, así como con fotografías e reproducción de notas de xornais, cartaces e outro material gráfico. Facer un libro sobre o sindicalismo na década dos oitenta. Un CD-ROM sobre a data. Unha exposición de 17 paneis (de 200x90 cm) coa a reproducción de documentos e material gráfico sobre as dez folgas xerais realizadas nestes vinte anos en Galiza. Realizar varias conferencias sobre as folgas do ano 84, así como sobre temas de actualidade de importancia para a clase obreira e os movementos sociais en xeral. Como a relación entre movementos sociais e políticos, globalización e emprego, etc. Varias destas conferencias contaran coa presenza de destacados estudosos dos mesmos de relevancia internacional. Para a realización destes actos e material a CIG conta coa colaboración económica de Deputación e concellos, e persoas que contribuíron con material para facer paneis, libros e polípticos.   “Contra o desmantelamento industrial, adiante a folga xeral!”, capa do número 1 da revista Eixo, segunda etapa, xaneiro de 1984.   Razóns para tres folgas nun ano As folgas do ano 1984 xurden pola oposición do conxunto da povoación galega á pretensión de desmantelar o sector naval. Agora ben, ademais deste motivo, sen dúbida incidiu tamén a mala situación económica e o aumento do desemprego. Foron durante ese ano tres os paros xerais: 14 de febreiro, 12 de xullo e 29 de novembro. O primeiro convocado exclusivamente pola INTG e os doutros dous pola INTG e CCOO. A folga xeral do 14 de febreiro de 1984 foi convocada exclusivamente polo sindicato nacionalista INTG, aproveitando a convocatoria unitaria de paros comarcais contra a “reconversión” en Ferrol e Vigo. As demais centrais sindicais pensaron que a extensión da folga pola INTG ía ser un fracaso e opuxéronse activamente. Trabucáronse, e o paro tivo unha gran incidencia en Ourense e varias vilas do País, e conseguiu folgas parciais no resto das cidades. Ou sexa: foi un éxito. Ademais demostraba que, contra o que argumentaban partidos e sindicatos estatais, a clase obreira galega tiña unha fonda conciencia de clase e nación, que non se movía só por problemas que lle atinxían directamente, é dicir por temas moi primarios e inmediatos. O atrevemento do sindicalismo nacionalista, ademais de dar pulo ao nacionalismo como forza, eliminar ideas erróneas e que infravaloraban ao noso povo e o seu nivel de conciencia política, permitiron que se convocara unitariamente entre a INTG e CCOO as outras dúas folgas xerais durante o ano, e ao éxito das mesmas. Non debemos esquecer a nosa historia, toda ela, porén especialmente a máis recente. Máxime cando de novo hoxe o sector naval galego pasa por graves problemas, xa que se está dislocando carga de traballo a outros estaleiros do Estado. O que compre facer para frear este novo desmantelamento tamén ten exemplos no pasado, aínda que cada momento histórico teña seus ritmos, contextos e correlación de forzas, que debemos ter en conta. A historia tamén é parte do presente, da nosa riqueza. Galiza, 13 de febreiro de 2004.

Confederación Intersindical Galega www.galizacig.com ÚLTIMA REVISIÓN: 14/02/2004 cig.informatica