Actualidade Vigo, 31 de marzo de 2007 IV Convenio de Telemárketing Con despedimentos non é posible negociar o Convenio   CIG-Comunicación- cig.prensa@galizacig.com   Para a CIG a negociación colectiva é un instrumento válido para frear a deslocalización apostando pola profesionalización e a calidade do servizo. (Descarga a foto en tamaño tapiz para o escritorio de Windows 1024x768 ou 1280x960).   Ao longo deste mes de marzo, os compañeiros e compañeiras da empresa Atento de A Coruña veñen mantendo unha exemplar loita en defensa dos seus postos de traballo, despois de que esta filial do Grupo Telefónica despedira a 179 persoas. O pasado 23 de febreiro máis de 5.000 persoas asistiron á manifestación convocada en A Coruña para solicitar a readmisión do persoal despedido e contra a deslocalización do sector, na maior mobilización da historia do Telemárketing en Galiza. Ante a celebración da reunión do Convenio de Telemárketing prevista para o día 28 de marzo, o Comité de Empresa de Atento –integrado por CIG, CGT, CCOO e UGT– aprobou por unanimidade solicitar a todos os sindicatos presentes na Mesa negociadora a paralización da negociación, en tanto non foran readmitidas as persoas afectadas polos despedimentos en todo o Estado. Ante a petición do Comité de Empresa de Atento, a CIG non asistiu á Mesa Dende a CIG apoiamos a proposta do Comité de Empresa de Atento, postura que anunciamos á patronal e ao resto da representación sindical. Entendemos que con máis de 800 despedimentos colectivos no sector nos últimos quince días, a patronal pretende chantaxear á representación sindical e ao persoal para que aceptemos rebaixar as xa precarias condicións laborais do Convenio. O resto dos sindicatos asistiron á Mesa sen atender a petición do Comité de Empresa de Atento e tiveron que escoitar á patronal rexeitar as diferentes Plataformas sindicais alegando que ante a deslocalización só cabe unha rebaixa de custes para manter o emprego, o que nos reafirma na nosa posición. As empresas de Telemárketing deslocalizan cara América Latina, países nos que os teleoperadores e teleoperadoras cobran un terzo do noso salario. Está claro que non podemos competir fronte á deslocalización permitindo que empeoren as nosas condicións laborais: aquí non podemos vivir cobrando 200 euros ao mes. O ano pasado 700 persoas perderon o seu posto de traballo en Galiza pola deslocalización da operadora Jazztel; hoxe 2.000 postos máis están en perigo no sector de Telemárketing en Galiza debido a deslocalización do Grupo Telefónica. Ou freamos esta tendencia coa mobilización e a loita de todo o sector, na procura dun Convenio que garanta os postos de traballo, ou máis cedo que tarde, deslocalizar será unha clara opción para o resto das operadoras de telefonía que teñen contratas de Telemárketing en Galiza. Galiza, 30 de marzo de 2007.   Descarga, imprime, difunde...   Con despedimentos non é posible negociar o Convenio

Confederación Intersindical Galega www.galizacig.com ÚLTIMA REVISIÓN: 31/03/2007 cig.informatica

web-espello en www.galizacig.org e www.galizacig.net (mirrors) Para estar ao día da actualidade sindical en Galiza, subscríbete á lista de correo da CIG e recibe puntual notificación das novas informacións, artigos, documentos, publicacións, convenios colectivos... que ofrece a CIG na sua páxina web galizacig.com. Apúntate en: http://www.elistas.net/lista/galizacig/alta