|
Actualidade CIG-Comunicación-
Actualmente estase a negociar na Cruz Vermella de A Coruña o convenio colectivo de ámbito provincial. Neste intre a negociación encontrase estancada ante a rotunda negativa da Empresa para mellorar as retribucións que se perciben na Coruña (moi inferiores ás que se cobran noutras delegacións desta Entidade e, nalgúns casos, raiando o salario mínimo interprofesional) e reducir a precariedade salarial que sofren as súas empregadas e empregados. A parte empresarial considera que unha subida de 3 euros nun soldo de 600 é unha “mellora real do poder adquisitivo” e que o persoal ten un convenio xusto; curiosamente, das persoas que conforman o seu equipo negociador soamente unha persoa está adscrita ao mesmo, dado que o persoal directivo ten un convenio aparte. A Dirección da Cruz Vermella non só considera que o salario é xusto, senón que debe parecerlles excesivo porque nas súas propostas de negociación pretenden conxelar complementos como o de antigüidade. As traballadoras e traballadores da Cruz Vermella da Coruña son profesionais da acción e intervención social e non pretenden que os seus salarios vaian en función da importante labor social que realizan (con intervencións en situacións de perigo físico; rescates no mar ou atención a usuarios/as en situacións de dependencia ou en risco de exclusión social), senón que simplemente aspiran, coma calquera outro/a profesional, a poder vivir dignamente do seu traballo. O Comité de empresa denuncia que a Dirección da Entidade na provincia da Coruña non ten vontade de negociar senón de impoñer, pretendendo cargar sobre as traballadoras e traballadores a mala xestión económica que a empresa veu realizando nos últimos anos. Diante desta situación, o Comité vese na obriga de contestar a esta actitude mediante a sensibilización social e a mobilización das traballadoras e traballadores. |
||||||||
|
||||||||
|
ÚLTIMA REVISIÓN: 14/03/2008 |
||||||||
|
